محرم میں امن و امان ترجیح، ملک دشمن ایجنڈے نہیں چلنے دینگے: عبدالخبیر آزاد
ملتان: (دنیا نیوز) چیئرمین مرکزی رویت ہلال کمیٹی پاکستان مولانا عبدالخبیر آزاد نے کہا کہ ملک میں ایسے ایجنڈے نہیں چلنے دیں گے جو ملک دشمن ہو، صرف محرم الحرام نہیں پورا سال امن کو قائم رکھنا ہو گا۔
چیئرمین مرکزی رویت ہلال کمیٹی مولانا عبدالخبیر آزاد نے اتحاد بین المسلمین اجلاس سے خطاب کرتے ہوئے کہا کہ شہر اولیاء سے ہم ہمیشہ امن، رواداری کی بات لیکر چلے ہیں، پاکستان کو آج واحدت کی ضرورت ہے، محرم الحرام میں امن کو یقینی بنانے کے لیے ہمارا قافلہ رواں ہے۔
مولانا عبدالخبیر آزاد نے کہا کہ علماء کا کام توڑنا نہیں جوڑنے کا ہے، ہم سب اہلبیت کے پیروکار ہیں، ہم سب کو امن کا پیغام دینا ہو گا، ہمیں تحمل، صبر اور برداشت کا مظاہرہ کرنا ہو گا، ملک میں امن قائم کرنے کے لئے پاکستان کے کونے کونے میں جاتے ہیں۔
انہوں نے مزید کہا کہ خود کش بمبار اور اشتعال انگیزی حرام ہے، پاک فوج سکیورٹی ادارے ہمارے اپنے ادارے ہیں، پیغام پاکستان کو عام کرنے کا وقت ہے۔
چیئرمین مرکزی رویت ہلال کمیٹی نے کہا کہ ہندوستان میں مسلمانوں کی بری حالت ہے، پوری امت مسلمہ غزہ کے مسلمانوں کے ساتھ ہے، امت مسلمہ کو غزہ کے مسلمانوں کی آزادی کے لئے کام کرنا ہو گا۔
