ڈومیسٹک میں شاندار کارکردگی: صاحبزادہ فرحان پی ایس ایل 10 کیلئے منتخب
لاہور: (ویب ڈیسک) ڈومیسٹک کرکٹ میں شاندار کارکردگی دکھانے والے بیٹر صاحبزادہ فرحان کو پی ایس ایل 10 کیلئے منتخب کر لیا گیا۔
پاکستان سپر لیگ کی فرنچائز اسلام آباد یونائیٹڈ نے صاحبزادہ فرحان کو پی ایس ایل 10 کے لیے 20 ویں کھلاڑی کی حیثیت سے سکواڈ میں شامل کیا ہے۔
صاحبزادہ فرحان کا پی ایس ایل کا سفر 2018 میں اسلام آباد یونائیٹڈ سے ہی شروع ہوا تھا، وہ بطور ایمرجنگ کھلاڑی ٹیم کا حصہ بنے تھے اور یونائیٹڈ کے لیے دوسرا پی ایس ایل ٹائٹل جیتنے میں اہم کردار ادا کیا تھا۔
ہیڈ کوچ اسلام آباد یونائیٹڈ مائیک ہیسن نے کہا ہے کہ صاحبزادہ فرحان جیسے تجربہ کار اور فارم میں موجود کھلاڑی کسی بھی وقت پلیئنگ الیون کا حصہ بن سکتے ہیں۔
انہوں نے مزید کہا کہ اسلام آباد یونائیٹڈ ہمیشہ ڈومیسٹک ٹیلنٹ کو مواقع دیتا آیا ہے اور صاحبزادہ فرحان کی شمولیت اسی پالیسی کا تسلسل ہے۔
دوسری جانب صاحبزادہ فرحان نے اسلام آباد یونائیٹڈ میں واپسی پر خوشی کا اظہار کرتے ہوئے کہا کہ انہیں یہ اعزاز حاصل ہے کہ وہ ایک بار پھر اپنی پہلی پی ایس ایل فرنچائز کے ساتھ جڑ رہے ہیں۔
ان کا کہنا تھا کہ اسلام آباد یونائیٹڈ نے انہیں پی ایس ایل میں متعارف کرایا اور وہ ہمیشہ اس کے شکر گزار رہیں گے۔
یاد رہے کہ صاحبزادہ فرحان نے حال ہی میں نیشنل ٹی 20 کپ میں نیا قومی ریکارڈ بنایا تھا، انہوں نے قومی ٹی 20 کے ایک ایڈیشن میں سب سے زیادہ رنز کا ریکارڈ اپنے نام کیا تھا۔
واضح رہے کہ پاکستان سپر لیگ سیزن 10 کا آغاز 11 اپریل سے ہو گا، یہ ایونٹ 18 مئی تک کراچی، لاہور، ملتان اور راولپنڈی میں منعقد ہو گا۔
