شہباز شریف سے قطری وزیراعظم کا رابطہ، علاقائی امن اور سفارتی کوششوں پر تبادلہ خیال
اسلام آباد: (دنیا نیوز) وزیراعظم محمد شہباز شریف کو قطر کے وزیراعظم اور وزیرِ خارجہ شیخ محمد بن عبدالرحمن بن جاسم آل ثانی کی جانب سے ٹیلیفون موصول ہوا، جس میں علاقائی اور بین الاقوامی صورتحال پر تفصیلی تبادلہ خیال کیا گیا۔
دونوں رہنماؤں کے درمیان خوشگوار اور دوستانہ ماحول میں ہونے والی گفتگو کے دوران خطے میں امن و استحکام اور موجودہ صورتحال پر تبادلہ خیال کیا گیا۔ وزیراعظم شہباز شریف نے خطے میں کشیدگی کے خاتمے اور امن کے فروغ کے لیے پاکستان کی قیادت میں جاری سفارتی کوششوں کی حمایت پر قطری قیادت کا شکریہ ادا کیا۔
— Government of Pakistan (@GovtofPakistan) May 17, 2026
وزیراعظم نے علاقائی سفارت کاری میں قطر کے تعمیری کردار اور جاری ثالثی کوششوں کے حق میں اتفاقِ رائے پیدا کرنے کے اقدامات کو سراہتے ہوئے ان کی تعریف کی۔ دونوں رہنماؤں نے اس بات پر اتفاق کیا کہ مشترکہ چیلنجز سے نمٹنے کے لیے تمام متعلقہ فریقوں کے درمیان مسلسل رابطے اور قریبی مشاورت ضروری ہے۔
وزیراعظم شہباز شریف نے قطر کے امیر شیخ تمیم بن حمد آل ثانی کے لیے نیک خواہشات کا اظہار کرتے ہوئے کہا کہ وہ ان کے سرکاری دورۂ پاکستان کے منتظر ہیں۔
گفتگو کے اختتام پر دونوں جانب سے اعلیٰ سطح کے رابطے اور باہمی مشاورت کے سلسلے کو باقاعدگی سے جاری رکھنے پر بھی اتفاق کیا گیا۔
