ہم نے چہرے پہچان لئے ہیں!

سپریم کورٹ آف پاکستان کے روبرو پیش کی گئی جے آئی ٹی رپورٹ شاید کسی سیاستدان کی منی لانڈرنگ کی ایک ایسی لا زوال داستان ہے جس کی عصر حاضر سے مثال دینا ممکن نہیں۔ کسی ناول کی تیز رفتار کہانی کی طرح جے آئی ٹی رپورٹ آصف علی زرداری اور ان کے حواریوں کے دولت کے انبار لگانے کی سر چکرا دینے والی داستان بیان کرتی ہے جس میں پاکستان اور بیرون ملک منی لانڈرنگ کے لئے جعلی بینک اکائونٹس اور کمپنیوں کا کمال ہوشیاری سے استعمال کیا گیا۔

جے آئی ٹی رپورٹ کے مطابق کہانی کا پس منظر کچھ یوں ہے کہ نواز شریف حکومت کے دور میں ایف آئی اے کراچی کے اینٹی کرپشن سرکل نے سورس رپورٹ کی بنیاد پر 06.10.2015 کو انکوائری نمبر 70/2015 کا آغاز کیا تھا‘ جس کے مطابق مبینہ طور پر سمٹ بینک کی دو برانچوں کے چار جعلی اکائونٹس میں ایسی انٹر بینک اور انٹرا بینک ٹرانزیکشنز کی گئیں جو بظاہر اکائونٹس ہولڈرز کی ظاہری حالت سے میل نہیں کھاتی تھیں۔

07.12.17 کو ایف آئی اے کو 29 مشتبہ اکائونٹس پر مشتمل ایک STR رپورٹ موصول ہوئی جو سمٹ بینک کے سولہ، سندھ بینک کے آٹھ اور یو بی ایل کے پانچ اکائونٹس سے متعلق تھی۔ مبینہ طور پر ان بینک اکائونٹس کے ذریعے پینتیس ارب روپے کا لین دین ہوا‘ جسے منی لانڈرنگ کیلئے استعمال کیا گیا۔ 26.01.18 کو ایف آئی اے نے ایک اور انکوائری شروع کی جس میں یہ انکشاف ہوا کہ ان اکائونٹس کے ذریعے اومنی گروپ، زرداری گروپ، پارتھینن پرائیویٹ لمیٹڈ، عارف حبیب اور بہت سے ان کنٹریکٹرز اور بلڈرز نے ٹرانزیکشنز کی تھیں جنہوں نے سندھ کے کئی پروجیکٹس پر کام کیا تھا۔

اسی تحقیقات کے دوران 29.06.2018 کو انسانی حقوق کی ایک درخواست کے ذریعے یہ معاملہ سپریم کورٹ آف پاکستان کے علم میں آیا؛ چنانچہ عدالت عظمیٰ نے اس معاملے کی ایک جامع اور حتمی تحقیقات کے لئے اپنی جے آئی ٹی تشکیل دے دی تاکہ ان جعلی اکائونٹس کی حقیقت، اس میں ملوث افراد کے نام اور اس سے متعلقہ تمام مواد اور شہادتیں جمع ہو جائیں‘ جن سے یقین ہو جائے کہ جرم کا ارتکاب ہوا ہے اور پھر متعلقہ افراد کے خلاف قانونی کارروائی کی جا سکے۔

اپنے وسیع تر TOR کے دائرہ کار میں رہتے ہوئے جے آئی ٹی نے 885 افرادکو سمن کیا اور 924 افراد اور کمپنیوں کے 11500 بینک اکائونٹس کے ہمراہ 767 افراد کا تفصیلی جائزہ لیا گیا۔ جے آئی ٹی کی تفتیش سے یہ پتہ چلا کہ پہلا جعلی اکائونٹ جنوری 2010ء میں کھولا گیا تھا اور اگلے چند برسوں میں اومنی گروپ نے گیارہ جعلی کمپنیوں کے اکائونٹس کھولے جن کا کوئی کاروبار تھا نہ کوئی اثاثے تھے‘ مگر ان کے ذریعے منی لانڈرنگ کی گئی۔ ان میں سے تین کمپنیاں اومنی گروپ کے ملازمین کے نام پر کھولی گئیں‘ جن میں آفس بوائے، ہائوس وائف اور کمپیوٹر ٹیکنیشین، فالودے والا اور رکشے والا شامل تھے۔ ایک سینیٹری ورکر تھا جو 2014ء میں انتقال کر چکا تھا۔

اہم بات یہ ہے کہ یہ سارے جعلی اکائونٹس اومنی گروپ کا چیف فنانشل آفیسر اسلم مسعود (مفرور) اور اکائونٹنٹ عارف خان چلا رہے تھے‘ جن میں 42.30 ارب روپے کا لین دین ہوا تھا۔ اہم بات یہ کہ دو برانچ منیجرز کی شہادت کے مطابق یہ اکائونٹس کسی تصدیق کے بغیر سمٹ بینک کے صدر کی ہدایات پر (بحوالہ حسین لوائی) کھولے گئے تھے۔

جے آئی ٹی رپورٹ کے مطابق ان اکائونٹس کی رقوم کو نواب شاہ میں ''Z House‘‘ کی تعمیر کے لئے استعمال کیا گیا۔ کھوسکی شوگر مل کی تحقیقات کے دوران انکشاف ہوا کہ اومنی گروپ کے اکائونٹس سے اربوں روپے کی ادائیگیاں فریال تالپور اور ''بڑے صاحب‘‘ کو کی گئیں جن کو آگے مزید ذیلی کھاتوں ZH,BH یعنی زرداری ہائوس، بلاول ہائوس اور ابو بکر فارمز میں تقسیم کیا گیا۔

جے آئی ٹی رپورٹ میں بڑی تفصیل سے بتایا گیا ہے کہ کس کمال ہوشیاری سے آصف زرداری اور اومنی گروپ نے ان اکائونٹس کو منی لانڈرنگ کے لئے استعمال کیا۔ اس رپورٹ میں Modus Operendi کے عنوان سے Three Classical Stages of Money Laundering بیان کی گئی ہیں کہ کس طرح اصل اکائونٹس میں جمع ہونے سے پہلے ان جعلی اکائونٹس میں چھوٹی چھوٹی رقوم جمع کرائی گئیں‘ پھر نکالی گئیں اور پھر ایک اکائونٹ میں اکٹھی کر دی گئیں۔ اسے مالیاتی زبان میں layering کہتے ہیں‘ جس کے لئے 13,809 جعلی اکائونٹس میں 14.92 ارب روپے کا ہیر پھیر کیا گیا۔ آخری مرحلے پر اس کالے دھن کو رئیل اسٹیٹ اور فرضی جوائنٹ وینچرز سے ملنے والے بظاہر جائز منافع (مگر وہ بھی جعلی) میں شامل کر دیا گیا تاکہ اسے سفید دھن کے طور پر دکھایا جا سکے۔

تاہم جے آئی ٹی کا دعویٰ ہے کہ وہ اس تہہ در تہہ جعلی اکائونٹس کے جال کو ڈی کوڈ کرنے میں کامیاب ہو گئی ہے تاکہ اس کی شروع سے آخر تک منی ٹریل ثابت کی جا سکے۔

اس کا دلچسپ پہلو یہ ہے کہ بے شک یہ سارا گورکھ دھندہ آصف زرداری اور اومنی گروپ کے گرد پھیلا ہوا ہے‘ مگر انور مجید فیملی کے افراد اس حقیقت کا ادراک نہ کر سکے کہ وہ ملکی قانون سے بالا تر نہیں ہیں۔ تحقیقات کے دوران مسز نازلی مجید نے جے آئی ٹی کے ایک ممبر کو دھمکی دی ''ٹھیک ہے میں نے تمہارے چہرے دیکھ لئے ہیں‘‘ (ذہن میں محفوظ کر لئے ہیں)

کوئی اور معاشرہ یا اور زمانہ ہوتا تو سیاسی جماعتیں اور سیاسی لیڈر جے آئی ٹی رپورٹ کے انکشافات سن کر شرمندہ ہو جاتے سوائے پیپلز پارٹی کے‘ سوائے آصف علی زرداری کے اور یقینا سوائے ان کے کاسہ لیسوں کے۔ پچھلے کئی روز سے پی پی کے بیسیوں رہنما جمہوریت کی آڑ میں آصف زرداری کی ذاتی دولت (اور کرپشن) کا دفاع کرنے میں مصروف ہیں۔ قمر زمان کائرہ جیسے نسبتاً دیانت دار سمجھے جانے والے لیڈر ایڑی چوٹی کا زور لگا کر آصف علی زرداری کا دفاع کر رہے ہیں۔ وہ اسے ایک سیاسی رنگ دینے کی کوشش کر رہے ہیں۔ وہ اسے ایک جانب دارانہ رپورٹ کہتے ہیں‘ جس میں آصف زرداری کا موقف شامل نہیں ہے‘ حالانکہ وہ بھول جاتے ہیں کہ آصف زرداری کا دستخط شدہ بیان اس رپورٹ کا حصہ ہے۔ ان کی کوشش ہے کہ اسے سیاسی انتقام کا بیانیہ بنا کر آصف زرداری کو پاکستان کا نیلسن مینڈیلا بنا کر پیش کیا جائے۔

مگر جیسے ہی کیمرے ہٹتے ہیں اور روشنیاں بجھتی ہیں تو وہ آصف زرداری پر ہنسنا شروع کر دیتے ہیں‘ اور یہ سوچ کر خوش ہوتے ہیں کہ شاید پیپلز پارٹی کی آصف زرداری سے جان چھوٹ جائے اور ماضی کی پیپلز پارٹی پھر سے زندہ ہو جائے۔

غالب امکان ہے کہ شروع ہونے والا سال آصف زرداری اور سندھ میں ان کی سیاست کے لئے فیصلہ کن ثابت ہو گا۔ جیسے جیسے پاکستان کے ریاستی ادارے ایک طویل خواب غفلت سے بیدار ہوں گے ہمیں انتظار رہے گا کہ سندھ میں چائنا کٹنگ، زمینوں پر قبضے، ٹارگٹ کلنگ اور عزیر بلوچ پر بننے والی جے آئی ٹی سے منسلک معاملات کے فیصلے بھی ہوں گے۔

وہ دن گزر گئے جب آپ قانون نافذ کرنے والے اداروں کے اہلکاروں کو یہ کہہ کر ڈرا لیتے تھے کہ ''میں نے تمہارے چہرے دیکھ لئے ہیں۔‘‘ آصف زرداری، نواز شریف اور ان کے طبلہ نوازوں کے لئے مناسب ہو گا کہ وہ اس حقیقت کا ادراک کر لیں کہ وقت آ گیا ہے کہ وہ قطری خط اور انور مجید کی بزنس ایمپائر کے فریب سے باہر نکل کر اپنے اعمال کے نتائج کا سامنا کریں۔ اب وقت آ گیا ہے کہ وہ جان لیں کہ ہم نے ان کے چہرے پہچان لئے ہیں اور ہم انہیں کبھی نہیں بھولیں گے۔