صدر مملکت نے عیدمیلاد النبیﷺ پر قیدیوں کی سزاؤں میں کمی کی منظوری دیدی
اسلام آباد: (دنیا نیوز) صدر مملکت نے عیدمیلاد النبیﷺ کے موقع پر قیدیوں کی سزاؤں میں 90 روز کی کمی کی منظوری دے دی۔
صدر مملکت آصف علی زرداری نے سزاؤں میں کمی کی منظوری وزیراعظم کی ایڈوائس پر آئین کے آرٹیکل 45 کے تحت دی۔
وزارت داخلہ نے سزاؤں میں کمی کا نوٹیفکیشن جاری کر دیا۔
نوٹیفکیشن کے مطابق سزاؤں میں کمی کا اطلاق قتل، جاسوسی اور ریاست مخالف سرگرمیوں میں ملوث قیدیوں، زنا، چوری، ڈکیتی، اغواء اور دہشت گردی میں سزا یافتہ مجرموں پر نہیں ہوگا، سزا میں کمی کا اطلاق غیر ملکی افراد ایکٹ، 1946 اور منشیات کنٹرول (ترمیمی) ایکٹ 2022 ء کے تحت سزا یافتہ افراد پر بھی نہیں ہوگا۔
مالی جرائم اور قومی خزانے کو نقصان پہنچانے والے مجرموں پر بھی سزا میں کمی کا اطلاق نہیں ہوگا۔
نوٹیفکیشن میں کہا گیا کہ 65 سال سے زائد عمر کے مرد قیدی جو اپنی ایک تہائی قید کاٹ چکے، 60 سال سے زائد عمر کی خواتین قیدی جو ایک تہائی قید کاٹ چکی ہیں، 18 سال سے کم عمر افراد جو اپنی ایک تہائی سزا کاٹ چکے ہیں ان پر سزا میں کمی کا اطلاق ہوگا۔
