حکومت سندھ کی خواتین کیلئے سکوٹی چلانے کی تربیت کا آغاز
کراچی: (دنیا نیوز) حکومتِ سندھ نے خواتین کو بااختیار بنانے کے لیے ایک اور احسن اقدام اٹھاتے ہوئے سکوٹی چلانے کی تربیت کا آغاز کردیا۔
سندھ کے سینئر وزیر شرجیل انعام میمن کے مطابق کراچی کے علاقوں کورنگی، گلشنِ اقبال اور ملیر میں سکوٹی چلانے کی تربیت کا آغاز ہو چکا ہے، کراچی کے تمام اضلاع میں پنک سکوٹی سکیم کے لیے درخواست دینے والی ورکنگ وومنز کی خصوصی حوصلہ افزائی کی جائے گی۔
شرجیل انعام میمن نے بتایا کہ حیدرآباد میں سکوٹی تربیت 18 دسمبر سے شروع ہو چکی ہے جبکہ سندھ کے دیگر شہروں میں بھی یہ تربیتی پروگرام جلد شروع کیا جائے گا، سکھر، لاڑکانہ، شہید بے نظیر آباد اور میرپورخاص میں بھی سکوٹی چلانے کی تربیت کا آغاز جلد شروع کیا جائے گا۔
سینئر وزیر کا کہنا ہے کہ سکوٹی چلانے کی تربیت محفوظ رائیڈنگ کو یقینی بنانے کے لیے دی جا رہی ہے اور اس سکیم کا مقصد خواتین کی محفوظ اور آسان نقل و حرکت کو فروغ دینا ہے، خواتین کو بااختیار بنانا حکومتِ سندھ کی اولین ترجیحات میں شامل ہے۔
شرجیل انعام میمن کے مطابق خواتین کی خود مختاری صرف معاشی نہیں بلکہ سماجی آزادی سے بھی جڑی ہوئی ہے، محفوظ سفری سہولیات فراہم کیے بغیر خواتین کو عملی طور پر بااختیار نہیں بنایا جا سکتا، سکوٹی تربیتی پروگرام خواتین کو خود اعتمادی، خود انحصاری اور عملی آزادی کی جانب ایک اہم قدم ہے۔
انہوں نے بتایا کہ طالبات اور ملازمت پیشہ خواتین اس سکیم سے مستفید ہو سکیں گی جبکہ درخواست اور مزید تفصیلات کے لیے ویب سائٹ smta.sindh.gov.pk ملاحظہ کی جا سکتی ہے۔
