پی ٹی آئی کی سیاست کا محور معرکہ فساد اور انتشار، ہمارا ترقی ہے: احسن اقبال
نارووال:) دنیا نیوز) وفاقی وزیر پلاننگ اینڈ ڈیویلپمنٹ احسن اقبال نے کہا ہے کہ پی ٹی آئی کی سیاست کا محور معرکہ فساد، معرکہ انتشار ہےجب کہ ہمارا ترقی ہے۔
اپنے آبائی حلقے میں میڈیا سے گفتگو کرتے ہوئےاحسن اقبال کا کہنا تھا کہ وزیر اعلیٰ خیبر پختونخوا کو اِس وقت صوبے کے حالات کی طرف توجہ دینی چاہیے، وہاں کے عوام دہشت گردی کا شکار ہیں اور نشانہ بنے ہوئے ہیں۔
اُنہوں نے کہا کہ ہماری فوج وہاں دہشت گردی کے خلاف جنگ لڑ رہی ہے، ایسے حالات میں وزیراعلیٰ کا فرض ہے اپنے صوبہ میں امن کی طرف توجہ دیں، بجائے اِس کے دوسرے صوبوں میں لوگوں کو فساد کی تلقین کریں اور اِس پر اُبھاریں۔
وفاقی وزیر پلاننگ اینڈ ڈیویلپمنٹ کا کہنا تھاکہ ہمیں اِس وقت امن استحکام کی ضرورت ہے، پاکستان دنیا کے نقشہ پر تیزی کے ساتھ اُبھر رہا ہے، جس قسم کی بصارت کا مظاہرہ وزیر اعظم شہباز شریف، ان کے ساتھ فیلڈ مارشل عاصم منیر بہادرانہ قیادت مسلح افواج کی ہے۔
احسن اقبال نے کہا کہ پاکستان کو چین امریکہ یورپ مشرق وسطی میں نئی عزت ملی ہے، ہمارا فرض اِن حالات کا فائدہ اٹھاتے ہوئے پاکستان کو معرکہ ترقی کے لئے تیار کرے نہ کہ پاکستان کو کسی معرکہ فساد اور معرکہ انتشار میں جھونکے۔
اُن کا مزید کہنا تھا کہ پی ٹی آئی کی سیاست کا محور معرکہ فساد ، معرکہ انتشار ہے، جب کے مسلم لیگ ن کی سیاست کا محور معرکہ ترقی ہے، پاکستانی قوم معرکہ ترقی کے لئے تیار ہے، کسی انتشار ، فساد کے معرکہ کا ایندھن بننا قبول نہیں کرے گی۔
