7 کمپنیاں پی ٹی اے کی 70 ارب کی نادہندہ، لائسنس کی مدت بھی ختم
اسلام آباد (ایس ایم زمان) پاکستان میں انٹرنیٹ و ٹیلی کام سروسز فراہم کرنے والی سات بڑی کمپنیوں کے لائسنس کی مدت ختم ہوگئی، مذکورہ کمپنیوں نے پاکستان ٹیلی کمیونیکیشن اتھارٹی(پی ٹی اے) کو لائسنس فیس اور جرمانہ کی مد میں 70 ارب روپے سے زیادہ رقم دینی ہے۔۔۔
لائسنس کی مدت پوری ہونے والی سات کمپنیوں میں سے تین کمپنیاں پی ٹی اے کو لائسنس اور جرمانہ کی رقم دینے سے انکاری ہیں، جبکہ چار کمپنیاں لائسنس کی فیس دینے کو رضامند اور جرمانہ کی رقم دینے سے انکاری ہیں،پاکستان ٹیلی کمیونیکیشن اتھارٹی نے پاکستان میں انٹرنیٹ و ٹیلی کام سروسز فراہم کرنے والی سات کمپنیوں کے لائسنس کی تجدید ، 20 ارب روپے ایل ڈی آئی لائسنس فیس،واجبات اور 50 ارب روپے جرمانہ کی وصولی کے لیے مذاکرات شروع کر دئیے ہیں، ،وزارت انفارمیشن ٹیکنالوجی اینڈ ٹیلی کمیونیکیشن نے پی ٹی اے کو لائسنس فیس اور جرمانہ کی رقم وصولی کے ساتھ لائسنس کی تجدید کرنے کی ہدایت دی ہے ، پاکستان میں انٹرنیٹ و ٹیلی کام سروسز فراہم کرنے والی کمپنیوں میں سے سات کمپنیوں ورلڈ کال، وطین ٹیلی کام، ٹیلی کارڈ، ریڈ ٹون ، ڈین کام ، وایئز کام ،سرکل نیٹ کے لائسنس کی مدت پوری ہو چکی ہے ، ریڈ ٹون، ڈین کام اور سرکل نیٹ پی ٹی اے کو لائسنس اور جرمانہ کی رقم دینے سے انکاری ہیں جبکہ ٹیلی کارڈ، وطین ٹیلی کام ،ورلڈ کال اور وائیز کام پی ٹی اے کو لائسنس کی فیس دینے پر رضامند ہیں اور جرمانہ کی رقم جمع کرانے سے انکاری ہیں ، پی ٹی اے نے کمپنیوں کو لائسنس کی تجدید اور لائسنس فیس و جرمانہ کی ادائیگی کیلئے تجاویز و سفارشات پیش کرنے کے مراسلے جاری کیے ہیں۔
