بلومبرگ نے پاکستان میں مہنگائی میں نمایاں بہتری اور پالیسی استحکام کی تصدیق کر دی
اسلام آباد: (دنیا نیوز) عالمی مالیاتی اعداد و شمار اور مارکیٹ پر نظر رکھنے والے مستند ترین ادارے بلومبرگ نے پاکستان سے متعلق جائزہ رپورٹ جاری کر دی۔
بلومبرگ نے پاکستان میں مہنگائی میں نمایاں بہتری اور پالیسی استحکام کی تصدیق کر دی، جریدے کے مطابق پاکستان میں قیمتوں کا استحکام اور معاشی نظم و نسق بہتر ہو رہا ہے۔
امریکی جریدے کے مطابق دسمبر میں افراطِ زر 5.6 فیصد رہا جو توقعات اور نومبر کے 6.1 فیصد سے کم ہے، خوراک کی قیمتوں میں دباؤ کم ہوا اور غذائی افراطِ زر 3.24 فیصد تک محدود رہا۔
بلومبرگ کے مطابق خوراک کی بہتر دستیابی سے مارکیٹ میں استحکام آیا اور عوامی ریلیف کے آثار نمایاں ہوئے، مارکیٹ اندازوں سے کم مہنگائی نے اعتماد بڑھایا اور پالیسی سمت کی تصدیق کی۔
جریدے کے مطابق سٹیٹ بینک نے استحکام کو مدنظر رکھتے ہوئے پالیسی ریٹ تقریباً تین سال کی کم ترین سطح پر کیا، شرحِ سود میں 50 بیسس پوائنٹس کمی سے قیمتوں کے دباؤ کے قابلِ کنٹرول ہونے کا واضح اشارہ ملا۔
بلومبرگ کے مطابق کم شرحِ سود سے کاروبار اور سرمایہ کاری کے لیے فنانسنگ نسبتاً سازگار ہونے کی امید بڑھی، قیمتوں کے استحکام نے سرمایہ کاری کے ماحول کے لیے مثبت سگنل دیا اور غیر یقینی صورتحال میں کمی آئی۔
جریدے کے مطابق کم مہنگائی سے قوتِ خرید میں بہتری اور صارفین کے لیے ریلیف کے امکانات بڑھے، دسمبر کے اعداد و شمار سے ظاہر ہوا کہ پالیسی اقدامات کے نتائج سامنے آنا شروع ہو گئے ہیں۔
بلومبرگ کے مطابق مہنگائی کا مسلسل نیچے آنا مڈ ٹرم معاشی استحکام اور بہتر گورننس کی بنیاد مضبوط ہونے کا اشارہ ہے۔
