خدا کا شکر ہے اب ہم صحیح سمت کی طرف گامزن ہیں: راجہ پرویز اشرف
اسلام آباد: (دنیا نیوز) پاکستان کے یوم آزادی پر سپیکر قومی اسمبلی راجہ پرویز اشرف نے قوم کو مبارکباد دیتے ہوئے کہا ہے کہ گزشتہ 7 دہائیوں میں ہمیں بہت سی مشکلات کا سامنا کرنا پڑا ہے، خدا کا شکر ہے کہ اب ہم صحیح سمت کی طرف گامزن ہیں۔
راجہ پرویز اشرف نے کہا کہ آزادی بہت بڑی نعمت ہے، اللّٰہ تعالیٰ کا شکر کہ اس نے ہمیں اس عظیم نعمت سے نوازا، بابائے قوم محمد علی جناح اور مفکر پاکستان علامہ اقبال کو بھرپور خراج تحسین پیش کرتا ہوں۔
انہوں نے کہا کہ آباؤ اجداد اور بانیان پاکستان کی لازوال قربانیوں کی بدولت آج ہم آزاد فضاؤں میں زندگی بسر کر رہے ہیں، قیام پاکستان کا مقصد اسلامی اقدار اور روایات کے مطابق جمہوری نظام قائم کرنا تھا۔
سپیکر قومی اسمبلی کا کہنا ہے کہ من حیث القوم ہمیں نفرت اور شدت پسندی کو ترک کر کے جمہوری روایات کو اپنانا ہو گا، خواتین اور نوجوانوں کی شمولیت کے بغیر کوئی بھی ملک ترقی نہیں کر سکتا۔
ان کا کہنا ہے کہ پاکستان کا دفاع مضبوط ہاتھوں میں ہے، ہماری مسلح افواج نے مادر وطن کے دفاع کے لیے بے مثال قربانیاں دی ہیں، جشن آزادی کے پرمسرت موقع پر ہمیں اپنے کشمیری بھائیوں اور بہنوں کو نہیں بھولنا چاہیے۔
راجہ پرویز اشرف نے کہا کہ کشمیریوں اور فلسطینیوں کو آزادی کی نعمت سے محروم رکھنا دنیا کے جدید اصولوں کے منافی ہے۔
