×

تجارت

حکومت کا جون 2027 تک پیٹرول کی قیمتیں ڈی ریگولیٹ کرنے کا ہدف مقرر

بند کریں

اسلام آباد: (دنیا نیوز) حکومت نے جون 2027 تک پیٹرول کی قیمتیں ڈی ریگولیٹ کرنے کا ہدف مقرر کردیا۔

پیٹرولیم پرائسنگ کمیٹی کے اجلاس میں پیٹرولیم مصنوعات کی قیمتوں کے نظام میں بڑی اصلاحات کی تیاری کا فیصلہ کیا گیا اور قیمتوں کا فارمولہ مارکیٹ سے منسلک کرنے کی تجویز پیش کی گئی۔

اجلاس میں ڈیزل کی قیمتوں میں بڑے جھٹکوں سے نمٹنے کیلئے قواعد وضع کرنے کا فیصلہ بھی کیا گیا، اور نرخ کے اتار چڑھاؤ سے صارفین کو تحفظ دینے پر زور دیا گیا۔

پیٹرولیم پرائسنگ کمیٹی کے اجلاس میں آئی ایف ای ایم کا نیا طریقہ کار بھی منظور کرلیا گیا، جس کے تحت پاکستان نے پیٹرول کی قیمتوں کو ڈی ریگولیٹ کرنے کے لیے جون 2027 کا عبوری ہدف مقرر کرلیا ہے۔

پیٹرولیم قیمتوں کے تعین سے متعلق کمیٹی کا اجلاس پیٹرولیم کے وزیر علی پرویز ملک کی زیر صدارت ہوا، جس میں اصولی طور پر یہ فیصلہ بھی کیا گیا کہ آئل اینڈ گیس ریگولیٹری اتھارٹی (اوگرا) کو اختیار دیا جائے کہ اگر ڈیزل کے کریک اسپریڈ میں غیر معمولی اضافہ ہو تو وفاقی کابینہ سے بار بار منظوری لیے بغیر ڈیزل کی قیمتوں کے تعین کو خام تیل کی قیمتوں سے منسلک حساب کے طریقۂ کار پر منتقل کر سکے۔

پیٹرولیم ڈویژن نے ایک بیان میں کہا کہ ڈیزل کی قیمتوں کے حوالے سے کمیٹی نے ہنگامی صورتحال میں قواعد پر مبنی مداخلت کے ممکنہ اصولوں کی منظوری دی ہے، جس میں قیمتوں میں شدید جھٹکے کی واضح حدود اور ممکنہ اصلاحی اقدامات متعین کیے جائیں گے۔

پہلے مرحلے میں پیٹرول کی قیمتوں کو مکمل طور پر ڈی ریگولیٹ کیا جائے گا، جیسا کہ 97 RON HOBC اور 95 RON جیسے ہائی آکٹین مصنوعات کے معاملے میں پہلے ہی کیا جا چکا ہے، اس نظام کے تحت روزانہ قیمتوں میں ردوبدل کیا جائے گا اور ہدف جون 2027ء تک اس عمل کو مکمل کرنا ہے۔

صارفین کے لیے ڈی ریگولیشن کا مطلب پیٹرول کی قیمتوں میں زیادہ بار تبدیلی ہو سکتا ہے اور بالآخر مختلف آئل مارکیٹنگ کمپنیوں کی قیمتیں بھی ایک دوسرے سے مختلف ہو سکتی ہیں، کیونکہ وہ مارکیٹ میں مسابقت کریں گی، بعض صورتوں میں صارفین کو نسبتاً سستا پیٹرول مل سکتا ہے، تاہم اس کے ساتھ انہیں عالمی منڈی میں تیل کی قیمتوں اور شرحِ تبادلہ میں ہونے والی تبدیلیوں کے اثرات کا براہِ راست سامنا بھی کرنا پڑے گا۔