اسباق تو ہمارے لیے بھی پنہاں ہیں

ہمارے ہمسایہ ملک میں جو کچھ ہورہا ہے ‘ اُس پر غافل تو ہرگز نہیں رہا جاسکتا‘ لیکن سبق اس میں ہمارے لیے بھی بہت سے پنہاں ہیں۔شہریت کے متنازع قانون کے حوالے سے وہاں جو کچھ بھی ہورہا ‘ اُسے بڑی حد تک مودی سرکار کی ہٹ دھرمیوں کا نتیجہ بھی قرار دیا جاسکتا ہے‘ کیونکہ آنکھیں بند کرکے سرپٹ دوڑتے جانے سے کہیں نہ کہیں ٹھوکر کھانا ہی پڑتی ہے۔ گزشتہ ماہ بھارت میں شہریت کا ایک ترمیمی بل متعارف کرایا گیا ۔اس کے تحت پاکستان‘ افغانستان اور بنگلہ دیش سے نقل مکانی کرکے بھارت آنے والوں کو شہریت دینے کی بات کی گئی۔ بل کے مطابق‘ جین‘ بدھ‘ ہندو‘ مسیحی‘ پارسی اور سکھ مذاہب سے تعلق رکھنے والوں کو ہی بھارتی شہریت کا حقدار مانا گیا اورتینوں ممالک سے ہندوستان آنے والے مسلمانوں کو اس سے باہر رکھا گیا ہے ۔

ہمارے ہاں پائے جانے والے عمومی تاثر کے مطابق دیکھا جائے توکم از کم ہندوؤں کو تو اس بل پر کوئی اعتراض نہیں ہونا چاہیے تھا۔اُنہیں تو اس بات پر خوش ہونا چاہیے تھا کہ دوسرے ممالک سے آنے والے مسلمانوں کو بھارتی شہریت کے قابل نہیں سمجھا گیا۔ اس سے اُنہیں حقیقت کے برعکس یہ ثابت کرنے کا موقع بھی ملتا کہ دیکھیںمسلمان ممالک سے بھی مسلمان بھارت میں آرہے ہیں۔ رد عمل اس کے اُلٹ آیا اور وہاں بھارتیوں کی بڑی تعدادنے محسوس کیا کہ بل کی منظوری سے بھارت کے سیکولرتشخص کو نقصان پہنچا ہے‘ اُن کااعتراض ہے کہ بل‘ بھارتی آئین کیخلاف ہے ‘جسے مذہب کی بنیاد پر متعارف اور پھر منظور کرایا گیا‘ اسی بات کو لے کر وہاں جو احتجاج کا سلسلہ شروع ہوا تو مودی سرکار کی تمام تر کوششوں کے باوجود یہ تھمنے میں نہیں آرہا۔

راجستھان اور بنگال سمیت متعدد بھارتی ریاستوں میں تو وہاں کے وزرائے اعلیٰ نے احتجاجی مظاہروں کی قیادت کی۔مسلمان بھی اِس قانون کی مخالفت میں پیش پیش ہیں۔ اُنہیں محسوس ہورہا ہے کہ انسانی ہمدردی کی آڑ میں نافذ کیے جانے والے قانون کو سیاسی مقاصد کے لیے استعمال کیا جائے گا‘اسی دوران پولیس اور شرپسندوں کی طرف سے جامعہ ملیہ اور جواہرلال نہر یونیورسٹی دہلی میں گھس کو طلبا پر تشددکرنے کے واقعات نے جلتی پر تیل کا کام کیا ۔کہا جاسکتا ہے کہ بھارتی سرکارکیلئے یہ سب کچھ غیرمتوقع ہے۔وہ یہ اندازہ کرنے میں ناکام رہی کہ ایک کمزور اپوزیشن اس بل کی اتنی شدت سے مخالفت کرے گی کہ وہ اسے ملکی آئین پر حملے کا مسئلہ بنا دے گی۔

مودی سرکار یہ اندازہ لگانے میں بھی ناکام رہی کہ مسلمان اتنی بڑی تعداد میں سڑکوں پر آجائیں گے ۔ اب یہ صورت ِحال ہے کہ بل کے مخالفین اور حمایتی واضح طور پر ایک دوسرے کے سامنے آچکے ۔ صورت ِحال کے باعث حکومتی سطح پر تشویش کے ساتھ کافی غصہ بھی پایا جاتا ہے۔ اس کا اندازہ اکثر اوقات‘ وہاں کے حکومتی زعما کے بیانات کی صورت میں سامنے آتا رہتا ہے۔ بھارتی ریاست مغربی بنگال ‘ شہریت کے قانون کی مخالفت میں پیش پیش ہے‘ وہاں کی وزیراعلیٰ خود احتجاجی ریلیوں کی قیادت کررہی ہیں۔ یہ صورت ِحال بی جے پی کے مقامی رہنماؤں سے برداشت نہیں ہوپارہی۔ اس صوبے میں بی جے پی کی ریاستی شاخ کے سربراہ دلیپ گھوش کی طرف سے قرار دیا گیا ہے کہ بل کی مخالفت کرنے والوں کو گولی مار دینی چاہیے۔ اُن کی طرف سے متعددبار یہ قرار کیا جا چکا کہ اُتر پردیش‘ آسام اور کرناٹک میں اُن کی حکومتیں بخوبی یہ کام انجام دے رہی ہے۔

بھارتی وزیراعظم نریندرمودی ایک سے زائد مواقع پر صورتِ حال کیلئے مسلمانوں کو ذمہ دار قرار دے چکے ۔ اُنہیں اس بات کی سمجھ نہیں آرہی کہ ملک کی اکثریتی آبادی کو اس قانون سے کیا مسئلہ ہے ؟ اُنہیں حیرانی اس بات پر ہورہی ہے کہ مسلمان اور ہندؤ‘ ایک دوسرے کے ہاتھو ں میں ہاتھ دے کر حکومت کیخلاف مظاہرے کررہے ہیں۔ گویا یہ بھی کہا جاسکتا ہے کہ بھارت میں حکومتی سطح پر طویل عرصے سے جو مسلم کش اقدامات اُٹھائے جارہے تھے‘ ہندوؤں کی ایک اچھی خاصی تعداد نے اُسے پسندیدگی کی نگاہ سے نہیں دیکھا۔ جاری مظاہروں میں ہندؤں کی بڑی تعداد میں شرکت کو اس ناپسندیدگی کے تناظر میں بھی دیکھا جاسکتا ہے۔ مودی سرکار کو پریشانی اِس بات پر بھی ہے کہ آئندہ ماہ فروری کے دوران نئی دہلی میں اسمبلی نتخابات ہونے والے ہیں۔صورتِ حال یہی رہی تو عام آدمی پارٹی ایک مرتبہ پھر مودی سرکار کو شکست سے دوچار کرسکتی ہے۔

یہ صورت ِحال واضح طور پر ظاہر کررہی ہے کہ ہمارا ہمسایہ ملک تغیر سے گزررہا ہے۔ شاید یہ کہنا بھی بے جا نہیں ہوگا کہ تقسیم ہند کے بعد وہاں کے مسلمان پہلی مرتبہ اس قدر مضبوطی کے ساتھ اپنے حق کے دفاع میں کھڑے ہوئے ہیں۔وہ محسوس کررہے ہیں کہ یہ بل ہندوستان کے بیس کروڑ مسلمانوں کو مزید پسماندگی کی طرف دھکیلنے کی ابتدا ہے۔ مسلمانوں نے اس بات کو بہت اچھی طرح سمجھا ہے۔ یہی وجہ ہے کہ وہاں پہلی مرتبہ مسلمان خواتین بھی پوری طرح سے متحرک دکھائی دے رہی ہے۔

تاریخ پر ایک نظر دوڑائیں تو یہ اندازہ لگانا مشکل نہیں ہے کہ بیشتر صورتوں میں خواتین تبھی میدان میں اُتریں ‘جب اُنہوں نے اپنے خاندان اور معاشرے کو خطرے میں دیکھا۔ اس سے بھی حیران کن بات یہ ہے کہ اُنہیں طلبا اور ہندومذہب سے تعلق رکھنے والوں کی بھی زبردست حمایت حاصل ہے۔ سچ تو یہ ہے کہ بھارت کی یہ صورت ِحال ہمارے بہت سے تصورات کو غلط ثابت کررہی ہے۔ کیسی عجیب بات ہے کہ وہاں کی اکثریتی آبادی کا بڑا حصہ یہ سمجھ رہا ہے کہ اگر ملک کے سیکولر تشخص کو نقصان پہنچا تو یہ مسلمانوں کیلئے اچھی بات نہیں ہوگی۔صرف اتنا ہی نہیں ‘بلکہ متعدد ہندوؤں نے ڈنڈے کھائے ہیں اور جیل بھی بھگت رہے ہیں۔ اِن میں سے ایک بہت ہی مضبوط آواز جواہرلال نہرو یونیورسٹی طلبا یونین کے صدر کنہیاکمار کی بھی ہے‘اسی یونیورسٹی کے دومسلمان طلبا ابراہیم اور حیدر کو غداری کے الزام میں گرفتار کیا گیا‘ تو اُن کے ساتھ کنہیاکمار بھی شامل تھے۔ تینوں پر الزام لگا کہ ایک تقریب کے دوران اُنہوں نے سرکار اور ریاست مخالف نعرے لگائے‘ لہٰذا وہ غداری کے مرتکب ہوئے۔ ایسی اور بھی بہت سی مثالیں سامنے آئیں اور تواترکے ساتھ سامنے آرہی ہیں۔ متنازع شہریت بل مخالفین کی طرف سے اس خدشے کا اظہار بھی کیا جارہا ہے کہ موجودہ بھارتی سرکار کو ہندؤاکثریتی جمہوریت میں تبدیل کرنا چاہتی ہے‘ایسا ہوتا ہے تو واضح طور پر اس میں مسلمان اور مسیحی ثانوی درجے کے شہری قرار پائیں گے‘ جو قابل ِقبول نہیں۔

جو کچھ ہم سنتے آئے ہیں ‘اُس کے تناظر میں یہ سب باتیں ہمیں حیران کررہی ہیں۔ کچھ کچھ ایسی سوچیں بھی ذہن میں آرہی ہے کہ شاید ہم اپنی پسند کی انتہاؤں کو دیکھنے اور پیش کرنے کے ہی عادی ہوچکے۔مختلف ادوار کے دوران ہمارے ہاں بھی بوجوہ حکومتی سطح پر انتہاپسندی کی حوصلہ افزائی کی جاتی رہی ہے۔ ہم اس کی اچھی خاصی قیمت اداکرچکے اور ادا کربھی رہے ہیں۔ کسی دوسرے کی غلطی کو بڑھا چڑھا کر پیش تو کرتے ہیں ‘لیکن اُس سے سبق سیکھنے کی زحمت کم کم ہی گوارہ کرتے ہیں۔

کیسی عجیب بات ہے کہ ہم دوسروں سے تو اچھے اچھے کی توقع رکھتے ہیں‘ لیکن خود کسی اچھی روش کو منتخب کرنے میں لیت ولعل سے کام لیتے ہیں۔ یہ طے ہے کہ انتہاپسندی‘ سرحد کے اُس پار ہو یا اِس پار‘ نتائج اس کے ہمیشہ خراب ہی برآمد ہوتے ہیں۔ آج ‘اگر ہمیں بھارتی مسلمانوں کی حالت ِزار پر دکھ ہوتا ہے‘ تو پھر ہمیں اپنے ہاں بسنے والی اقلیتوں کے حقوق کا بھی خیال رکھنا ہوگا ۔آخر میںیہی عرض ہے کہ اس میں کچھ مضائقہ نہیں‘ اگر ہم دوسروں کو غلطیوں سے سبق حاصل کرتے ہوئے ‘ اپنی غلطیاں سدھارنے کی طرف سفر کا آغاز کریں!