Roznama Dunya: اسپیشل فیچرز :- حکایت سعدیؒ:روح کا روگ

حکایت سعدیؒ:روح کا روگ

16 February, 2026

تحریر :

ایک بادشاہ درویشوں کو حقارت بھری نظروں سے دیکھتا تھا۔ ایک نڈر درویش نے اس سے کہا:
''اے بادشاہ! تیرے پاس بے شک لشکر ہے۔ خزانہ ہے۔ اور تو ہم سے زیادہ اس دنیا میں عیش کرتا ہے اور خوش رہتا ہے۔ لیکن یاد رکھ، ہمارے پاس قناعت جیسی نعمت موجود ہے۔ بے شک ہم تجھ سے دنیاوی لحاظ سے کمتر ہیں لیکن روز محشر تم سے برتر ہوں گے۔ مرنے میں ہم سب برابر ہیں‘‘۔
درویش کی اس بات سے بادشاہ بہت شرمندہ ہوا اور آئندہ کبھی کسی بھی درویش کو حقارت بھری نظروں سے نہ دیکھا۔
حاصل کلام:روح کا روگ نفرت و حقارت ہوتا ہے۔ اس سے بچنا چاہیے۔ خدا کی نظر میں ساری مخلوق ایک سی ہے۔

روزنامہ دنیا ایپ انسٹال کریں

سمندروں کی نگرانی مصنوعی ذہانت کے سپرد

نئی ٹیکنالوجی''فی یو 1.0‘‘ سے موسمیاتی تبدیلی کی بروقت پیشگوئی ممکنمصنوعی ذہانت کے میدان میں چین نے ایک اور اہم سنگِ میل عبور کرتے ہوئے اسمارٹ سمندری پیش گوئی کیلئے ایک جدید اور انقلابی اے آئی ماڈل متعارف کرا دیا ہے۔ یہ پیش رفت نہ صرف سائنسی و تکنیکی دنیا میں غیر معمولی اہمیت رکھتی ہے بلکہ عالمی سطح پر ماحولیاتی تحفظ، سمندری وسائل کے بہتر استعمال اور قدرتی آفات سے بروقت بچاؤ کے امکانات کو بھی نئی جہت فراہم کرتی ہے۔ سمندر، جو زمین کے موسمی نظام میں مرکزی کردار ادا کرتے ہیں، اب جدید ڈیجیٹل ذہانت کی مدد سے زیادہ درست اور قابلِ اعتماد انداز میں سمجھے اور پیش گوئی کیے جا سکیں گے۔ یہ ماڈل موسمیاتی تبدیلی، سمندری طوفانوں، لہروں اور درجہ حرارت میں آنے والی تبدیلیوں کی پیشگی اطلاع دے کر انسانی جان و مال کے تحفظ میں اہم کردار ادا کرنے کی صلاحیت رکھتا ہے۔سائنس اور ٹیکنالوجی کے تیزی سے بدلتے ہوئے دور میں چین نے ایک اور نمایاں سنگِ میل عبور کر لیا ہے۔ سمندری تحقیق اور موسمی پیش گوئی کے شعبے میں ایک جدید اور انقلابی مصنوعی ذہانت ماڈل ''فی یو۔1.0‘‘ (Feiyu-1.0) کا باضابطہ اجرا جنوبی چین کے شہر گوانگژو میں کیا گیا، جسے ماہرین مستقبل کی سمندری پیش گوئی کا نیا رخ قرار دے رہے ہیں۔ یہ ماڈل نہ صرف جدید ٹیکنالوجی کی عکاسی کرتا ہے بلکہ ماحولیاتی تحفظ، قدرتی آفات سے نمٹنے اور سمندری وسائل کے مؤثر استعمال کے حوالے سے بھی غیر معمولی اہمیت کا حامل ہے۔''فی یو۔1.0‘‘ دراصل ایک دو طرفہ مربوط ہواو سمندر (Air-Sea Coupled) مصنوعی ذہانت ماڈل ہے، جسے خصوصی طور پر بحیرہ جنوبی چین کی جغرافیائی، موسمی اور سمندری خصوصیات کو مدنظر رکھتے ہوئے تیار کیا گیا ہے۔ اس ماڈل کی تیاری میں چائنیز اکیڈمی آف سائنسز کے تحت کام کرنے والے ساؤتھ چائنا سی انسٹی ٹیوٹ آف اوشیانولوجی اور چائنا یونیورسٹی آف پیٹرولیم (ایسٹ چائنا) نے مشترکہ طور پر تحقیق اور جدت کا مظاہرہ کیا ہے۔ماہرین کے مطابق، روایتی سمندری پیش گوئی کے ماڈلز عموماً پیچیدہ ڈیٹا، محدود رفتار اور کم درستگی جیسے مسائل کا شکار رہے ہیں، تاہم ''فی یو۔1.0‘‘ ان تمام کمزوریوں پر قابو پانے کی ایک کامیاب کوشش ہے۔ اس ماڈل میں جدید مصنوعی ذہانت الگورتھمز کو استعمال کرتے ہوئے سمندر اور فضا کے باہمی تعلق کو بیک وقت سمجھنے اور پیش گوئی کرنے کی صلاحیت پیدا کی گئی ہے، جو اسے دیگر ماڈلز سے ممتاز بناتی ہے۔''فی یو۔1.0‘‘ کی سب سے نمایاں خصوصیت اس کی یہ صلاحیت ہے کہ یہ سمندر کی سطح کے درجہ حرارت، پانی میں نمکیات، سمندری دھاراؤں اور بڑے پیمانے پر سمندری گردش کو نہایت درست انداز میں ظاہر کر سکتا ہے۔ یہی عوامل سمندری موسم، طوفانوں اور ماحولیاتی نظام پر گہرے اثرات مرتب کرتے ہیں۔ ماہرین کا کہنا ہے کہ اس ماڈل کی پیش گوئیاں نہ صرف زیادہ درست ہیں بلکہ پہلے کے مقابلے میں کہیں زیادہ تیز رفتاری سے دستیاب ہو سکتی ہیں۔اس جدید اے آئی ماڈل کے استعمال کے امکانات انتہائی وسیع ہیں۔ موسمیات کے شعبے میں فی یو۔1.0 طوفانوں، سمندری آندھیوں اور شدید موسمی تبدیلیوں کی بروقت پیش گوئی کر کے قدرتی آفات سے بچاؤ کے اقدامات کو مؤثر بنا سکتا ہے۔ اس کے ذریعے ساحلی علاقوں میں رہنے والے افراد کو پیشگی خبردار کیا جا سکتا ہے، جس سے انسانی جانوں اور املاک کے نقصان کو کم کرنے میں مدد ملے گی۔ماہی گیری کے شعبے میں بھی یہ ماڈل ایک نعمت ثابت ہو سکتا ہے۔ ''فی یو۔1.0‘‘ ماہی گیروں کو محفوظ سمندری حالات کے بارے میں درست معلومات فراہم کر کے ان کی روزی روٹی کے تحفظ کے ساتھ ساتھ سمندری حادثات کے خطرات کو کم کرنے میں اہم کردار ادا کرے گا۔ اسی طرح بحری جہاز رانی اور سمندری تجارت کیلئے بھی یہ ماڈل راستوں کی حفاظت اور موسمی خطرات سے بچاؤ میں مددگار ثابت ہو سکتا ہے۔ماحولیاتی تحفظ کے حوالے سے ''فی یو۔1.0‘‘ کی اہمیت اور بھی بڑھ جاتی ہے۔ یہ ماڈل پانی کے درجہ حرارت اور نمکیات جیسے عوامل کی نقل (Simulation) کر کے مرجانی چٹانوں (Coral Reefs) اور ماحولیاتی نظاموں پر پڑنے والے اثرات کا اندازہ لگا سکتا ہے۔ اس کے ذریعے بروقت انتباہات جاری کر کے ان قیمتی قدرتی وسائل کے تحفظ کیلئے عملی اقدامات ممکن ہو سکیں گے، جو موسمیاتی تبدیلی کے باعث شدید خطرات سے دوچار ہیں۔''فی یو۔ 1.0‘‘ کی ایک اور منفرد خصوصیت یہ ہے کہ یہ متحرک سمندری علمی نقشے (Dynamic Ocean Knowledge Graphs) تیار کرنے کی صلاحیت رکھتا ہے۔ یہ نقشے نہ صرف ماہرین اور محققین کیلئے مفید ہیں بلکہ عام لوگوں کو بھی سمندروں کے پیچیدہ نظام کو آسان انداز میں سمجھنے میں مدد فراہم کرتے ہیں۔ اس طرح یہ ماڈل سائنسی تحقیق کے ساتھ ساتھ عوامی آگاہی کے فروغ میں بھی اہم کردار ادا کرے گا۔افتتاحی تقریب کے موقع پر موجود ماہرین اور سائنس دانوں نے اس بات پر زور دیا کہ ''فی یو۔1.0‘‘ محض ایک تکنیکی ایجاد نہیں بلکہ ذہین سمندری پیش گوئی کا ایک نیا تصور ہے۔ ان کے مطابق یہ ماڈل مستقبل میں عالمی سطح پر سمندری تحقیق، موسمیاتی مطالعات اور ماحولیاتی تحفظ کیلئے ایک مضبوط بنیاد فراہم کر سکتا ہے، جس سے بین الاقوامی تعاون کے نئے دروازے کھلیں گے۔یہ حقیقت بھی قابلِ غور ہے کہ دنیا اس وقت موسمیاتی تبدیلی، سمندری آلودگی اور قدرتی آفات جیسے سنگین مسائل کا سامنا کر رہی ہے۔ ایسے میں ''فی یو۔1.0‘‘ جیسے جدید اے آئی ماڈلز نہ صرف سائنسی ترقی کی علامت ہیں بلکہ انسانیت کیلئے ایک امید کی کرن بھی ثابت ہو سکتے ہیں۔ چین کی یہ پیش رفت اس بات کا واضح ثبوت ہے کہ جدید ٹیکنالوجی کو اگر درست سمت میں استعمال کیا جائے تو قدرتی نظام کو سمجھنے اور محفوظ بنانے میں انقلابی کردار ادا کیا جا سکتا ہے۔ بلاشبہ ''فی یو۔1.0‘‘ سمندری سائنس اور مصنوعی ذہانت کے امتزاج کی ایک شاندار مثال ہے، جو مستقبل میں نہ صرف چین بلکہ پوری دنیا کے لیے سمندروں کے بہتر، محفوظ اور پائیدار استعمال کی راہ ہموار کر سکتی ہے۔

ماؤنٹ رش مور

چار صدور، ایک پہاڑ ، قومی وحدت کی داستاندنیا میں کچھ یادگاریں ایسی ہوتی ہیں جو محض پتھر یا اینٹوں کا مجموعہ نہیں ہوتیں بلکہ پوری قوم کی تاریخ، نظریات اور جدوجہد کی علامت بن جاتی ہیں۔ امریکہ کی ریاست ساؤتھ ڈکوٹا کی بلیک ہلز پہاڑیوں میں واقع ماؤنٹ رش مور بھی ایسی ہی ایک عظیم الشان یادگار ہے، جہاں پہاڑ کی بلند و بالا چٹانوں پر چار امریکی صدور کے چہرے تراش کر انہیں ابدی دوام بخشا گیا ہے۔ یہ سنگی شاہکار نہ صرف فن تعمیر اور مجسمہ سازی کا نادر نمونہ ہے بلکہ امریکی قومی تشخص، جمہوری اقدار اور تاریخی ارتقا کی بھرپور عکاسی بھی کرتا ہے۔امریکہ کی ریاست ساؤتھ ڈکوٹا کی بلیک ہلز پہاڑیوں میں واقع ماؤنٹ رش مور دنیا کے مشہور ترین قومی یادگاروں میں شمار ہوتا ہے۔یہ مشہور قومی یادگار پہاڑ کی گرینائٹ چٹان کو تراش کر بنائی گئی ہے۔ جس پر چار ممتاز صدورجارج واشنگٹن (George Washington)، تھومس جیفرسن (Thomas Jefferson)، تھیوڈور روز ویلٹ(Theodore Roosevelt) اور ابراہم لنکن(Abraham Lincoln) کے 60 فٹ (18 میٹر) بلند سروں کی نقش گری کی گئی ہے۔ ان صدور کا انتخاب بالترتیب قوم کی بنیاد، توسیع، ترقی اور تحفظ کی نمائندگی کے طور پر کیا گیا۔یہ عظیم الشان سنگی مجسمے نہ صرف امریکہ کی سیاسی تاریخ کی نمائندگی کرتے ہیں بلکہ قومی وحدت، جمہوریت اور آزادی کی علامت بھی سمجھے جاتے ہیں۔ماؤنٹ رش مور ہر سال دو ملین (20 لاکھ) سے زائد سیاحوں کو اپنی طرف متوجہ کرتا ہے۔ یادگاری پارک کا رقبہ 1,278 ایکڑ (تقریباً 2 مربع میل) پر محیط ہے، جبکہ پہاڑ کی بلندی سطح سمندر سے 5725 فٹ (1745 میٹر) ہے۔بورگلم (Borglum)نے ماؤنٹ رش مور کا انتخاب جزوی طور پر اس لیے کیا کیونکہ یہ جنوب مشرق کی سمت رخ کیے ہوئے ہے، جس سے زیادہ سے زیادہ دھوپ حاصل ہوتی ہے۔ اس یادگار کا خیال ساؤتھ ڈکوٹا کے ریاستی مورخ ڈوان رابنسن نے پیش کیا تھا۔ ابتدا میں رابنسن چاہتے تھے کہ اس مجسمے میں امریکی مغرب کے ہیروز جیسے لیوس(Lewis) اور کلارک(Clark)، ان کی رہنما ساکاگاویہ (Sacagawea)، ریڈ کلاؤڈ( Red Cloud)، بفیلو بل کوڈی (Buffalo Bill Cody)اور کریزی ہارس(Crazy Horse) کو شامل کیا جائے۔ تاہم بورگلم نے مؤقف اختیار کیا کہ یہ یادگار علاقائی کے بجائے قومی سطح کی ہونی چاہیے اور یوں چار صدور کا انتخاب کیا گیا۔ساؤتھ ڈکوٹا سے تعلق رکھنے والے امریکی سینیٹر پیٹر نوربیک نے اس منصوبے کی سرپرستی کی اور وفاقی فنڈنگ حاصل کی۔ تعمیراتی کام 1927ء میں شروع ہوا اور صدور کے چہرے 1934ء سے 1939ء کے درمیان مکمل کیے گئے۔ مارچ 1941ء میں بورگلم کے انتقال کے بعد ان کے بیٹے لنکن نے تعمیراتی منصوبے کی قیادت سنبھالی۔ ابتدا میں ہر صدر کو سر سے کمر تک دکھانے کا ارادہ تھا، مگر فنڈز کی کمی کے باعث 31 اکتوبر 1941ء کو تعمیر روک دی گئی، اور صرف جارج واشنگٹن کے مجسمے میں ٹھوڑی سے نیچے کچھ تفصیل موجود ہے۔ماؤنٹ رش مور کی یہ یادگار اس زمین پر تعمیر کی گئی جو 1870ء کی دہائی میں سیوکس قوم ( Sioux Nation) سے لے لی گئی تھی۔ سیوکس آج بھی اس زمین کی واپسی کا مطالبہ کرتے ہیں۔ 1980ء میں امریکی سپریم کورٹ نے'' United States v. Sioux Nation of Indians‘‘ مقدمے میں فیصلہ دیا کہ بلیک ہلز کا قبضہ غیر منصفانہ تھا اور بطور معاوضہ 102 ملین ڈالر دینے کا حکم دیا۔ تاہم سیوکس قوم نے رقم لینے سے انکار کرتے ہوئے زمین کی واپسی کا مطالبہ برقرار رکھا ہے۔ یہی تنازع آج بھی جاری ہے، جس کے باعث بعض ناقدین اس یادگار کو ‘‘منافقت کا مزار'' بھی قرار دیتے ہیں۔مجموعی طور پر ماؤنٹ رش مور ایک ایسا فن پارہ ہے جو سنگِ گراں میں تراشی گئی تاریخ کی کتاب کی مانند ہے۔ یہ یادگار آنے والی نسلوں کو ماضی کی جدوجہد، قیادت اور قومی تعمیر کے اسباق یاد دلاتی رہے گی۔

کامیابی کی دوڑ اور بڑھتا ہوا حسد

انسانی معاشرہ بظاہر ترقی، خوشحالی اور باہمی تعاون کی بنیاد پر قائم دکھائی دیتا ہے، لیکن اس کے باطن میں بعض منفی جذبات بھی پائے جاتے ہیں جو فرد اور سماج دونوں کیلئے نقصان دہ ثابت ہوتے ہیں۔ انہی میں سے ایک خطرناک جذبہ حسد ہے، جو دل کی گہرائیوں میں جنم لے کر رفتہ رفتہ انسان کے سکون، تعلقات اور اخلاقی قدروں کو کھوکھلا کر دیتا ہے۔ حسد وہ کیفیت ہے جس میں انسان دوسروں کی نعمت، کامیابی یا خوش حالی کو دیکھ کر دل میں تنگی محسوس کرتا اور اس کے زوال کی تمنا کرنے لگتا ہے۔حسد دراصل وہ کیفیت ہے جس میں انسان دوسروں کی کامیابی یا خوش حالی دیکھ کر دل میں تنگی محسوس کرتا ہے اور چاہتا ہے کہ وہ نعمت اس سے چھن جائے۔ یہ جذبہ بظاہر معمولی دکھائی دیتا ہے، مگر اس کے اثرات نہایت گہرے اور تباہ کن ہوتے ہیں۔ جب معاشرے میں کامیابی کا معیار صرف دولت، شہرت اور ظاہری چمک دمک بن جائے تو لوگ اپنی ذات کا موازنہ دوسروں سے کرنے لگتے ہیں۔ یہی تقابل رفتہ رفتہ احساسِ کمتری اور پھر حسد میں تبدیل ہو جاتا ہے۔سوشل میڈیا نے اس رجحان کو مزید ہوا دی ہے۔ لوگ اپنی زندگی کے بہترین لمحات، کامیابیاں اور آسائشیں نمایاں انداز میں پیش کرتے ہیں، جبکہ مشکلات اور ناکامیاں پس منظر میں رہتی ہیں۔ نتیجتاً دیکھنے والا اپنی عام سی زندگی کو کمتر سمجھنے لگتا ہے۔ وہ یہ بھول جاتا ہے کہ ہر انسان کا سفر مختلف ہے اور ہر کامیابی کے پیچھے ایک طویل جدوجہد پوشیدہ ہوتی ہے۔ جب یہ شعور کمزور پڑتا ہے تو دل میں حسد کے بیج اگنے لگتے ہیں۔حسد نہ صرف دوسروں کیلئے نقصان دہ ہے بلکہ حسد کرنے والے کیلئے بھی ایک اندرونی عذاب ہے۔ یہ دل کا سکون چھین لیتا ہے، ذہنی دباؤ میں اضافہ کرتا ہے اور انسان کو مسلسل بے چینی میں مبتلا رکھتا ہے۔ حسد کرنے والا کبھی مطمئن نہیں رہتا، کیونکہ اسے ہر جگہ کوئی نہ کوئی خود سے آگے نظر آتا ہے۔ یوں وہ اپنی صلاحیتوں کو مثبت انداز میں استعمال کرنے کے بجائے منفی خیالات میں الجھا رہتا ہے۔سوال یہ ہے کہ اس بڑھتے ہوئے حسد کا علاج کیا ہے؟ سب سے پہلے ہمیں کامیابی کے مفہوم کو درست کرنا ہوگا۔ کامیابی صرف دولت یا شہرت کا نام نہیں، بلکہ کردار کی بلندی، اطمینانِ قلب اور معاشرے کیلئے مفید ہونا بھی کامیابی ہے۔ جب ہم اپنی توجہ دوسروں سے ہٹا کر اپنی ذات کی بہتری پر مرکوز کریں گے تو حسد کی گنجائش کم ہو جائے گی۔شکر گزاری بھی حسد کا مؤثر علاج ہے۔ جو شخص اپنی نعمتوں پر غور کرتا اور ان پر شکر ادا کرتا ہے، وہ دوسروں کی نعمتوں کو دیکھ کر جلنے کے بجائے ان کے لیے خوش ہونے کی کوشش کرتا ہے۔ اسی طرح مثبت سوچ، خود اعتمادی اور محنت پر یقین انسان کو اندر سے مضبوط بناتے ہیں۔ جب انسان یہ سمجھ لیتا ہے کہ ہر کسی کا نصیب اور وقت مختلف ہے تو وہ تقابل کے جال سے نکل آتا ہے۔والدین اور اساتذہ کی ذمہ داری بھی اہم ہے کہ وہ بچوں کو صرف اوّل آنے یا دوسروں سے آگے بڑھنے کی تعلیم نہ دیں، بلکہ اخلاق، برداشت اور دوسروں کی کامیابی پر خوش ہونے کا درس بھی دیں۔ اگر معاشرے میں تعاون اور ہمدردی کی فضا قائم ہو تو کامیابی کی دوڑ صحت مند مقابلے میں بدل سکتی ہے۔

کرکٹ!

مرزا کو کرکٹ سے کتنی دلچسپی اور اس کی باریکیوں سے کس حد تک واقفیت ہے، ہمیں اس کا تھوڑابہت اندازہ پانچ سال قبل ہوا۔ ٹسٹ کا چوتھا دن تھا اور ایک سلو بولر بولنگ کر رہا تھا۔ اس کی کلائی ایک ادنیٰ اشارے، انگلیوں کی ایک خفیف سی حرکت پر گیند ناچ ناچ اٹھتی اور تماشائی ہر گیند پر کرسیوں سے اٹھ اٹھ کر داد دیتے اور داد دے کر باری باری ایک دوسرے کی گود میں بیٹھ جاتے۔ ہمارے پاس ہی ایک میم کے پیچھے کرسی پر آلتی پالتی مارے بیٹھا، بوڑھا پارسی تک، اپنے پوپلے منہ سے سیٹی بجا بجا کر بولر کا دل بڑھا رہا تھا۔ ادھر اسٹیڈیم کے باہر درختوں کی پھننگوں سے لٹکے ہوئے شائقین ہاتھ چھوڑ چھوڑ کر تالیاں بجاتے اور کپڑے جھاڑ کر پھر درختوں پر چڑھ جاتے تھے۔ ہر شخص کی نظریں گیند پر گڑی ہوئی تھیں۔ ایک بارگی بڑے زور سے تالیاں بجنے لگیں۔''ہائے! بڑے غضب کی گگلی ہے!‘‘ ہم نے جوش سے مرزا کا ہاتھ دبا کر کہا۔''نہیں یار! مدراسن ہے!‘‘ مرزا نے دانت بھینچ کر جواب دیا۔ہم نے پلٹ کر دیکھا تو مرزا ہی کی رائے صحیح نکلی، بلکہ بہت خوب نکلی۔ان کی دلچسپی کا اندازہ اس اہتمام سے بھی ہوتا ہے جو پچھلے تین برس سے ان کے معمولات میں داخل ہو چکا ہے۔ اب وہ بڑے چائو سے لدے پھندے ٹسٹ میچ دیکھنے جاتے ہیں۔ ڈیڑھ دو سیر بھنی مونگ پھلی، بیٹری کا ریڈیو اور تھرماس! (اس زمانے میں ٹرانزسٹر عام نہیں ہوئے تھے) یہاں ہم نے ناشتے دان، سگریٹ، دھوپ کی عینک اور اسپرو کی ٹکیوں کا ذکر اس لئے نہیں کیا کہ یہ تو ان لوازمات میں سے ہیں جن کے بغیر کوئی دور اندیش آدمی کھیل دیکھنے کاقصد نہیں کرتا۔ یوں تو تازہ اخبار بھی ساتھ ہوتا ہے مگر وہ اس سے چھتری کا کام لیتے ہیں۔ خود نہیں پڑھتے البتہ پیچھے بیٹھنے والے بار بار صفحہ الٹنے کی درخواست کرتے رہتے ہیں۔ دن بھر ریڈیو سے چمٹے کمنٹری سنتے رہتے ہیں بلکہ ہمارا خیال ہے کہ انہیں کمنٹری سننے سے زیادہ سنانے میں لطف آتا ہے۔ البتہ کمنٹری آنا بند ہو جائے تو کھیل بھی دیکھ لیتے ہیں۔ یا پھر اس وقت سر اٹھاکر فیلڈ کی طرف دیکھتے ہیں جب ریڈیو پر تالیوں کی آواز سے کانوں کے پردے پھٹنے لگیں۔ میچ کسی اور شہر میں ہورہا ہو تو گھر بیٹھے کمنٹری کے جوشیلے حصوں کوٹیپ پر ریکارڈ کرلیتے ہیں اور آئندہ ٹسٹ تک اسے سنا سنا کر اپنا اور دوسرے مسلمان بھائیوں کاخون کھولاتے رہتے ہیں۔جاہلوں کا ذکرنہیں، بڑے بڑوں کوہم نے اس خوش فہمی میں مبتلا دیکھا کہ زیادہ نہ کم پورے بائیس کھلاڑی کرکٹ کھیلتے ہیں۔ ہم قواعد و ضوابط سے واقف نہیں لیکن جو کچھ اپنی آنکھوں سے دیکھا، اسی کی قسم کھاکر عرض کرتے ہیں کہ در حقیقت کرکٹ صرف ایک ہی شخص کھیلتا ہے۔ مگر اس کھیل میں یہ وصف ہے کہ بقیہ اکیس حضرات سارے سارے دن اس مغالطے میں مگن رہتے ہیں کہ وہ بھی کھیل رہے ہیں۔ حالانکہ ہوتا یہ ہے کہ یہ حضرات شام تک سارس کی طرح کھڑے کھڑے تھک جاتے ہیں اور گھر پہنچ کر اس تکان کو تندرستی سمجھ کر پڑ رہتے ہیں۔مرزا کہتے ہیں (ناممکن ہے کرکٹ کا ذکر ہواور بار بارمرزا کی دہائی نہ دینی پڑے) کہ کھیل، علی الخصوص کرکٹ، سے طبیعت میں ہار جیت سے بے نیازی کا جذبہ پید ا ہوتا ہے۔ اب انہیں کون سمجھائے کہ جیتنے کیلئے واقعی کاوش و مزادلت درکار ہے۔ لیکن ہارنے کیلئے مشق و مہارت کی چنداں ضرورت نہیں کہ یہ مشکل مخالف ٹیم بالعموم خود آسان کر دیتی ہے۔اچھے اسکولوں میں شروع ہی سے تربیت دی جاتی ہے کہ جس طرح مرغابی پر پانی کی بوند نہیں ٹھیرتی، اسی طرح اچھے کھلاڑی پر ناکامی کا کوئی اثر نہیں ہونا چاہئے۔ ہم نے دیکھا ہے کہ بعض کمزور طبیعتیں اس نصیحت کا اس قدر اثر لیتی ہیں کہ ہر قسم کے نتائج سے بے پروا ہو جاتی ہیں۔لیکن اگر ہم کھلے خزانے یہ اعتراف کر لیں کہ ہمیں جیت سے رنج اور ہار سے خوشی نہیں ہوتی تو کون سی عیب کی بات ہے؟ انگلستان کا بادشاہ ولیم فاتح اس سلسلہ میں کمال کی بے ساختگی و صاف دلی کی ایک مردہ مثال قائم کر گیا ہے جو آج بھی بعضوں کے نزدیک لائق توجہ وتقلید ہے۔ ہوا یہ کہ ایک دفعہ جب وہ شطرنج کی بازی ہار گیا تو آؤ دیکھا نہ تاؤ جھٹ چوبی بساط جیتنے والے کے سر پر دے ماری، جس سے اس گستاخ کی موت واقع ہو گئی۔ مورخین اس باب میں خاموش ہیں، مگر قیاس کہتا ہے کہ درباریوں نے یوں بات بنائی ہوگی، ''سرکار! یہ تو بہت ہی کم ظرف نکلا۔ جیت کی ذرا تاب نہ لا سکا۔ شادی مرگ ہو گیا‘‘۔یہی قصہ ایک دن نمک مرچ لگا کرہم نے مرزا کوسنایا۔ بگڑ گئے، کہنے لگے، ''آپ بڑافلسفہ چھانٹتے ہیں مگر یہ ایک فلسفی ہی کا قول ہے کہ کوئی قوم سیاسی عظمت کی حامل نہیں ہو سکتی جب تک کہ اس نے کسی نہ کسی عہد میں اپنے کھیل کا لوہا نہ منوایا ہو‘‘۔ہم نے چھیڑا، ''مگر قومیں پٹ پٹ کرہی ہیکڑ ہوتی ہیں‘‘۔قوموں کو جہاں کا تہاں چھوڑ کر ذاتیات پر اتر ائے، جس شخص نے عمر بھراپنے دامن صحت کو ہرقسم کی کسرت اور کھیل سے بچائے رکھا، وہ غریب کھیل کی اسپرٹ کو کیا جانے،میں جانتا ہوں، تم جیسے تھڑو لے محض ہار کے ڈر سے نہیں کھیلتے۔ ایسا ہی ہے تو پرسوں صبح بغدادی جمخانہ آجائو، پھر تمہیں دکھائیں کرکٹ کیا ہوتا ہے‘‘۔

آج کا دن

کیوٹو پروٹوکول کا نفاذ2005ء میں آج کے روز ماحولیاتی تحفظ سے متعلق عالمی معاہدہ کیوٹو پروٹوکول باضابطہ طور پر نافذ العمل ہوا، جس کی اہم وجہ روس کی جانب سے اس کی توثیق تھی۔ اس معاہدے کا بنیادی مقصد صنعتی ممالک کو گرین ہاؤس گیسوں کے اخراج میں کمی کا پابند بنانا تھا تاکہ عالمی حدت (گلوبل وارمنگ) اور موسمیاتی تبدیلی کے بڑھتے ہوئے خطرات کو روکا جا سکے۔ کیوٹو پروٹوکول کے تحت کاربن ڈائی آکسائیڈ سمیت دیگر مضر گیسوں کے اخراج کیلئے مخصوص اہداف مقرر کیے گئے۔ انقلاب کیوبا اور فیدل کاسترو 16فروری 1959ء کو فیدل کاسترو انقلاب کیوبا کے نتیجے میں ملک کا صدر بنا۔ انہوں نے آتے ہی ملک میں بڑھتی قیمتوں اور کرائیوں میں کمی لانے کا فیصلہ کیا اور اراضیاں سرکاری تحویل میں لے کر کسانوں میں تقسیم کر دیں۔1962ء میں کاسترو نے ممکنہ امریکی جارحیت کیخلاف سوویت یونین کو ملک میں میزائل نصب کرنے کی اجازت دی۔2008ء میں اپنے منصب سے علیحدہ ہوئے ۔فرعون توتن خامون 16فروری1923ء میں مشہور برطانوی ماہر آثارِ قدیمہ ہاورڈ کارٹر نے مصر کی وادیٔ ملوک میں واقع قدیم مصری فرعون توتن خامون کے مقبرے کے سب سے اہم حصے، یعنی تدفینی حجرے کی مہر کو کھولا۔ حجرے میں فرعون کا سونے سے بنا تابوت، قیمتی زیورات، مذہبی علامات اور روزمرہ استعمال کی اشیاء موجود تھیں، جو قدیم مصری تہذیب، ان کے عقائد، فن تعمیر کو سمجھنے میں بے حد مددگار ثابت ہوئیں۔ ترکی: ہوا بازی کی صنعت کا قیام1925ء میں آج کے دن ترکی میں ہوا بازی کی صنعت کا قیام عمل میں لایا گیا۔ ہر قسم کی ہوا بازی کے فروغ کیلئے مصطفی کمال اتاترک کی ہدایت پر ''ترک جمعیت برائے طیارہ سازی‘‘ قائم کی گئی۔ جسے 1935ء میں تبدیل کر کے ''ادارہ برائے ترک ہوا بازی‘‘ کا نام دیا گیا۔ انجینئر صلاح الدین رشید نے پہلی بار طیارے کے تمام پرزہ جات مقامی طور پر تیار کرنے میں بھی کامیابی حاصل کی۔ امریکہ کا ٹوکیو پر حملہ 1945ء میں آج کے روز جنگ عظیم دوئم کے دوران امریکہ نے ٹوکیو پر فضائی حملہ کیا۔ اس جنگ کا باقاعدہ آغاز یکم ستمبر 1939ء کو ہوا، جب پولینڈ پر جرمنی حملہ آور ہوا اور برطانیہ نے جرمنی کے خلاف اعلان جنگ کر دیا۔ اس جنگ میں 61ممالک نے حصہ لیا۔ دو شہروں پر ایٹمی حملہ کے بعد 14 اگست کو جاپان نے ہتھیار ڈال دیے جس کے بعد 1945ء میں اس جنگ کا خاتمہ ہوا۔ مصر میں بادشاہت کا قیام 16 فروری 1923 کو مصر کا پہلا آئین نافذ کیا گیا، جس نے بادشاہ فؤاد اول کی قیادت میں ایک آئینی بادشاہت کی بنیاد رکھی۔28 فروری 1922ء کو برطانیہ نے مصر کو آزاد مملکت تسلیم کرتے ہوئے آزاد کر دیا تھا۔مصر 1882ء سے برطانوی قبضے میں تھا، حالانکہ رسمی طور پر یہ سلطنت عثمانیہ کا حصہ تھا۔مصر کو جزوی آزادی ملی تھی کیونکہ برطانیہ نے سوئز کینال، دفاع، اقلیتوں کے حقوق اور سوڈان پر کنٹرول برقرار رکھاتھا۔

روبوٹ پولیس افسر

مصنوعی ذہانت میں اہم پیشرفتٹیکنالوجی کی برق رفتار ترقی نے جہاں انسانی زندگی کے تقریباً ہر شعبے کو بدل کر رکھ دیا ہے، وہیں اب قانون نافذ کرنے والے اداروں کے طریقہ کار میں بھی ایک بڑی تبدیلی کی پیش گوئی کی جا رہی ہے۔ ماہرین کے مطابق آئندہ چند برسوں میں روبوٹ پولیس افسر حقیقت کا روپ دھار سکتے ہیں اور 2031ء تک دنیا کے کئی شہروں کی سڑکوں پر گشت کرتے دکھائی دے سکتے ہیں۔ یوں سائنس فکشن فلموں کا تصوراتی کردار''روبو کوپ‘‘ اب محض کہانی نہیں رہے گا بلکہ عملی دنیا میں ایک نئی شکل اختیار کر سکتا ہے۔ماہرین کا کہنا ہے کہ مصنوعی ذہانت، چہرہ شناسی ٹیکنالوجی، خودکار نگرانی کے نظام اور ڈیٹا اینالیٹکس میں تیز رفتار پیش رفت نے اس خیال کو قابلِ عمل بنا دیا ہے۔ جدید روبوٹ نہ صرف مشکوک سرگرمیوں کی نشاندہی کر سکیں گے بلکہ ہجوم کو کنٹرول کرنے، ٹریفک کی نگرانی کرنے اور ہنگامی حالات میں فوری ردعمل دینے کی صلاحیت بھی رکھتے ہوں گے۔ ان میں نصب کیمرے اور سینسر لمحہ بہ لمحہ معلومات مرکزی کنٹرول روم تک پہنچائیں گے، جس سے جرائم کی روک تھام میں مدد مل سکتی ہے۔تاہم اس ممکنہ پیش رفت کے ساتھ کئی سوالات بھی جنم لے رہے ہیں۔ کیا روبوٹ انسانی حساسیت اور فیصلہ سازی کی جگہ لے سکیں گے؟ کیا عوام انہیں قبول کریں گے؟ اور سب سے اہم، شہری آزادیوں اور پرائیویسی کا تحفظ کس طرح یقینی بنایا جائے گا؟ بلاشبہ، روبوٹ پولیس کا تصور جہاں جدیدیت کی علامت ہے، وہیں اس کے سماجی اور اخلاقی پہلوؤں پر سنجیدہ بحث بھی ناگزیر ہے۔ایک ماہر نے پیش گوئی کی ہے کہ آئندہ صرف پانچ برسوں میں روبوٹ پولیس افسر ہماری سڑکوں پر گشت کرتے نظر آئیں گے۔ یونیورسٹی آف ڈیلاویئر سے تعلق رکھنے والے پروفیسر آئیون سن کے مطابق حقیقی زندگی کے یہ ''روبو کوپس‘‘ مشتبہ افراد کی نشاندہی کرنے، ان کا تعاقب کرنے اور انہیں گرفتار کرنے کی صلاحیت رکھتے ہوں گے۔ انہوں نے وضاحت کی کہ دنیا بھر کی پولیس فورسز بڑھتے ہوئے جرائم، منظم جرائم پیشہ نیٹ ورکس اور افرادی قوت کی کمی جیسے مسائل سے پہلے ہی نبرد آزما ہیں۔چین میں انسانی شکل کے روبوٹس پہلے ہی استعمال ہو رہے ہیں، اور پروفیسر سن کا خیال ہے کہ جلد ہی دیگر ممالک بھی اس رجحان کو اپنالیں گے۔ان کی پیش گوئی ہے کہ 2031ء تک روبوٹ پولیس افسر چہرہ شناسی ٹیکنالوجی کے ذریعے مجرموں کی شناخت کرنے، ان کا پیچھا کرنے اور انہیں حراست میں لینے کے قابل ہو جائیں گے۔اگرچہ ممکن ہے کہ انہیں ایک انسانی ساتھی کی ضرورت ہو، تاہم خطرناک حالات میں وہ انتہائی مفید ثابت ہو سکتے ہیں۔انہوں نے کہا کہ امکانات کی کوئی حد نہیں۔ مثال کے طور پر اگر ڈکیتی ہو جائے تو وہ موقع پر مکمل کنٹرول سنبھال سکتے ہیں۔وہ پانچ میل تک تعاقب کر سکتے ہیں اور تھکن محسوس نہیں کریں گے۔ اسی دوران وہ مشتبہ شخص کی حیاتیاتی معلومات اور خصوصیات کو اسکین بھی کر سکتے ہیں۔ ان کی مصنوعی ذہانت 200 میٹر کے فاصلے سے یہ معلوم کر سکتی ہے کہ مشتبہ شخص کے پاس ہتھیار ہے یا نہیں، جو ایک انسانی افسر کیلئے ممکن نہیں۔اگرچہ روبوٹ پولیس افسران کی تعیناتی سے واضح قانونی اور اخلاقی سوالات جنم لیتے ہیں، تاہم پروفیسر آئیون سن کا ماننا ہے کہ ان کا نفاذ ناگزیر ہے۔انہوں نے کہا کہ طاقت کے استعمال یا تیز رفتار تعاقب جیسے اقدامات اب محض تصور نہیں رہے، یہ حقیقت بننے جا رہے ہیں۔ماہرین کے مطابق مستقبل میں انسانی پولیس اہلکاروں کو بھی مصنوعی ذہانت سے لیس ہیلمٹس فراہم کیے جا سکتے ہیں، جو ان کی صلاحیتوں میں اضافہ کریں گے۔ مثال کے طور پر کسی ہنگامی صورتحال میں اے آئی یہ تجزیہ کرنے میں مدد دے سکتی ہے کہ گولی چلانی چاہیے یا نہیں۔پروفیسر سن نے خبردار کیا ہے کہ روبوٹ پولیس کو مقامی کمیونٹیز میں شامل کرنے سے قبل متعدد امور پر سنجیدہ غور و خوض ضروری ہے، خصوصاً قانون سازی اور شہریوں کی نجی زندگی کے تحفظ سے متعلق معاملات پر۔ اس وقت وہ برطانیہ سمیت دنیا بھر کے پولیس افسران کی رائے جاننے کیلئے ایک سروے کر رہے ہیں، جس میں اے آئی سے لیس پولیس اہلکاروں کے بارے میں ان کے خیالات معلوم کیے جا رہے ہیں۔پروفیسر سن کا خیال ہے کہ مغربی ممالک بشمول برطانیہ، میں پولیس افسران ممکنہ طور پر جرائم سے نمٹنے والے روبوٹ کو ترجیح دیں گے۔انہوں نے مزید کہا کہ ایک روبوٹ ممکنہ طور پر تین افسران کا کام انجام دے سکتا ہے اور اسے وقفے یا آرام کی ضرورت نہیں ۔پروفیسر سن کی جانب سے کی گئی حالیہ تحقیق، جو ایشین جرنل آف کرائمینالوجی میں شائع ہوئی، میں لکھا گیا ہے کہ قانون نافذ کرنے والی اداروں پر بڑھتے ہوئے دباؤ اور جرائم کی بڑھتی ہوئی پیچیدگی کے درمیان، دنیا بھر کے علاقوں نے پولیس آپریشنز میں مصنوعی ذہانت (AI) سے لیس روبوٹ شامل کرنا شروع کر دیے ہیں۔ چین، امریکہ، سنگاپور اور متحدہ عرب امارات جیسے ممالک نے مختلف خودمختاری کی سطح کے ساتھ روبوٹک نظام آزمایا ہے، جن میں اکثر چہرہ شناسی اور پیش گوئی کرنے والے الگوردمز جیسی ٹیکنالوجیز شامل کی گئی ہیں۔ یہ پیش رفت پولیس کے تکنیکی انقلاب کے وسیع رجحان کی عکاسی کرتی ہے، جہاں روبوٹ سمیت اے آئی کا استعمال بڑھتا جا رہا ہے، تاکہ عملی کارکردگی، پولیس اہلکاروں کی فلاح و بہبود اور آخر کار عوام کی حفاظت کو بہتر بنایا جا سکے۔