میرے ڈرامے ہمیشہ مقبولیت حاصل کرتے ہیں:سینئراداکارہ صبا فیصل کا دعویٰ
لاہور: (دنیا نیوز) پاکستانی ٹیلی وژن کی سینئر اداکارہ صبا فیصل نے کہا ہے کہ ان کے ڈرامے عموماً مقبولیت کی بلندیوں کو چھوتے ہیں۔
سینئر اداکارصبا فیصل کا شمار ملک کی معروف اداکاراؤں میں ہوتا ہے جنہوں نے اپنی شاندار اداکاری سے ناظرین کے دلوں میں خاص مقام بنایا ہے۔
اداکارہ نے حال ہی میں ایک نجی ٹی وی پروگرام میں شرکت کی جہاں انہوں نے اپنے ڈراموں اور مقبولیت کے حوالے سے گفتگو کرتے ہوئے کہا کہ جس ڈرامے میں میں ہوتی ہوں وہ اچھا ڈرامہ ہوتا ہے اور میں یہ دعویٰ کرتے ہوئے کہہ سکتی ہوں کہ نیا بننے والا ڈرامہ بھی ہٹ ہوگا۔
صبا فیصل نے رمضان کے دوران کیے گئے دو ڈراموں کا ذکر کرتے ہوئے کہا کہ دونوں ڈراموں کو عوام کی جانب سے بے حد پسند کیا گیا، اپنے حالیہ ڈرامے آس پاس کی کہانی بیان کرتے ہوئے کہا کہ جب یہ ڈرامہ انہیں پیش کیا گیا تو انہوں نے ابتدا میں سوچا کہ اس میں ان کے لیے کچھ خاص نہیں ہے تاہم بعد میں اس ڈرامے نے ناظرین کی بڑی توجہ حاصل کی۔
