×

کھیل

ایشیا بلائنڈ کرکٹ کپ کے لیے پاکستان کے 17 رکنی سکواڈ کا اعلان

بند کریں

بہاولپور: (دنیا نیوز) آئندہ ماہ بنگلہ دیش میں ہونے والے ایشیا بلائنڈ کرکٹ کپ کے لیے قومی ٹیم کے 17 رکنی سکواڈ کا اعلان کردیا گیا، نثار علی ٹیم کی قیادت کریں گے جبکہ بدر منیر کو نائب کپتان مقرر کیا گیا ہے۔

سکواڈ میں بی ون کیٹیگری میں ظفر اقبال، محمد شاہ زیب، محمد ادریس، سلیم، جنید خان، فخر عباس اور حمزہ محبوب شامل ہیں۔

بی ٹو کیٹیگری میں نثار علی، بدر منیر، معین اسلم، نعمت اللہ اور بابر علی کو شامل کیا گیا ہے جبکہ بی تھری کیٹیگری میں محمد صفدر، مطیع اللہ، طلحہ اقبال، سانول شہزاد، کامران اختر اور نعیم اللہ سکواڈ کا حصہ ہیں۔

اعلان کردہ سکواڈ میں بی ون کیٹیگری کے 6، بی ٹو کے 5 اور بی تھری کیٹیگری کے 6 کھلاڑی شامل ہیں، ایشیا بلائنڈ کرکٹ کپ میں پاکستان، بھارت، بنگلہ دیش، سری لنکا اور افغانستان کی ٹیمیں مدمقابل ہوں گی۔

قومی ٹیم کے کپتان نثار علی نے کہا کہ ٹیم بہت متوازن بنی ہے۔ بھارت کے رویے پر کچھ نہیں کہہ سکتے، ہم اپنے کھیل سے خود کو بہتر ثابت کریں گے۔

پاکستان بلائنڈ کرکٹ کونسل کے چیئرمین سلطان شاہ نے کہا کہ ورلڈ بلائنڈ کرکٹ کونسل کی سخت پالیسیاں ہیں اور اس کے مطابق کھیل میں سیاست کو ترجیح نہیں دی جاتی، اس بار ایونٹ کے لیے نیوٹرل مقام کا مقصد یہی تھا کہ تمام ٹیمیں شریک ہوسکیں۔

سلطان شاہ کے مطابق پاکستان کرکٹ بورڈ انہیں ایک مخصوص بجٹ فراہم کرتا ہے جو اخراجات کا 50 سے 60 فیصد ہے، انہوں نے عزم ظاہر کیا کہ اس بار قوم کو جیت کا تحفہ دیں گے۔

ایشیا بلائنڈ کرکٹ کپ 14 سے 20 نومبر تک بنگلہ دیش میں منعقد ہوگا، قومی ٹیم کا تربیتی کیمپ 28 اکتوبر سے 11 نومبر تک لاہور میں لگایا جائے گا جبکہ ٹیم 12 نومبر کو ڈھاکہ کے لیے روانہ ہوگی۔ پاکستان اور بھارت کے درمیان مقابلہ 17 نومبر کو ہوگا۔