دبئی انٹرنیشنل چیمبر نے پاکستان میں اپنا دفتر کھول لیا
کراچی: (دنیا نیوز) پاکستان اور دبئی کے درمیان تجارت و سرمایہ کاری کے روابط مضبوط بنانے کیلئے دبئی انٹرنیشنل چیمبر نے کراچی میں اپنا دفتر کھول لیا۔
دفتر کا قیام دبئی گلوبل انیشی ایٹوو کا حصہ ہے جس کے تحت 2030ء تک دنیا بھر میں 50 بین الاقوامی دفاتر قائم کیے جائیں گے تاکہ سرحد پار کاروباری سرگرمیوں کو فروغ دیا جا سکے اور دبئی کو عالمی گیٹ وے مارکیٹ کے طور پر مستحکم کیا جا سکے۔
یہ اقدام ایسے وقت میں سامنے آیا ہے جب پاکستان اور دبئی کے درمیان تجارتی روابط میں تیزی دیکھنے میں آ رہی ہے، گزشتہ 4 سال میں پاکستانی کمپنیوں کی دبئی چیمبر میں رجسٹریشن میں 161 فیصد اضافہ ہوا، دبئی اور پاکستان کی نان آئل تجارت ایک کھرب 73 ارب روپے تک پہنچ چکی ہے۔
دبئی میں رجسٹرڈ پاکستانی کمپنیوں کی تعداد بڑھ کر 33،110 ہوگئی ہے جس پر حکام کا کہنا ہے کہ حکومت دبئی کا کراچی میں آفس پاکستانی کاروباری افراد کو سہولت فراہم کرے گا۔
