کسی کی رائے پر شب خون مارنا آئین، جمہوریت و انسانیت کی توہین ہے: حافظ نعیم الرحمان
لاہور: (دنیا نیوز) امیر جماعت اسلامی حافظ نعیم الرحمان نے کہا ہے کہ کسی کی رائے پر شب خون مارنا آئین، جمہوریت و انسانیت کی توہین ہے۔
تقریب سے خطاب کرتے ہوئے حافظ نعیم الرحمان نے کہا کہ حکومت نے ایک نئے ادارے کے قیام کا اعلان کر دیا ہے، نئے اداروں کی بھرتی سے اب خزانے پر بوجھ پڑے گا، ٹوئٹر کو فروری سے بند کیا گیا ہے، یہ سمجھتے ہیں شائد ایسے آواز بند ہو جائے گی ایسا نہیں ہو سکتا، لوگ ظلم کو ظلم ہی کہیں گے۔
انہوں نے کہا کہ گھروں میں چھاپے مارنے والے بچوں کے کھلونے تک توڑ دیتے ہیں، آپ نفرتوں کو اتنا پھیلانا چاہتے ہیں کہ نوجوان کہیں ملک میں نہیں رہنا، فراڈ الیکشن کے ذریعے جعلی حکومت بنا دی، کسی کی رائے پر شب خون مارنا آئین، جمہوریت و انسانیت کی توہین ہے۔
حافظ نعیم الرحمان نے کہا کہ یہ کھوکھلی حکومت ہے ان کے پاس کوئی اخلاقی جواز نہیں، حکومت ہوش کے ناخن لے، ملک میں غربت، بے روزگاری مسلسل بڑھ رہی ہے۔
امیر جماعت اسلامی نے کہا کہ غزہ کی صورتحال انتہائی تشویشناک ہے، غزہ میں ظلم کا سلسلہ جاری ہے، غزہ کے لوگ حق اور سچ کے راستے پر ہیں۔
حافظ نعیم الرحمان نے کہا کہ پوری دنیا کی یونیورسٹیوں میں روزانہ کی بنیاد پر احتجاج کا سلسلہ جاری ہے، سوشل میڈیا کی طاقت نے ریاستوں کے کھربوں ڈالر کو شکست دیدی۔
