صومالی لینڈ تنازع، او آئی سی وزرائے خارجہ کا اجلاس آج جدہ میں ہوگا
جدہ: (ویب ڈیسک) صومالی لینڈ تنازع پر اسلامی تعاون تنظیم (او آئی سی) کے وزرائے خارجہ کا اجلاس آج جدہ میں ہوگا جس میں صومالی لینڈ کے خود ساختہ اعلان آزادی پر بات کی جائے گی۔
او آئی سی جنرل سیکرٹریٹ کی طرف سے جاری بیان میں کہا گیا ہے کہ اسلامی تنظیم کے اس اجلاس کا مقصد عالمی قانون، اقوام متحدہ کے چارٹر اور او آئی سی کی قراردادوں کے مطابق صومالیہ کی علاقائی سلامتی اور خود مختاری کی بھرپور حمایت کرنا ہے۔
دفتر خارجہ پاکستان کے مطابق او آئی سی کا یہ ہنگامی اجلاس اسرائیل کی طرف سے صومالی لینڈ کو خود مختار ملک تسلیم کرنے کے اعلان اور اس کے بعد صومالیہ میں ہونے والی تیز تر اشتعال انگیز تبدیلیوں کے تناظر میں ہو رہا ہے، اجلاس میں وزیر خارجہ اسحاق ڈار پاکستان کی طرف سے صومالیہ کی عالمی طور پر تسلیم شدہ سرحدوں کے اندر اس کے اتحاد اور سلامتی کی بھرپور حمایت کا اعادہ کریں گے۔
خیال رہے کہ صومالی لینڈ صومالیہ کے شمال مغرب میں وہ خطہ ہے جس نے صومالیہ کی مرکزی حکومت کے خاتمہ کے بعد 1991ء میں اپنی آزادی کا اعلان کر دیا تھا، اب اس علاقے کی اپنی انتظامیہ، اپنا سکیورٹی نظام ہے اور یہاں وقفے وقفے سے الیکشن ہوتے رہتے ہیں، تاہم اسے ابھی تک اقوام متحدہ یا کسی بڑی عالمی تنظیم نے خود مختار ملک کے طور پر تسلیم نہیں کیا۔
اسرائیل کی طرف سے حال ہی میں صومالی لینڈ کو خود مختار ملک تسلیم کرنے کے اعلان کے بعد نہ صرف صومالیہ بلکہ مسلم دنیا میں بھی بے چینی کی لہر دوڑ گئی ہے، پاکستان عالمی فورمز پر صومالیہ کی یکجہتی اور خود مختاری کی حمایت کرتا آیا ہے۔
