یونان:دنیا کا پہلا جمہوری ملک
اسپیشل فیچر
یونان، یورپ کا جنوبی حصہ ہے جو تین اطراف سے بحیرہ روم میں گھرا ہوا ہے۔اسے عرف عام میں '' جزیرہ بلقان‘‘ کانام دیا جاتا ہے۔ یورپ میں یونان کو عام طور پر ''گریس‘‘ اور اس کے باشندوں کو ''گریک‘‘ کہتے ہیں۔جہاں تک اس نام کی ابتدا کا تعلق ہے ، بنیادی طور پر اہل روما (رومنز ) کو سب سے پہلے یونان کے جس قبیلے سے واسطہ پڑا وہ ''گرائیہ‘‘ ( Grecians) تھے۔ رومیوں نے انہیں اور پھر یہاں کے تمام باشندوں کو ''گریسی‘‘(Graeci)کہنا شروع کر دیا۔ حالانکہ یونانی اس وقت بھی خود کو'' ہیلنز‘‘ (Hellen`s) اور اپنے ملک کو'' ہیلاس‘‘ (Hellas)کہتے تھے۔
یونان اپنے دور کا ایک طلسماتی ملک تھا۔ قدیم دور کی اس سحر انگیز سرزمین نے مختلف ارتقائی مراحل طے کرتے ہوئے اپنے سب سے عظیم شہر میں اگر ایک طرف فاتح عالم سکندر اعظم کو جنم دیا تو دوسری طرف معروف فلسفی افلاطون ، ارسطو، سقراط، معروف شاعر ہومر اور نہ جانے کتنے ہی نابغہ روزگار شخصیات کو جنم دیا تھا۔ دراصل یونان ایک شہر یا ریاست کا نام نہیں تھا بلکہ یہ وسیع و عریض خطے پر پھیلی ایک تہذیب کا نام تھا۔
یونانی تہذیب عظیم فکری، ثقافتی اور فنکارانہ کامیابیوں کا دور تھا۔ قدیم یونانیوں نے فلسفہ، جمہوریت اور فنون لطیفہ کی کامیابیوں کے جھنڈے گاڑھے ہیں۔ وہ اولمپک گیمز جیسے اچھوتے تصور کے بھی بانی ہیں۔یونانی فن تعمیر، مجسمہ سازی، مصوری ، ادب ، فلسفہ اور فنون لطیفہ کے دیگر شعبوں کو پروان چڑھانے اور جدت کا رنگ دینے میں تاریخ کے اوراق میں ہمیشہ یاد رکھے جائیں گے۔
محققین کے مطابق معروف فلسفی افلاطون، سقراط کا شاگرد تھا جبکہ ارسطو،افلاطون کا شاگرد تھا۔ سقراط نے یونان کے شہر ایتھنز میں اپنے زمانے کی سب سے بڑی علمی درسگاہ کی بنیاد رکھی جس سے بعد میں ارسطو جیسے دانشور اور فلسفی نے تحصیل علم کیا۔ یونان کو یہ انفرادیت بھی حاصل ہے کہ یہی وہ ریاست تھی جہاں جمہوریت کا تصور سب سے پہلے دیا گیا جو رفتہ رفتہ پوری دنیا میں پھیلتی چلی گئی۔
موجودہ یونان کے دارالحکومت ایتھنز کواقتصادی، تجارتی،صنعتی ثقافتی اور سیاسی سرگرمیوں کے حوالے سے مرکزیت حاصل ہے۔ چوتھی اور پانچویں صدی قبل مسیح میں یورپ کی ریاستوں پر یونان کے گہرے ثقافتی اور علمی اثرات ظاہر ہونا شروع ہو گئے تھے جو رفتہ رفتہ پوری دنیا میں پھیلتے چلے گئے اور یورپ سمیت دیگر تہذیبوں میں رچ بس گئے۔ یونان کی ثقافت نے کئی ادوار دیکھے ہیں۔ یہی وجہ ہے کہ ماہرین یونان کی ثقافت کو صدیوں کے اعتبار سے مختلف ادوار میں تقسیم کرتے ہیں۔ یونان نے سب سے زیادہ ترقی ''کلاسیکی دور‘‘ میں کی ۔یہ وہ دور تھا جب یونانی ثقافت نے تہذیبی ارتقا کے ساتھ ساتھ تعلیم، فلسفہ،سائنس ، ریاضی ، فنون لطیفہ اور دیگر علوم میں غیر معمولی ترقی کی۔
یونانی تہذیب کا ارتقا
تاریخی حوالوں سے پتہ چلتا ہے کہ پہلی یونانی تہذیب بحیرہ روم کے جزیرے کریٹ میں لگ بھگ2200قبل مسیح میں پھیلی۔ اس تہذیب کو ''مینو‘‘ نامی ایک مشہور حکمران کے نام سے منسوب کیا جاتا ہے۔منوین افراد کاشتکاری ، ماہی گیری کے پیشوں سے وابستہ تھے جبکہ ان کے حکمران عالیشان ، وسیع و عریض محلات میں شان و شوکت سے رہتے تھے۔ اس زمانے کے ایک محل ''شاہ مینوس محل‘‘ کا تاریخی اوراق میں بڑا تذکرہ ملتا ہے جو شاہ مینوس نے انتہائی چاہت سے تعمیر کرایا تھا۔یہ تہذیب لگ بھگ سات سو سال تک جاری رہی،1500قبل مسیح کے بعد اس تہذیب کے آثار نہیں ملتے۔
اس کے بعد یہاں کے ایک قدیم شہر میسینی کے آثار ملے تھے ۔ میسینیوں کی اس تہذیب کے آثار کی شروعات ''منوینوں‘‘ کے بعد ہوئی تھی۔ میسینئین لوگ بڑے مالداراور جنگجو تھے جو لگ بھگ پانچ صدیوں تک شریک اقتدار بھی رہے۔ انہوں نے نہ صرف شاندار محلات تعمیر کرائے بلکہ سلاطین کی قبروں سے سونے اور جواہرات کے آثار بھی ملے ہیں۔ یہ پیدائشی جنگجو تھے اس لئے یہ اکثر و پیشتر نہ صرف دست و گریباں رہتے بلکہ دور دراز بھی جا کر جنگیں لڑا کرتے تھے۔
نئے دور کا آغاز
اپنے اسلاف کے ورثے دیکھتے ہوئے نئی یونانی نسل کو اس امر کا شدت سے ادراک ہونے لگا تھا کہ وہ ایک بہت بڑی تہذیب اور ورثے کے امین ہیں۔ چنانچہ رفتہ رفتہ یونان ایک مرتبہ پھر کامیاب ریاست کے طور پر ابھرنا شروع ہوا۔ یہ وہ دور تھا جب یونا ن میں شہری سطح پر حکومتوں کا، رواج شروع ہوا جسے یہاں کے عوام نے سراہا۔ وقت کے ساتھ ساتھ شہری ریاستیں سکڑتی گئیں اور 500 قبل مسیح کے آس پاس یونان دو ریاستوں تک محدود ہو گیا۔ ایک سپارٹا کے نام کی شناخت اور دوسرا ایتھنز کے نام سے پہچانا جانے لگا۔سپارٹا کے لوگ بنیادی طور پر جنگجوانہ فطرت کے مالک تھے ان کے پاس ایک طاقتور حکمران کونسل،خفیہ پولیس اور طاقتور خفیہ نیٹ ورک تھا ۔ان کی خواتین سمیت بچوں کو جنگی تربیت سے بھی گزرنا پڑتا تھا۔اس کے برعکس ایتھنز کے لوگ جمہوریت پسند اور ترقی یافتہ سوچ کے مالک تھے۔ یہاں بالغ حق رائے دہی کا قانون تھا۔عوام جمہوری طریقے سے اپنے نمائندوں کا انتخاب کرتے تھے۔ان کی ترجیحات تعلیم اور فنون کی ترویج و ترقی تھا۔ انہوں نے دنیا بھر کے اعلیٰ دماغ معلموں، دانشوروں، فلاسفروں، معماروں سمیت مختلف شعبہ ہائے زندگی کے لوگوں کو ایتھنز میں کام کرنے کی دعوت دی۔
404 قبل مسیح تک ایتھنز اور سپارٹا نے مل کر فارس کے حملہ آوروں سے مقابلہ کیا۔اس کے بعد دونوں ریاستیں ایک دوسرے کے خلاف ہو گئیں۔ 490 قبل مسیح سے 431 قبل مسیح تک دونوں ایک دوسرے کے خلاف صف آرا ہوتی رہیں، نتیجتاًدونوں ریاستیں کمزور ہوتی چلی گئیں جسے 338 قبل مسیح میں مقدونیہ نے فتح کر لیا۔ یہاں مثبت بات یہ تھی کہ یونانی فلاسفروں، ریاضی دانوں اور سائنس دانوں نے مقدونیائی حکمرانوں کی زیر نگرانی اپنے تحقیقاتی عمل جاری رکھے جن کے دوررس نتائج برآمد ہوئے۔
146 قبل مسیح میں رومن فوج نے یونان پر حملہ کر کے اس پر قبضہ کر لیا۔ لیکن یہاں بھی خوش آئند بات یہ تھی کہ رومن سلاطین یونان کی ترقی دیکھ کر اس کی تعریف کئے بغیر نہ رہ سکے اور انہوں نے یونانی نظریات ، یونانی فنون لطیفہ اور یہاں کی سائنسی کاوشوں کو مزید آگے بڑھایا۔395 ہجری میں یونان ، بازنطینی سلطنت کا حصہ بن گیا۔اس پر قسطنطنیہ (جو اب استنبول کے نام سے جانا جاتا ہے ) کی حکومت قائم ہو گئی۔
1453 ہجری میں جب یونانی بازنطینیوں اور فرانسیسی و اطالوی صلیبیوں کے درمیان جنگ ہوئی جس سے یونان کی سرزمین کو ناقابل تلافی نقصان اٹھانا پڑا۔ 1458 عیسوی میں سلطنت عثمانیہ کے سلطان محمد فاتح نے شہر کو فتح کر لیا۔
1821ء اور 1831ء کے دوران یونان نے جنگ آزادی میں عثمانیوں کو کمزور کیا اور 1834ء میں ایتھنز کو آزاد یونان کا دارالحکومت قرار دے دیا۔ اگلی چند دہائیوں کے دوران اس شہر کی جدید بنیادوں پر تعمیر اور مرمت کا کام شروع کر کے اس تاریخی ورثے کی بحالی کا کام ہنگامی بنیادوں پر شروع ہوا۔ 1896 میں اس شہر نے پہلے گرمائی اولمپک گیمز کی میزبانی کا شرف حاصل کیا۔آج کا ایتھنز جدید اور قدیم تعمیراتی ورثے کا ایک ایسا شاہکار ہے جو سارا سال دنیا کے کونے کونے سے آئے سیاحوں کی توجہ کا مرکز بنا رہتا ہے۔
