طوفانی بارشیں، ژالہ باری، پی ڈی ایم اے نے الرٹ جاری کر دیا
لاہور: (دنیا نیوز) طوفانی بارشوں اور ژالہ باری کے پیش نظر پی ڈی ایم اے نے الرٹ جاری کر دیئے۔
ترجمان پی ڈی ایم اے کے مطابق آج سے 29 اپریل تک پنجاب میں گرج چمک کے ساتھ طوفانی بارش اور ژالہ باری کا امکان ہے، 26 سے 28 اپریل جنوبی پنجاب کے اضلاع میں طوفانی بارشیں ہوں گی، مری، گلیات، راولپنڈی، اٹک، جہلم، چکوال، منڈی بہاؤالدین، گوجرانولا، گجرات میں بارشیں ہوں گی۔
حافظ آباد، سیالکوٹ ، نارووال، لاہور، قصور، اوکاڑہ ، فیصل آباد ، ٹوبہ ٹیک سنگھ میں بھی بارش کا امکان ہے، جھنگ، خوشاب ، سرگودھا، میانوالی، پاکپتن اور ساہیوال میں بارشیں ہوں گی، بیشتر اضلاع میں بارش کے ساتھ ژالہ باری کے بھی امکانات ہیں۔
ڈی جی پی ڈی ایم اے عرفان علی کاٹھیا نے کہا کہ وزیر اعلیٰ پنجاب کی ہدایت کے مطابق ضلعی انتظامیہ کو الرٹ جاری کر دیا ہے، محکمہ صحت، آبپاشی، تعمیر و مواصلات، لوکل گورنمنٹ اور لایئو سٹاک کو الرٹ جاری کر دیا ہے۔
عرفان علی کاٹھیا نے کہا ہے کہ انفارمیشن ڈیپارٹمنٹ واسا، پنجاب پولیس اور سول ڈیفنس کو بھی موسمی صورتحال کے پیش نظر الرٹ جاری کر دیا گیا، انتظامیہ کو ہدایت کی گئی ہے کہ نشیبی علاقوں میں نکاسی آب کو یقینی بنایا جائے۔
انہوں نے کہا کہ شہری احتیاط کریں بجلی کے کھمبوں اور لٹکتی تاروں سے دور رہیں، آسمانی بجلی سے بچاؤ کیلئے محفوظ مقامات پر رہیں، بجلی کی گرج چمک اور طوفانی صورتحال میں کھلے آسمان تلے ہرگز نہ جائیں۔
عرفان علی کاٹھیا کا کہنا تھا کہ بچوں کا خاص خیال رکھیں، انہیں نشیبی علاقوں میں جمع پانی کے قریب ہرگز نہ جانے دیں، شہری غیر ضروری سفر سے پرہیز کریں اور گاڑی آہستہ چلائیں، ایمرجنسی میں پی ڈی ایم اے ہیلپ لائن 1129 یا متعلقہ ضلعی انتظامیہ سے رابطہ رکھیں۔
دوسری جانب فیڈرل فلڈ کمیشن کے مطابق دریائے کابل کے بالائی علاقوں میں شدید بارشوں کے باعث سیلابی صورتحال متوقع ہے، 27 تا 30 اپریل کے دوران سیلابی صورتحال کے باعث نوشہرہ اور چارسدہ کے علاقے متاثر ہو سکتے ہیں۔
این ڈی ایم اے نے پی ڈی ایم اے سمیت تمام متعلقہ اداروں کو کسی بھی قسم کی ہنگامی صورتحال سے نمٹنے کے لیے الرٹ رہنے کی ہدایت کی ہے، متعلقہ اداروں کو ممکنہ خطرے سے دوچار علاقوں کی نشاندہی اور بروقت ضروری اقدامات کی ہدایت کی گئی ہے۔
این ڈی ایم اے کی جانب سے متعلقہ اداروں کو سیلابی خطرے سے دوچار علاقوں میں ضروری مشینری و عملہ کی بر وقت دستیابی یقینی بنانے اور ممکنہ سیلاب کے خطرے سے دوچار علاقوں میں عوامی آگاہی کے لیے اقدامات کی ہدایت کی گئی ہے۔
ترجمان این ڈی ایم اے کا کہنا ہے کہ بہاؤ تیز ہونے کی صورت میں ندی نالوں کو پار کرنے سے گریز کریں، دریا سے منسلک علاقوں کے مکین مقامی انتظامیہ سے رابطے میں رہیں، عوام موسمی حالات سے باخبر رہیں، نشیبی علاقوں کے مکین ندی نالوں میں طغیانی کے پیش نظر محتاط رہیں۔
