آج کا دن
اسپیشل فیچر
''سپوتنک دوئم‘‘ کا خلائی مشن
3 نومبر 1957ء سوویت یونین نے دوسرا مصنوعی سیارہ ''سپوتنک دوئم‘‘ کو خلا میں بھیجا جس میں لائیکا نامی ایک کتا بھی سوار تھا۔ روسی سائنسدانوں نے خلا میں بھیجنے کیلئے جانوروں میں سے کتے کا انتخاب کیاجو زمین کے گرد گردش کر نے والا پہلا جا نور بھی بن گیا۔ 14اکتوبر1957ء کو روس نے ''سپوتنک ون‘‘کو خلاء میں بھیجنے میں کامیابی حاصل کی تھی جس کے بعد خلاء میں کھوج کے سفر کا آغاز ہوا۔ ایک ماہ بعد لائیکا نا می کتے کو اسپوتنک دوم کے ذریعے خلاء میں بھیجا گیا۔ لائیکا کے صحیح سلامت واپس لوٹنے کی وجہ سے انسان کے خلاء میں جانے کے دروازے کھل گئے۔
''بیراج اتاترک اور ہائیڈرو الیکٹرک پاور اسٹیشن‘‘
3 نومبر 1983ء دنیا کے پانچویں بڑے ''بیراج اتاترک اور ہائیڈرو الیکٹرک پاور اسٹیشن‘‘ کا سنگ بنیاد رکھا گیا۔ جس کی تعمیر 11 سال میں مکمل ہوئی۔ بیراج اتاترک اور ہائیڈرو الیکٹرک پاور اسٹیشن ترکی کے جنوب مشرقی علاقے میں دریائے فرات پر قائم ایک عظیم منصوبہ ہے۔ اس کا نام مصطفیٰ کمال اتاترک کے نام پر رکھا گیا ہے، جو جدید ترکی کے بانی سمجھے جاتے ہیں۔ یہ ترکی کا سب سے بڑا اور دنیا کے بڑے ڈیمز میں سے ایک ہے۔اس کی لمبائی تقریباً 1820 میٹر ہے، جو اسے دنیا کے بڑے ڈیمز میں شمار کرتی ہے۔ اس کی بلندی 169 میٹر ہے، جو فرات کے پانی کو روک کر ایک وسیع جھیل کی صورت میں ذخیرہ کرتی ہے۔بیراج اتاترک کا ہائیڈرو الیکٹرک پاور اسٹیشن ترکی کے توانائی کے شعبے میں ایک اہم کردار ادا کرتا ہے۔ اس پاور اسٹیشن کی بجلی پیدا کرنے کی مجموعی گنجائش تقریباً 2400 میگاواٹ ہے، جو ترکی کے جنوبی علاقوں کی بجلی کی ضروریات کو پورا کرتی ہے۔
سالانگ سرنگ حادثہ
3 نومبر 1982 ہندو کش کوہساروں سے گزرتے ہوئے افغانستان کے جنوبی و شمالی علاقوں کو آپس میں ملانے والی سالانگ نامی سرنگ میں آگ بھڑک اٹھی، جس میں 2 ہزار افراد ہلاک ہو گئے۔سالانگ سرنگ وسطی ایشیا کے اہم راستوں میں سے ایک ہے جو افغانستان کے شمالی اور جنوبی حصوں کو جوڑتی ہے۔ یہ سرنگ 1960ء کی دہائی میں سوویت یونین کی مدد سے تعمیر کی گئی تھی اور تقریباً 3,878 میٹر (12,723 فٹ) کی بلندی پر واقع ہے۔ یہ دنیا کی بلند ترین سرنگوں میں سے ایک ہے اور سردیوں میں اکثر برف باری اور سخت موسمی حالات کی وجہ سے مشکلات کا شکار رہتی ہے۔ سالانگ سرنگ میں عام طور پر یہ حادثات تکنیکی مسائل کی وجہ سے ہوتے ہیں۔ سرنگ میں اکثر گاڑیوں کے تصادم یا سلپ ہونے کے باعث حادثات ہوتے ہیں، جن میں ایندھن کے رِسنے سے آگ لگنے کا خطرہ رہتا ہے۔
