یقین اعلیٰ رکھیں!
اسپیشل فیچر
آپ کی کامیابی کا دائرہ اُتنا ہی وسیع ہو گا جتنا آپ کا یقین وسیع ہو گا۔ جتنی آپ کی سوچ محدود ہو گی اتنے ہی آپ کی کامیابی کے امکانات کم ہوں گے۔ بڑے منصوبوں کے بارے میں یقین رکھیں اور بڑی کامیابی حاصل کریں۔یاد رکھیں بڑے آئیڈیاز اور بڑے منصوبے اکثر آسان ہوتے ہیں، یقینی طور پر ایسے منصوبے زیادہ مشکل نہیں ہوتے جتنے کہ چھوٹے منصوبے مشکل ہوتے ہیں۔ جنرل الیکٹریکل کمپنی کے بورڈ کے چیئرمین مسٹر الف جے کورڈینر نے ایک کانفرنس میں کہاتھا کہ ''ہمیں ہر اس شخص کی ضرورت ہے جس میں قائدانہ صلاحیتیں ہوں، وہ ان صلاحیتوں کو خود اپنے لیے اور اپنی کمپنی کیلئے استعمال کرے گا تو اس کی ذات بھی ترقی کرے گی۔کوئی شخص کسی دوسرے کو حکم نہیں دے سکتا کہ وہ اپنے اندر بہتری پیدا کرے۔ یہ اس شخص کی مرضی پر منحصر ہے کہ خود اپنے مسئلے کے حل کیلئے کوشش کرے۔ اس میں کچھ وقت لگتا ہے کام کرنے کے علاوہ کچھ قربانی بھی دینا پڑتی ہے۔ یہ سب کچھ کوئی دوسرا کسی اور کیلئے نہیں کر سکتا‘‘۔
مسٹر کورڈینر کی نصیحت بہت ٹھوس اور عملی ہے۔ یہ ایک حقیقت ہے کہ جو لوگ کاروبار، مینجمنٹ، خرید وفروخت، انجینئرنگ، مذہبی کام، لکھنے پڑھنے وغیرہ میں اعلیٰ سطح تک پہنچ جاتے ہیں، وہ توجہ اور مسلسل کوشش سے منصوبہ بندی کر کے اپنی ذات کی نشوؤنما کر لیتے ہیں۔کوئی بھی تربیتی پروگرام جیسا کہ یہ کتاب اس نے بھی تین ہی چیزوں پر زور دیاہے۔ یہ آپ کو بتاتی ہے کہ کیا کرنا چاہیے؟ دوسرا یہ طریقہ کار بتاتی ہے کہ کیسے کرنا چاہیے اور تیسرا یہ کہ مقصد تک کیسے پہنچا جائے؟ اس سے مثبت نتائج پیدا ہوتے ہیں۔
آپ کی ذات کی تربیت کا پروگرام کہ کامیابی کیونکر حاصل کی جائے، یہ بتاتا ہے کہ رویوں اور تکنیک سے لوگ کامیابی حاصل کر لیتے ہیں۔وہ اپنے یقین کو کس طرح مستحکم کرتے ہیں؟ وہ عام لوگوں سے کس طرح مختلف ہوتے ہیں؟ وہ کیسے سوچتے ہیں؟پھر دیکھیں آپ کی ترقی کا منصوبہ مسلسل حقیقی عمل کے تحت کیسے آگے بڑھتا ہے۔ ایسی رہنمائی آپ کو اس کتاب کے ہر باب میں ملے گی۔ اس رہنمائی دینے والے کام کو استعمال میں لائیں او رپھر اپنے آپ میں تبدیلی محسوس کریں۔
تربیت کا سب سے اہم حصہ کیا نتائج پیدا ہوئے؟
اس پروگرام کو اگر حقیقی طور پر استعمال میں لایا جائے تو یہ آپ کو کامیابی کی منزل کی طرف لے جائے گا۔ وہ کام جو آپ کو اب ناممکن لگتا ہے وہ آپ کیلئے بہت آسان ہو جائے گا۔ ا س کے اجزائے ترکیبی کو استعمال میں لائیں تو آپ کی ذات کی تربیت کا یہ پروگرام آپ کیلئے انعامات کا ایک سلسلہ لائے گا۔ خاندان میں آپ کی عزت بہت زیادہ بڑھ جائے گی۔ آپ کے دوست اور ساتھی آپ کی تعریف کریں گے۔ آپ کے خیالات بہت مفید ہو جائیں گے۔ معاشرے میں آپ کا وقار بڑھ جائے گا۔ آپ کی آمدنی میں اضافہ ہو جائے گا۔ آپ کا معیار زندگی بہت بلند ہو جائے گا۔
آپ اپنی تربیت خود کریں گے کوئی آپ کے کندھوں پر سوار ہو کر نہیں بتائے گا کہ آپ کو کیا اور کیسے کرنا ہے؟ یہ کتاب ہی آپ کی رہنما ہو گی آپ کو صرف اپنے آپ کو سمجھنا ہے۔ آپ کو اپنی رہنمائی خود کرنی ہے اور اس تربیت کو عمل میں لانا ہے۔ آپ خود ہی اپنی ترقی کے ذمہ دا رہوں گے۔ آپ خود ہی صحیح عمل کا انتخاب کریں گے۔مختصراً یہ کہ آپ اپنی ذات کی تربیت کرنے جا رہے ہیں تاکہ بڑی سے بڑی کامیابی حاصل ہو سکے۔
آپ کے پاس پہلے سے ہی آلات سے بھری ہوئی تجربہ گاہ موجود ہے، جس میں آپ کام اور مطالعہ کر سکتے ہیں۔ آپ کی تجربہ گاہ آپ کے اردگرد ہے۔ آپ کی تجربہ گاہ انسانوں پر مشتمل ہے۔ یہ لیبارٹری آپ کو انسانوں کے ہر عمل کی مثال مہیا کرے گی۔
اگر آپ نے اپنی اس لیبارٹری میں ایک سائنسدان کی حیثیت سے اپنے آپ کو شناخت کر لیا تو پھر آپ کے سیکھنے کی کوئی حد نہ ہو گی۔ یہاں خریدنے کو کچھ بھی نہیں۔ اس لیبارٹری کا کوئی کرایہ وغیرہ بھی ادا نہیں کرنا پڑتا۔ اس لیبارٹری میں کوئی فیس بھی نہیں اداکرنا پڑتی۔ آپ اس لیبارٹری کو اپنی مرضی کے مطابق مفت استعمال کر سکتے ہیں۔آپ اس لیبارٹری کے خود ہی ڈائریکٹر ہیں۔ آپ کو اس لیبارٹری میں وہی کچھ کرنا ہو گا جو ایک سائنسدان کرتا ہے، مشاہدہ اور تجربہ۔
کیا یہ حیرانی کی بات نہیں کہ زیادہ ترلوگ اپنے اردگرد رہنے والے لوگوں کے عمل سے متعلق بہت تھوڑا جانتے ہیں۔زیادہ تر لوگوں کی مشاہدہ کرنے کی تربیت نہیں ہوتی۔ اس کتاب کا ایک اہم مقصد آپ کو مشاہدے کی تربیت میں مدد دینا بھی ہے۔ اس کے علاوہ آپ میں انسان کے عمل کو پرکھنے کی بصیرت پیدا کرنا بھی ہے۔
زید کامیاب انسان کیوں ہے؟ اور بکر کیوں نہیں؟
کچھ لوگوں کے بہت زیادہ دوست ہوتے ہیں اور کچھ لوگوں کے بہت کم دوست کیوں ہیں؟۔ایک شخص جب کوئی بات کسی دوسرے کو بتاتا ہے تو لوگ ا س پر یقین کر لیتے ہیں لیکن جب یہی بات کوئی دوسرا شخص کہتا ہے تو لوگ ا س پر اعتبار ہی نہیں کرتے؟
جب آپ نے ایک دفعہ تربیت حاصل کر لی، تو پھر آپ مشاہدے کے بہت ہی سادہ طریقہ کے اسباق کی اہمیت کو سمجھ جائیں گے۔یہاں خاص کر دو تجاویز آپ کو مشاہدے کی تربیت میں مدد دیں گی۔ آپ اپنے جاننے والوں میں دو ایسے افراد کا انتخاب کریں جو بہت زیادہ کامیاب شخص ہیں اور دو ایسے آدمیوں کا انتخاب کریں جو بہت ہی ناکام ہیں۔ تب مشاہدہ کریں کہ آپ کے کامیاب دوستوں نے کامیابی کے کون سے اصولوں کو اپنایا تھا اور ناکام دوستوں نے کن اصولوں کو اپنایا تھا اور ان باتوں کو ایک کاغذ میں لکھتے جائیں۔ تب ان نوٹس کا مشاہدہ کریں تو سچ سامنے آ جائے گا۔
ہر دوسرے شخص سے آپ کا رابطہ آپ کو موقع فراہم کرتا ہے کہ کام کے دوران آپ کامیابی کے اصول کی ترقی کا جائزہ لے سکتے ہیں؟آپ کا مقصد یہ ہونا چاہیے کہ کامیابی کے عمل کو اپنی عادت بنا لیں۔ جب ہم کسی بات کو بار بار دوہراتے ہیں تو جلد ہی وہ ہماری عادت ثانیہ اور ہمارے ذہن کا حصہ بن کر عمل میں آ جاتی ہے۔ ہمارے دوستوں میں سے کچھ لوگ باغبانی کا مشغلہ رکھتے ہیں۔ ہم انہیں یہ کہتے ہوئے اکثر سنتے ہیں کہ پودوں کو اگتے دیکھنا بہت ہی اچھا لگتا ہے۔ پھر وہ پودوں کو پانی اور کھاد بھی دیتے ہیں۔ اب پودے پچھلے ہفتے کی نسبت بہت بڑے ہو چکے ہیں۔یقین کیجیے، جب انسان احتیاط کے ساتھ فطرت کے ساتھ تعاون کرتا ہے تو اس وقت بھی بہت ہی شاندار واقعات پید اہوتے ہیں۔
لیکن یہ تو اس کا عشر عشیر بھی نہیں جو کچھ آپ اپنی ذات میں دیکھیں گے جب آپ نے منظم طور پر اس پروگرام کو اپنی ذات کا حصہ بنا لیا۔ آپ محسوس کریں گے کہ آپ کے اعتماد کی نشوؤنما ہو رہی، یہ مزید فعال ہو رہا ہے، دن بدن زیادہ کامیاب اور ماہ بہ ماہ اس سے بھی زیادہ۔ یہ تو کچھ بھی نہیں۔ جب آپ کامیابی کی شاہراہ پر آ جائیں گے تو یہ زندگی میں آپ کو زیادہ مطمئن رکھے گا، پھر آپ کے سامنے کوئی چیلنج ناممکن نہ رہے گا۔
