پاکستانی ٹیسٹ ٹیم کے کپتان شان مسعود نے نیا قومی ریکارڈ بنا ڈالا
کراچی: (ویب ڈیسک) پاکستانی ٹیسٹ ٹیم کے کپتان 36 سالہ شان مسعود نے پریزیڈنٹ ٹرافی کے پہلے روز تیز رفتار ڈبل سنچری سکور کرکے نیا قومی ریکارڈ بنا ڈالا۔
کراچی میں پریزیڈنٹ ٹرافی کے پہلے روز شان مسعود نے شاندار بیٹنگ کرتے ہوئے پاکستان کی تاریخ میں تیز ترین فرسٹ کلاس ڈبل سنچری کا ریکارڈ اپنے نام کیا، ایس این جی پی ایل کی جانب سے کھیلتے ہوئے شان مسعود نے ساحر ایسوسی ایٹس کیخلاف 177 گیندوں پر ڈبل سنچری مکمل کی۔
اس سے قبل پاکستان کی تیز ترین فرسٹ کلاس ڈبل سنچری کا ریکارڈ سابق کپتان انضمام الحق کے پاس تھا، انضمام الحق نے 1992ء کے دورے میں آکسفورڈ اینڈ کیمبرج یونیورسٹی کے خلاف ٹور میچ میں 188 گیندوں پر ڈبل سنچری بنائی تھی۔
شان مسعود کی جانب سے سکور ہونے والی ڈبل سنچری، پاکستانی سرزمین پر بھی تیز ترین فرسٹ کلاس ڈبل سنچری ہے، وہ پہلے دن کے اختتام پر 185 گیندوں پر 212 رنز کے ساتھ ناٹ آؤٹ ہیں، اس سے قبل یہ ریکارڈ بھارت کے وریندر سہواگ کے پاس تھا، انہوں نے 2006ء کے لاہور ٹیسٹ میں 182 گیندوں پر ڈبل سنچری بنائی تھی۔
