×

پاکستان

دہشتگردی کے بنیادی ڈھانچے جہاں بھی موجود ہوں انہیں ختم کیا جائے گا: فیلڈ مارشل

بند کریں

راولپنڈی: (دنیا نیوز) آئی ایس پی آر کے مطابق فیلڈ مارشل سید عاصم منیر نے کہا کہ بلوچستان میں امن کیلئے دہشت گردی کا خاتمہ ناگزیر ہے، پاکستان سے دہشت گردی اور اس کے سہولت کاروں کے مکمل خاتمے تک کارروائیاں جاری رہیں گی۔

آئی ایس پی آر کے مطابق چیف آف آرمی سٹاف، چیف آف ڈیفنس فورسز فیلڈ مارشل سید عاصم منیر کی 20 ویں نیشنل ورکشاپ بلوچستان کے شرکاء سے ملاقات ہوئی، فیلڈ مارشل نے دہشت گردی کے بنیادی ڈھانچے کو ختم کرنے کے پاکستان کے پختہ عزم کا اعادہ کیا۔

پاک فوج کے شعبہ تعلقات عامہ کے مطابق فیلڈ مارشل سید عاصم منیر نے کہا کہ فتنہ الخوارج اور فتنہ الہندوستان کے خلاف ٹارگٹڈ آپریشنز پورے عزم کے ساتھ جاری رہیں گے۔

فیلڈ مارشل عاصم منیر نے کہا کہ سکیورٹی فورسز اور قانون نافذ کرنے والے اداروں کی مسلسل کوششیں، عوام کی غیر متزلزل حمایت کے ساتھ، بلوچستان میں دیرپا امن کے قیام کو یقینی بنائیں گی۔

انہوں نے کہا کہ فتنہ الخوارج اور فتنہ الہندوستان کے خلاف کارروائیاں پوری قوت اور عزم کے ساتھ جاری رہیں گی، ملک اور عوام کیلئے خطرہ بننے والے دہشت گردوں کے بنیادی ڈھانچے جہاں بھی موجود ہوں انہیں ختم کیا جائے گا۔

فیلڈ مارشل نے کہا کہ بیرونی سرپرستی میں کام کرنے والے پراکسی عناصر مسلسل بلوچستان میں تشدد کو ہوا دے رہے ہیں، یہ عناصر استحکام کو نقصان پہنچانے اور امن خراب کرنے کی کوشش کرتے رہے ہیں۔

سید عاصم منیر نے کہا کہ پاکستان کی مسلح افواج عوام کے اتحاد، حوصلے اور بھرپور تعاون سے ان کے مذموم عزائم کو ناکام بنا دیں گی۔

فیلڈ مارشل نے کہا کہ بلوچستان پاکستان کا فخر ہے، یہ صوبہ بے پناہ قدرتی وسائل سے مالامال ہے، یہاں کے باہمت، محب وطن اور ثابت قدم عوام اس کی سب سے بڑی طاقت ہیں۔

انہوں نے کہا کہ وفاقی اور صوبائی حکومتیں بلوچستان کی سماجی اور معاشی ترقی کیلئے مختلف ترقیاتی منصوبوں پر عمل درآمد کر رہی ہیں۔

فیلڈ مارشل سید عاصم منیر نے کہا کہ قومی یکجہتی کے فروغ اور بلوچستان میں پائیدار امن و خوشحالی کے لیے سول سوسائٹی، تعلیمی اداروں، میڈیا اور نوجوانوں کا مثبت کردار قابل تعریف ہے۔

انہوں نے کہا کہ ملک کے روشن مستقبل کیلئے قومی اتحاد، ثابت قدمی اور مشترکہ کوششوں کی ضرورت ہے۔

آئی ایس پی آر کے مطابق فیلڈ مارشل نے اجلاس کے اختتام پر شرکاء کے ساتھ کھلے اور جامع انداز میں تبادلہ خیال کیا، شرکاء نے پاکستان کے استحکام، ترقی اور خودمختاری کے لیے اپنے مشترکہ عزم کا اعادہ کیا۔