مقبوضہ مغربی کنارے میں اسرائیلی آبادکاروں کا فلسطینی خاندانوں کے گھروں کا محاصرہ
غزہ: (دنیا نیوز) مقبوضہ مغربی کنارے کے قصرا گاؤں میں غیرقانونی اسرائیلی آبادکاروں نے تین فلسطینی خاندانوں کے گھروں کا محاصرہ کرلیا، اس دوران سڑکیں بند کرکے پانی اور بجلی کی فراہمی بھی منقطع کردی گئی۔
اقوام متحدہ کے مطابق تقریباً 15 فلسطینی، جن میں دو بچے بھی شامل ہیں، بنیادی ضروریات، پانی اور بجلی سے محروم گھروں میں محصور ہیں، جبکہ گھروں پر پتھراؤ بھی کیا گیا۔
رپورٹ کے مطابق اسرائیلی فوج نے غیرقانونی آبادکاروں کو ہٹانے کے لیے کارروائی شروع کی اور دو غیرقانونی چوکیوں کو ختم کرکے ایک اسرائیلی کو حراست میں لینے کا دعویٰ کیا ہے۔
تاہم مقامی افراد کا کہنا ہے کہ غیرقانونی اسرائیلی آبادکار اب بھی قریبی علاقوں میں موجود ہیں۔
امریکی سفیر مائیک ہکابی نے آبادکاروں کے اقدام کی مذمت کرتے ہوئے اسے خوفناک اور ناقابلِ جواز قرار دیا۔ امریکی سفیر نے کہا کہ خاندانوں کو خوفزدہ اور ہراساں کرنے کے لیے دہشت گردی کا یہ ہولناک فعل انجام دینے والوں کے اقدامات گھناونے ہیں۔
Comments / رائے دیں
Share your thoughts. Comments are reviewed before they appear publicly.
Approved Comments