لاہور بلیوز نے پشاور کو ہرا کر نیشنل ٹی 20 کپ اپنے نام کرلیا
فیصل آباد: (دنیا نیوز) نیشنل ٹی 20 کپ کے فائنل میں لاہور بلیوز نے پشاور کو 9 وکٹوں سے شکست دیکر ٹرافی اپنے نام کرلی۔
لاہور بلیوز 111 رنز کا ہدف محض ایک وکٹ کے نقصان پر 16 ویں اوور میں حاصل کرلیا، عمرصدیق نے6 چوکوں اور2 چھکوں کی مدد سے64 رنز اور جنید علی30 رنز کیساتھ ناقابل شکست رہے۔
قبل ازیں فیصل آباد کے اقبال سٹیڈیم میں کھیلے گئے فائنل میں پشاور نے ٹاس جیت کر پہلے بیٹنگ کی اور 20 اوورز میں 9 وکٹوں کے نقصان پر 110 رنز اسکور کیے۔
پشاور کی امیدیں صاحبزادہ فرحان سے وابستہ تھیں جو اس ٹورنامنٹ میں تین سنچریاں سکور کرچکے تھے تاہم فائنل میں وہ ایک چوکے اور ایک چھکے کی مدد سے17 رنز بناکر آؤٹ ہوگئے جس کے نتیجے میں پشاور کی ٹیم بڑا اسکور کرنے سے قاصر رہی۔
کپتان افتخار احمد دو چوکوں کی مدد سے 34 رنز بناکر ٹاپ اسکورر رہے، وکٹ کیپر ذوالکفل نے32 رنز کی اننگز کھیلی، محمد سلمان مرزا نے 4 اوورز میں صرف 21 رنز دے کر4 وکٹیں حاصل کیں، محمد عرفان نے دو کھلاڑی آؤٹ کیے۔
پلیئر آف دی میچ ایوارڈ محمد سلمان مرزا نے حاصل کیا، ٹورنامنٹ میں 121 کی اوسط سے605 رنز بنانے والے صاحبزادہ فرحان ٹورنامنٹ کے بہترین بیٹر اور پلیئر آف دی ٹورنامنٹ قرار پائے۔
سیالکوٹ کے حسن علی13 وکٹوں کے ساتھ ٹورنامنٹ کے بہترین بولر قرار پائے، لاہور وائٹس کے محمد اخلاق ٹورنامنٹ کے بہترین وکٹ کیپر قرار پائے، انہوں نے ٹورنامنٹ میں114 رنز سکور کرنے کے علاوہ 4 کیچز اور 2 اسٹمپڈ کیے۔
