الیکشن کمیشن : پاک سر زمین پارٹی کی تحلیل پر فیصلہ محفوظ
اسلام آباد: (دنیانیوز) الیکشن کمیشن آف پاکستان نے پاک سر زمین پارٹی کی تحلیل پر فیصلہ محفوظ کر لیا۔
اسلام آباد میں پاک سر زمین پارٹی کی تحلیل کے معاملے پر الیکشن کمیشن میں چیف الیکشن کمشنر سکندر سلطان راجہ کی سربراہی میں 3 رکنی ینچ نے سماعت کی۔
پاک سر زمین پارٹی کے نمائندے نے الیکشن کمیشن میں پیش ہو کر بتایا کہ پاک سر زمین پارٹی ایم کیو ایم پاکستان میں ضم ہو چکی ہے۔
پاک سر زمین پارٹی کے نمائندے نے کہا کہ مکمل طریقہ کار اور قرار داد کے بعد پارٹی کو تحلیل کیا گیا، ڈی جی لاء الیکشن کمیشن نے کہا کہ پی ایس پی پارٹی کی تحلیل سے متعلق قانون خاموش ہے۔
الیکشن کمیشن نے پاک سرزمین پارٹی کی تحلیل پر فیصلہ محفوظ کرلیا۔
یاد رہے کہ پاک سر زمین پارٹی کے چیئرمین سید مصطفیٰ کمال اور صدر انیس قائم خانی نے پی ایس پی کے قیام کے 6 سال 9 ماہ اور 21 دن بعد 12 جنوری 2023ء کو اپنی پارٹی کے رہنماؤں اور کارکنان کے ہمراہ متحدہ قومی موومنٹ کے مرکز بہادر آباد پہنچ کر پی ایس پی کو ایم کیو ایم میں ضم کر نے کا باقاعدہ اعلان کیا تھا۔
