بعض لوگ بامقصد کام کی بجائے دوسروں پر تنقید سے شہرت حاصل کر رہے ہیں: محمد احمد
لاہور: (ویب ڈیسک) پاکستان کے سینئر اداکار اور مصنف محمد احمد نے آن لائن تنقید اور تنازعات پر مبنی مواد کے بڑھتے ہوئے رجحان پر اظہارِ خیال کرتے ہوئے کہا ہے کہ آج کل بہت سے لوگ بامقصد کام کرنے کے بجائے دوسروں پر تنقید کر کے شہرت حاصل کر رہے ہیں۔
سوشل میڈیا ایپ انسٹاگرام پر ویڈیو شئیر کرتے ہوئے اداکار نے طنزیہ انداز میں کہا ہے کہ سوشل میڈیا صارفین کی نظر میں اب اداکاری اور لکھنا شاید کوئی مشکل پیشہ نہیں رہا، آج توجہ حاصل کرنے کا سب سے آسان طریقہ دوسروں پر تنقید کرنا اور تنازع کھڑا کرنا ہے، کیونکہ اس قسم کا مواد سوشل میڈیا پر تیزی سے لائکس اور توجہ حاصل کر لیتا ہے۔
کسی کا نام لیے بغیر محمد احمد نے کہا کہ بعض افراد جب اپنے شعبے میں کامیابی حاصل نہیں کر پاتے یا ان کے پاس کوئی نمایاں کام نہیں ہوتا تو وہ دوسروں کیخلاف باتیں کرنا شروع کر دیتے ہیں، آن لائن تنازعات پیدا کرنا اب ویوز، فالوورز اور عوامی توجہ حاصل کرنے کا ایک آسان ذریعہ بن چکا ہے۔
انہوں نے یوٹیوب اور ٹک ٹاک جیسے پلیٹ فارمز پر روسٹنگ، گپ شپ اور ذاتی تنقید کے بڑھتے ہوئے رجحان پر تشویش کا اظہار کرتے ہوئے کہا کہ منفی مواد کو اکثر تخلیقی اور معیاری کام کے مقابلے میں زیادہ پذیرائی ملتی ہے، جس کے باعث مزید لوگ بھی اسی راستے کو اختیار کرنے لگتے ہیں۔
اداکار نے کہا کہ اداکاری، تحریر یا کسی بھی تخلیقی شعبے میں حقیقی صلاحیت برسوں کی محنت، لگن اور مسلسل جدوجہد کا نتیجہ ہوتی ہے، مگر سوشل میڈیا پر سنسنی خیز مواد کو زیادہ اہمیت ملتی ہے، جس کی وجہ سے تنازعات بامعنی تخلیقی کام کے مقابلے میں کہیں زیادہ تیزی سے پھیلتے ہیں۔
اگرچہ محمد احمد نے کسی شخصیت کا نام نہیں لیا، تاہم ان کے بیان کے بعد سوشل میڈیا پر بحث چھڑ گئی ہے۔
متعدد صارفین نے اسے ان شخصیات پر بالواسطہ تنقید قرار دیا ہے جو اپنے پیشہ ورانہ کام کے بجائے تنازعات کی وجہ سے خبروں میں رہتی ہیں، جبکہ ان کے مؤقف کو پاکستان کی شوبز انڈسٹری سے تعلق رکھنے والی کئی معروف شخصیات کی حمایت بھی حاصل ہوئی ہے۔
