کے پی اسمبلی میں 2025 میں کوئی اجلاس مقررہ وقت پر شروع نہ ہو سکا
پشاور: (عامر جمیل) سال 2025 کے دوران خیبر پختونخوا اسمبلی میں گھنٹیاں تو بجتی رہیں تاہم کوئی بھی اجلاس مقررہ وقت پر شروع نہ ہو سکا، سال بھر میں اسمبلی کی کارروائی تاخیر، کورم کی نشاندہی اور طویل مباحث کے باعث خبروں میں رہی۔
دستاویزات کے مطابق سال 2025 میں خیبر پختونخوا اسمبلی کے مجموعی طور پر 4 سیشنز منعقد ہوئے، ان سیشنز کے دوران 31 قوانین ایوان میں لائے گئے جن میں سے 26 قوانین منظور جبکہ 5 قوانین صرف پیش کیے جا سکے۔
اسی عرصے میں 20 قوانین میں ترامیم پیش کی گئیں جن میں لوکل گورنمنٹ ترمیمی بل، فنانس بل، خیبر پختونخوا آسان کاروبار بل، خیبر پختونخوا لیگل ایڈ ترمیمی بل اور زرعی انکم ٹیکس بل شامل ہیں۔
سال 2025 کے دوران اسمبلی نے 61 قراردادیں بھی منظور کیں جبکہ 8 مواقع پر نقطہ اعتراض پر بحث کی گئی، ایوان میں کورم کی نشاندہی کے باعث 11 مرتبہ اجلاس ملتوی کرنا پڑا۔
اسمبلی نے صوبے کے آئندہ مالی سال 26-2025 کے بجٹ کی منظوری بھی دی، اس کے علاوہ صوبے کی تاریخ میں پہلی بار امن جرگہ منعقد کیا گیا جبکہ امن و امان کی صورتحال پر چھ ماہ سے زائد عرصے تک تفصیلی بحث جاری رہی۔
سیاسی مبصرین کے مطابق قانون سازی کے ساتھ ساتھ اجلاسوں میں تاخیر اور کورم کی کمی جیسے مسائل صوبائی اسمبلی کی مجموعی کارکردگی پر سوالیہ نشان بنے رہے۔
