روس کی طاقت اس کے تنوع میں ہے، تمام قومیں ایک خاندان ہیں: صدر پیوٹن
ماسکو: (شاہد گھمن) روسی صدر ولادیمیر پیوٹن نے کہا ہے کہ روس کی اصل طاقت اس کے کثیر الثقافتی اور متنوع معاشرے میں ہے، جہاں مختلف قومیں ایک خاندان کی طرح متحد ہیں۔
ماسکو میں منعقدہ تعلیمی فورم ’زنانئے.پروئے‘ کے موقع پر روس کے مقامی و چھوٹی قومیتوں کے نمائندوں سے ملاقات کے دوران صدر پوتن نے کہا کہ ملک میں 47 مقامی قومیں آباد ہیں، جن میں سے ہر ایک اپنی منفرد ثقافت، روایات اور شناخت کی حامل ہے۔
انہوں نے اس موقع پر پہلی مرتبہ منائے جانے والے مقامی و چھوٹی قوموں کے دن پر تمام شہریوں کو مبارکباد دیتے ہوئے کہا کہ بڑی اور چھوٹی تمام قومیں مل کر روسی معاشرے کو مضبوط بناتی ہیں۔
صدر پیوٹن کے مطابق روس کی تاریخ مختلف قوموں کے اتحاد سے تشکیل پائی ہے، جہاں ہمیشہ ثقافتی تنوع کا احترام کیا گیا اور مقامی روایات کو محفوظ رکھا گیا، ملک میں مختلف قوموں کی زبانوں اور ثقافتوں کے تحفظ کے لیے اقدامات کیے جا رہے ہیں، جبکہ درجنوں زبانوں کی تعلیم کے لیے خصوصی پروگرام بھی جاری ہیں۔
انہوں نے کہا کہ حکومت کی کوشش ہے کہ دور دراز علاقوں میں رہنے والے افراد کو جدید طبی، تعلیمی اور سماجی سہولیات فراہم کی جائیں، تاکہ وہ قومی ترقی میں بھرپور کردار ادا کر سکیں۔
انہوں نے اس بات پر زور دیا کہ ملک کی ترقی کے منصوبوں میں مقامی آبادی کے مفادات کو اولین ترجیح دی جائے گی، اور بڑے منصوبوں پر عملدرآمد عوامی مشاورت کے ساتھ کیا جائے گا۔
صدر پیوٹن نے کہا کہ مختلف ثقافتوں اور روایات کا امتزاج ہی روس کی مضبوط بنیاد ہے، جو نہ صرف قومی اتحاد کو فروغ دیتا ہے بلکہ مستقبل کی ترقی کے لیے بھی اہم کردار ادا کرتا ہے۔
انہوں نے کہا کہ روس کے عوام اپنی مقامی اور قومی شناخت کے ساتھ جڑے ہوئے ہیں اور مشکل حالات میں ہمیشہ متحد ہو کر اپنے وطن کا دفاع کرتے ہیں، اتحاد، باہمی احترام اور مشترکہ کوششیں ہی روس کی ترقی اور کامیابی کی ضمانت ہیں۔
