بجلی 60 روپے مہنگی کرکے 7روپے سستی کی گئی ، احمد بھچر
لاہور(آئی این پی)پنجاب اسمبلی میں اپوزیشن لیڈر ملک احمد خان بھچر نے لاہور میں پریس کانفرنس کے دوران وزیراعظم شہباز شریف پر تنقید کرتے کہا ہے کہ وزیراعظم نے بجلی 60 روپے مہنگی کرکے اب 7 روپے سستی کردی ہے ۔
پی ٹی آئی دور میں بجلی کا فی یونٹ 17 روپے تھا جو اب 34 روپے ہے ، مہنگائی 212 فیصد بڑھ گئی ہے ۔ انہوں نے مزید کہا رمضان میں چینی 172 روپے کلو ہوئی، ماڈل بازاروں میں کوئی چیز معیاری نہیں تھی، ستھرا پنجاب کی قیمت لوگوں کے بلوں میں لگ کر آرہی ہے ۔ناقص حکومتی پالیسی سے آج گندم 2 ہزار روپے من فروخت ہورہی ہے جو 25 سال میں سستی ترین ہے ، سٹاک کرنے والے اب گندم اٹھا لیں گے ، آگے بڑا بحران آرہا ہے ۔اپوزیشن لیڈر نے کہا کسانوں نے کینولا کاشت کیا، حکومت نے دوجہاز سویا بین کے منگوا لیے ، کینولا 7ہزار سے 5 ہزار پر آگیا اور کسان پٹ گیا۔ کسانوں کو دیا جانے والا سولر انورٹر ٹیوب ویل چلانے کے قابل نہیں، ن لیگ نے ہمارے منصوبوں پر اپنے نام کی تختیاں لگا دیں۔ اب یہ جناح ہسپتال کو آئوٹ سورس کرنے جارہے ہیں ،اگر آپ لاہور کا ہسپتال نہیں چلا سکتیں تو گھر بیٹھ جائیں۔
