دھند کے باعث موٹر وے مختلف مقامات پر ٹریفک کیلئے بند کر دی گئی
لاہور: (دنیا نیوز) دھند کے باعث موٹر وے کو مختلف مقامات پر ٹریفک کے لیے بند کر دیا گیا۔
ترجمان موٹروے پولیس سینٹرل ریجن سید عمران احمد نے بتایا کہ دھند کی وجہ سے لاہور سیالکوٹ موٹروے ایم 11 ، موٹروے ایم 4 فیصل آباد سے ملتان تک اور موٹر وے ایم 5 ملتان سے سکھر کے لیے بند کر دی گئی ہے۔
سید عمران احمد کے مطابق بڑی گاڑیوں کے لیےموٹروے ایم 3 دھند کی وجہ سے بند ہے، موٹرویز کی بندش کا مقصد عوام کی جان و مال کا تحفظ ہے، دھند میں لین کی خلاف ورزی خطرناک حادثات کا باعث ہو سکتی ہے۔
ترجمان موٹروے پولیس سینٹرل ریجن نے کہا کہ روڈ یوزرز لین ڈسپلن پر سختی سے عمل کریں، شہری دن کے اوقات میں سفر کو ترجیح دیں، دھند میں صبح 10 تا شام 6 تک محفوظ سفری اوقات ہیں۔
عمران احمد نے کہا کہ ڈرائیور حضرات فوگ لائٹس لازمی استعمال کریں، غیر ضروری سفر سے اجتناب کریں، تیز رفتاری نہ کریں، آگے والی گاڑی سے محفوظ فاصلہ رکھیں۔
ترجمان موٹروے پولیس سینٹرل ریجن کا کہنا تھا کہ ڈرائیور حضرات کسی بھی قسم کی رہنمائی اور مدد کے لیے ہیلپ لائن 130 پر رابطہ کریں۔
