گھر میں ڈرون، دفتر میں روبوٹ کریں گے چوکیداریگھروں، دفاتر اور کاروباری مراکز کی حفاظت کیلئے ٹیکنالوجی کی دنیا میں نت نئے خودکار نظام متعارف کرائے جا رہے ہیں۔ ماضی میں سکیورٹی کیمرے مخصوص مقامات پر نصب ہوکر نگرانی کرتے تھے، لیکن اب مصنوعی ذہانت اور روبوٹکس نے اس تصور کو ایک نئی شکل دے دی ہے۔ ایمازون نے اسی سلسلے میں دو جدید سکیورٹی ڈیوائسز '' رنگ ڈرون کیم‘‘ اور ''رنگ روور کیم‘‘ متعارف کرائی ہیں۔ ان میں سے ایک اڑنے والا ڈرون ہے جو گھر کے کمروں میں گشت کرکے مشکوک سرگرمیوں کا سراغ لگاتا ہے، جبکہ دوسرا پہیوں پر چلنے والا روبوٹ ہے جو دفاتر، گوداموں اور دکانوں کی نگرانی کرسکتا ہے۔ یہ جدید آلات نہ صرف خودکار طور پر مشکوک مقامات کا جائزہ لیتے ہیں بلکہ سائرن، روشنی اور کیمروں کی مدد سے ممکنہ گھسنے والوں کو خبردار اور خوف زدہ بھی کرسکتے ہیں۔ ''رنگ ڈرون کیم‘‘ ایک دہائی سے زیادہ عرصہ قبل دروازوں کی گھنٹیوں کو سکیورٹی کیمروں میں تبدیل کرکے مقبولیت حاصل کرنے کے بعد، ایمازون نے اب ایک ایسا اڑنے والا روبوٹ متعارف کرایا ہے جو گھر کے مالک کی ہدایت پر گھر کے اندر گشت کرسکتا ہے۔ 187 پاؤنڈ (تقریباً 70 ہزار پاکستانی روپے) مالیت کا یہ جدید آلہ ''رنگ ڈرون کیم‘‘ (Ring Drone Cam) کہلاتا ہے، جو ٹیکنالوجی کی بڑی کمپنی ایمازون کے ذیلی سکیورٹی برانڈ رنگ کی جانب سے متعارف کرائے گئے خودکار حفاظتی آلات کی نئی سیریز کا حصہ ہے۔ روایتی سکیورٹی کیمروں کے برعکس یہ ڈرون گھر یا عمارت کے مختلف حصوں میں پرواز کرتے ہوئے ان مقامات کا بھی جائزہ لے سکتا ہے جہاں مستقل طور پر نصب کیمرے نہیں پہنچ سکتے۔یہ اڑنے والا کیمرا پہلے سے طے شدہ شیڈول کے مطابق گھر میں گشت کر سکتا ہے، الارم بجنے پر خودکار طور پر حرکت میں آ سکتا ہے یا گھر کے مالکان کی ہدایت پر کسی بھی وقت نگرانی کیلئے بھیجا جاسکتا ہے۔ رنگ کمپنی کے مطابق اس ڈرون کی تیاری کا خیال اس وقت سامنے آیا جب صارفین نے ایسی جگہوں کی حفاظت کی ضرورت ظاہر کی جہاں وہ مستقل سکیورٹی کیمرے نصب نہیں کرنا چاہتے تھے۔ رنگ کے بانی اور چیف انوینٹر جیمی سیمی نوف کا کہنا ہے کہ صارفین کی اس ضرورت کا جواب مزید کیمرے نصب کرنا نہیں تھا بلکہ سکیورٹی آلات کے تصور کو نئے سرے سے تشکیل دینا تھا۔ اس نوعیت کی اختراع آسان نہیں ہوتی اور اس میں وقت لگتا ہے، تاہم کمپنی نے کوشش جاری رکھی، یہاں تک کہ اسے مطلوبہ کامیابی حاصل ہوگئی۔ یہ محض سکیورٹی کے ایک نئے شعبے کا آغاز نہیں بلکہ ایسے مستقبل کی بنیاد ہے جہاں فعال اور خودکار حفاظتی نظام ہر گھر اور کاروباری ادارے کی دسترس میں ہوگا۔''رنگ روور کیم‘‘''ڈرون کیم‘‘ کے علاوہ کاروباری اداروں کیلئے پہیوں پر چلنے والا ''رنگ روور کیم‘‘ (Ring Rover Cam)بھی متعارف کرایا گیا ہے۔ یہ ایک روبوٹک نگرانی کا نظام ہے، جسے دفاتر، گوداموں اور دکانوں کی سکیورٹی کیلئے تیار کیا گیا ہے۔ ''روور کیم‘‘ میں ایک ایسا کیمرا نصب ہے جو ضرورت کے مطابق اونچائی کم یا زیادہ کرنے والے ستون پر لگا ہوتا ہے۔ اس کے علاوہ یہ سائرن اور دو طرفہ آڈیو رابطے کی سہولت سے بھی لیس ہے، جس کے ذریعے نگرانی کرنے والا شخص دوسری جانب موجود افراد سے بات چیت کرسکتا ہے۔ ''رنگ روور کیم‘‘ بھی مصنوعی ذہانت پر مبنی نیویگیشن سسٹم ''اے آئی پائلٹ‘‘ (AI Pilot) کے ذریعے کام کرتا ہے۔ ابتدائی مرحلے میں صارفین اسے اپنے گھریا دفتر کے مختلف حصوں میں لے کر گھومتے ہیں تاکہ یہ وہاں کا ایک ڈیجیٹل نقشہ تیار کر سکیں۔ اس کے بعد یہ نظام کمروں کی شناخت کرتا، نگرانی کیلئے موزوں مقامات تجویز کرتا اور فرنیچر سمیت دیگر رکاوٹوں کو مدنظر رکھتے ہوئے پرواز کے راستے متعین کرتا ہے۔صارفین ڈیجیٹل نقشے پر محض کسی مقام کو چھو کر منتخب کرسکتے ہیں، جس کے بعد ڈرون خودکار طور پر راستہ طے کرتے ہوئے وہاں پہنچ جاتا ہے۔یہ مختصر جسامت کا ڈرون 2K کیمرے اور متعدد ایل ای ڈی لائٹس سے لیس ہے۔ اس کی بیٹری تقریباً 8 سے 10 منٹ تک پرواز کرنے کی صلاحیت رکھتی ہے، جس کے بعد یہ خودکار طور پر اپنے چارجنگ اسٹیشن پر واپس آجاتا ہے۔ رنگ کمپنی کے مطابق ڈرون کی حرکت کرتی ہوئی روشنیاں چوروں اور غیر متعلقہ افراد کو خوفزدہ کرنے میں بھی مددگار ثابت ہوسکتی ہیں، کیونکہ ان سے ایسا تاثر پیدا ہوتا ہے جیسے کوئی سکیورٹی گارڈ ٹارچ لے کر عمارت کی تلاشی لے رہا ہو۔کمپنی کی جانب سے اس ڈیوائس کی تشہیر میں ایک مثال دیتے ہوئے کہا گیا ہے کہ اگر آپ ہفتے کے آخر میں گھر سے باہر جارہے ہیں تو ڈرون کو آخری مرتبہ گھر کا جائزہ لینے کی ہدایت دے سکتے ہیں تاکہ تصدیق ہوسکے کہ تمام کھڑکیاں بند ہیں۔اسی طرح اگر گھر سے دوری کے دوران سکیورٹی الارم بجنے کی اطلاع موصول ہو تو ڈرون پہلے ہی پرواز کرکے اس مقام کا جائزہ لینا شروع کردیتا ہے جہاں سے الارم فعال ہوا ہو، اور آپ کو صورتحال سے آگاہ کرتا ہے۔ کمپنی کے مطابق رنگ ڈرون کیم صارفین کو گھر سے دور ہونے کے باوجود تحفظ اور اطمینان کا احساس فراہم کرتا ہے۔ایمازون کے مطابق دونوں آلات کو اس انداز میں تیار کیا گیا ہے کہ وہ نہ صرف اپنی موجودگی کا احساس دلائیں بلکہ آواز اور روشنی کے ذریعے بھی توجہ حاصل کریں۔ رنگ ڈرون کے پروپیلرز کی آواز واضح طور پر سنائی دیتی ہے، جبکہ رنگ روور کا روشن لائٹ ٹاور دور سے بھی دکھائی دیتا ہے۔کمپنی کا کہنا ہے کہ اگر کسی ایسی جگہ کوئی غیر متعلقہ شخص موجود ہو جہاں اس کی اجازت نہ ہو تو سر پر پرواز کرتا ڈرون یا سائرن بجاتا ہوا متحرک روبوٹ اسے فوری طور پر احساس دلاتا ہے کہ اس کی موجودگی کا پتا چل چکا ہے۔رنگ روور کیم کی امریکا میں ترسیل 16 دسمبر سے شروع ہونے کی توقع ہے، جس کی قیمت 999 ڈالر مقرر کی گئی ہے۔ دوسری جانب ڈرون کیم کی قیمت 249 ڈالر رکھی گئی ہے اور اس کی فروخت آئندہ سال 27 جنوری سے شروع ہونے کا امکان ہے۔
