امریکی ریاست نیو جرسی میں 2 ہیلی کاپٹرز میں تصادم، ایک شخص ہلاک
نیو جرسی: (دنیا نیوز) امریکی ریاست نیوجرسی میں 2 ہیلی کاپٹرز میں تصادم کے نتیجے میں ایک شخص ہلاک اور ایک شدید زخمی ہوگیا۔
غیر ملکی خبر ایجنسی کے مطابق بیسن روڈ کے علاقے میں 2 ہیلی کاپٹروں کے درمیان تصادم ہوا، جس کے بعد ایک ہیلی کاپٹر میں آگ لگ گئی، پولیس نے حادثے میں ایک شخص کی ہلاکت کی تصدیق کر دی۔
پولیس حکام نے بتایا کہ حادثے میں ایک شخص شدید زخمی بھی ہوا جس کو ہسپتال منتقل کر دیا گیا، زخمی شخص کی حالت تشویشناک بتائی جا رہی ہے، ہیلی کاپٹر میں پائلٹ کے علاوہ کوئی اور سوار نہیں تھا۔
رپورٹ کے مطابق ابتدائی طور پر حادثے کی وجہ معلوم نہیں ہوسکی، اس حوالے سے حکام نے تحقیقات کا آغاز کر دیا۔
