ملکی نان ٹیکسٹائل برآمدات میں 2.38فیصد اضافہ ریکارڈ
فیصل آباد (آئی این پی)پاکستان کی نان ٹیکسٹائل برآمدات میں رواں مالی سال کے دوران 2.38 فیصد کا اضافہ ہوا ہے ۔
ادارہ برائے شماریات پاکستان (پی بی ایس)کی رپورٹ کے مطابق، گذشتہ مالی سال کے پہلے 8 ماہ کے دوران نان ٹیکسٹائل برآمدات سے 9.66 ارب ڈالر کا زرمبادلہ کمایا گیا تھا، تاہم جاری مالی سال کے دوران جولائی سے فروری تک نان ٹیکسٹائل کی برآمدات کا حجم 9.89 ارب ڈالر تک پہنچ گیا۔اس طرح، گذشتہ مالی سال کے مقابلے میں رواں مالی سال کے ابتدائی 8 مہینوں میں نان ٹیکسٹائل برآمدات میں 0.23 ارب ڈالر یعنی 2.38 فیصد کا اضافہ ریکارڈ کیا گیا ہے ۔ پی بی ایس کی رپورٹ کے مطابق، گذشتہ مالی سال میں نان ٹیکسٹائل برآمدات میں 24.95 فیصد کا اضافہ ہوا تھا، جو 11.22 ارب ڈالر سے بڑھ کر 14.02 ارب ڈالر تک پہنچ گئی۔ رپورٹ میں بتایا گیا کہ رواں مالی سال کے ابتدائی آٹھ مہینوں میں انجینئرنگ مصنوعات کی برآمدات میں 19.05 فیصد، سیمنٹ کی برآمدات میں 38.05 فیصد، اور جفت سازی کی برآمدات میں 15.48 فیصد کا اضافہ ہوا ہے ۔ دوسری جانب، چمڑے کے ملبوسات کی برآمدات میں 5.3 فیصد، قالین کی برآمدات میں 7.12 فیصد کی کمی دیکھی گئی۔
