منرل انویسٹمنٹ فورم 2026 کو سرمایہ کاری کا بڑا پلیٹ فارم بنانے کی تیاری
اسلام آباد: (دنیا نیوز) منرل انویسٹمنٹ فورم 2026 کو سرمایہ کاری کا بڑا پلیٹ فارم بنانے کی تیاری جاری ہے، فورم میں بھرپور عالمی شرکت کیلئے سفارتی روابط متحرک کرنے کی ہدایت کی گئی ہے۔
وزیر پٹرولیم علی پرویز ملک نے بیرون ملک تعینات پاکستانی سفیروں سے ایک اور اہم اجلاس کیا، پاکستان منرلز انویسٹمنٹ فورم 8 اور 9 اپریل 2026 کو اسلام آباد میں منعقد ہوگا۔
علی پرویز ملک نے کہا کہ 2026 کا فورم منرل شعبے میں عالمی سرمایہ کاری کا بڑا پلیٹ فارم ہو گا، گزشتہ سال فورم میں 50 سے زائد ممالک کے 5 ہزار سے زیادہ مندوبین نے شرکت کی۔
وزیر پٹرولیم نے کہا کہ گزشتہ فورم میں بین الاقوامی معدنیات کمپنیوں کے ساتھ 14 ایم او یوز پر دستخط ہوئے، گزشتہ سال کی کامیابی کو دیکھتے ہوئے اس سال مزید بڑے پیمانے پر فورم کا انعقاد کر رہے ہیں۔
