سڈنی: حملہ آور کو دبوچنے والے ہیرو احمد الاحمد کی دنیا بھر پر پذیرائی، انعامات کی بارش
سڈنی: (ویب ڈیسک) سڈنی میں حملہ آور کو دبوچ کر بندوق چھیننے والے شامی ہیرو احمد الاحمد کو آسٹریلیا سمیت دنیا بھر میں پذیرائی ملنے لگی ہے۔
امریکی صدر ڈونلڈ ٹرمپ نے احمد الاحمد کی تعریف کرتے ہوئے اسے بہادر شخص قرار دیا، ڈونلڈ ٹرمپ نے کہا کہ یہ شخص قابلِ احترام ہے، اس بہادر شخص نے بہت سے لوگوں کی جان بچائی، احمد کے والدین نے بھی بیٹے کے کارنامے پر فخر کا اظہار کیا ہے۔
شامی ہیرو احمد الاحمد کے لیے امریکی ارب پتی کی جانب سے 1 لاکھ ڈالرز انعام کا اعلان کیا گیا ہے، جبکہ آن لائن فنڈز اکٹھا کرنے کی مہم بھی شروع ہو گئی ہے جس کے تحت 10 لاکھ ڈالرز جمع کر لیے گئے ہیں۔
ادھر بانڈی بیچ پر دہشت گرد حملے کے دوران ایک حملہ آور کو قابو کر کے اسلحہ چھیننے والے احمد الاحمد کی پہلی سرجری کامیابی سے مکمل ہو گئی ہے۔
آسٹریلوی میڈیا اور حکام کی جانب سے ہیرو قرار دیے جانے والے 43 سالہ احمد الاحمد اس وقت اسپتال میں زیرِ علاج ہیں۔
احمد الاحمد کے کزن نے خبر رساں ادارے رائٹرز کو بتایا کہ پہلی سرجری کامیاب رہی ہے، تاہم ڈاکٹروں کے فیصلے کے مطابق مزید آپریشنز کی ضرورت بھی پڑ سکتی ہے۔
حکام کے مطابق احمد الاحمد کو بازو اور ہاتھ میں گولی لگنے سے زخم آئے تھے، جس کے بعد انہیں علاج کے لیے سینٹ جارج ہسپتال منتقل کیا گیا، واقعے کے دوران ان کی بہادری کو بڑے پیمانے پر سراہا جا رہا ہے اور انہیں متعدد جانیں بچانے کا سبب قرار دیا جا رہا ہے۔
