لاہور اور جہانیاں میں مبینہ پولیس مقابلے، 5 ڈاکو زخمی حالت میں گرفتار، 2 فرار
لاہور: (دنیا نیوز) لاہور اور جہانیاں میں مبینہ پولیس مقابلوں کے دوران 5 ڈاکوؤں کو زخمی حالت میں گرفتار کر لیا جبکہ 2 فرار ہو گئے۔
تفصیلات کے مطابق لاہور کے علاقے بادامی باغ بند روڈ پر 5 مسلح ڈاکو ناکہ لگا کر شہریوں کو لوٹنے میں مصروف تھے کہ اطلاع ملنے پر پولیس موقع پر پہنچ گئی، پولیس پارٹی کو دیکھتے ہی ملزموں نے فائرنگ شروع کر دی۔
پولیس کی جوابی فائرنگ کے دوران 3 ڈاکو زخمی ہو گئے جنہیں حراست میں لے لیا جبکہ 2 اندھیرے کا فائدہ اٹھاتے ہوئے فرار ہو گئے جن کی تلاش جاری ہے، گرفتار ملزموں کی شناخت عثمان، راحیل اور فیضان کے نام سے ہوئی، ملزم ڈکیتی، چوری جیسی درجنوں وارداتوں میں ملوث تھے۔
دوسری جانب جہانیاں کے علاقے چوک میتلا کے قریب بھی مبینہ پولیس مقابلہ ہوا اس دوران 2 ملزموں کو زخمی حالت میں گرفتار کر لیا گیا، ملزموں سے اسلحہ بھی برآمد ہوا ہے، پولیس نے دونوں کو تھانے منتقل کر کے مزید قانونی کارروائی کا آغاز کر دیا ہے۔
