ایران میں بگڑتی صورتحال کیخلاف دنیا بھر میں ایرانی باشندوں کے مظاہرے
ایتھنز: (دنیا نیوز) ایران میں بگڑتی ہوئی داخلی صورتحال کے خلاف دنیا بھر میں ایرانی باشندوں کا احتجاج جاری رہا۔
یونان کے دارالحکومت ایتھنز میں بھی ایرانی کمیونٹی سڑکوں پر نکل آئی، جہاں یونانی پارلیمنٹ کے سامنے مظاہرہ کیا گیا، مظاہرین نے تہران میں نوجوانوں پر فائرنگ کے واقعات کی شدید مذمت کی۔
ایتھنز کے مرکزی علاقے میں واقع یونانی پارلیمنٹ کے سامنے ایرانی باشندوں کی بڑی تعداد جمع ہوئی، جنہوں نے ایران میں جاری حکومتی کریک ڈاؤن کے خلاف آواز بلند کی، مظاہرین کا کہنا تھا کہ تہران اور دیگر شہروں میں نوجوانوں کے پرامن مظاہروں پر براہِ راست فائرنگ کی گئی جس میں متعدد افراد ہلاک اور زخمی ہوئے۔
مظاہرین نے بینرز اور پلے کارڈز اٹھا رکھے تھے، جن پر انسانی حقوق، آزادی اظہار اور جمہوری اقدار کے حق میں نعرے درج تھے، شرکاء کا کہنا تھا کہ ایرانی حکومت اختلافِ رائے کو دبانے کے لئے طاقت کا بے دریغ استعمال کر رہی ہے، جو بین الاقوامی قوانین اور انسانی حقوق کی کھلی خلاف ورزی ہے۔
مظاہرین نے عالمی اداروں، اقوامِ متحدہ اور انسانی حقوق کی تنظیموں سے مطالبہ کیا کہ وہ ایران میں نوجوانوں کے خلاف تشدد کا نوٹس لیں اور ذمہ داروں کے خلاف کارروائی یقینی بنائیں۔
ماہرین کے مطابق بیرونِ ملک ایرانی باشندوں کے یہ مظاہرے عالمی رائے عامہ کو متحرک کرنے کی ایک منظم کوشش ہے، یورپی ممالک میں ہونے والے احتجاج ناصرف ایرانی حکومت پر اخلاقی دباؤ بڑھاتے ہیں بلکہ یورپی یونین کے پالیسی سازوں کو بھی ایران کے معاملے پر سخت مؤقف اختیار کرنے پر مجبور کر سکتے ہیں۔
ان کا مزید کہنا تھا کہ یونان جیسے ملک میں پارلیمنٹ کے سامنے احتجاج اس بات کی علامت ہے کہ مظاہرین براہِ راست سیاسی توجہ حاصل کرنا چاہتے ہیں، ایسے مظاہرے مستقبل میں ایران اور یورپی ممالک کے سفارتی تعلقات پر بھی اثر انداز ہو سکتے ہیں۔
