امریکا کا ایران کیخلاف فوجی کارروائیوں سمیت طاقتور آپشنز پر غور
واشنگٹن: (دنیا نیوز) امریکی صدر ڈونلڈ ٹرمپ نے دھمکی دیتے ہوئے کہا کہ ایران کے خلاف طاقتور آُپشنز پر غور کررہے ہیں، ایران کیخلاف آپشنزمیں فوجی کارروائی بھی شامل ہے، ایران ہماری ریڈ لائن کوعبورکر رہا ہے۔
امریکی صدر ڈونلڈ ٹرمپ نے کہا کہ ایران سے متعلق معاملے کو فوج دیکھ رہی ہے، گرین لینڈ کو ڈیل کر لینی چاہئے، گرین لینڈ کو حاصل کرنے کی بات کررہے ہیں، وینزویلا کی قیادت کے ساتھ اچھا کام ہو رہا ہے، اچھا نتیجہ نکلے گا، منگل یا بدھ کو وینزویلا کی رہنما ماریا کورینا سے ملاقات ہو گی۔
صدر ٹرمپ کا کہنا ہے کہ ایران میں ہم انٹرنیٹ شروع کرا سکتے ہیں، مسک سے بات کریں گے، ایران میں بڑھتی بدامنی سے متعلق متعدد آپشنز پر غور کررہے ہیں۔
واضح رہے کہ اس سے پہلے امریکی صدر ڈونلڈ ٹرمپ نے ایک بیان میں کہا تھا امریکا ایران کے عوام کی مدد کیلئے تیار ہے، سوشل میڈیا پلیٹ فارم ٹرتھ پر جاری بیان میں امریکی صدر ٹرمپ نے کہا تھا کہ ایران آزادی کی طرف دیکھ رہا ہے، جو پہلے کبھی نہیں ہوا، ہم ان کی مدد کرنے کیلئے تیار ہیں۔
گزشتہ روز بھی امریکی صدر نے اپنے ایک بیان میں کہا تھا کہ ایران میں اگر لوگوں کو قتل کیا گیا تو امریکا مداخلت کرے گا، تاہم اس حوالے سے انہوں نے یہ واضح کیا تھا کہ مداخلت کا مطلب ایران میں فوج اتارنا نہیں ہے۔
صدر ٹرمپ کا مزید کہنا تھا کہ ایران کی صورتِ حال پر نظر ہے، ایسا لگتا ہے کہ ایران کے کچھ شہروں پر لوگ قابض ہیں، ایرانی حکومت نے برسوں اپنے عوام کے ساتھ بُرا سلوک کیا اور آج انہیں اپنے کیے کی سزا مل رہی ہے۔
خیال رہے کہ ایران میں حالات مسلسل کشیدہ ہوتے جا رہے ہیں، امریکی جریدے ٹائم میگزین کے مطابق ایران میں مہنگائی کے خلاف جاری پرتشدد مظاہروں سے کئی شہروں میں توڑ پھوڑ ہوئی، مساجد اور ہسپتالوں کو نقصان پہنچا جبکہ 217 افراد جاں بحق ہوگئے۔
