آج کا دن
اسپیشل فیچر
کانتو کا زلزلہ
یکم ستمبر 1923ء کو جاپان کے علاقے کانتو میں تباہ کن زلزلہ آیا جسے جدید جاپان کی تاریخ کی سب سے بڑی قدرتی آفات میں شمار کیا جاتا ہے۔ زلزلے کی شدت تقریباً 8.0 تھی۔اس قدرتی آفت کا سب سے خطرناک پہلو صرف زلزلہ نہیں تھا بلکہ اس کے فوراً بعد بھڑکنے والی آگ بھی تھی۔ اس وقت جاپان کے شہروں میں لکڑی کی عمارتیں بڑی تعداد میں تھیں،زلزلے کے وقت بہت سے گھروں میں کھانا پکایا جا رہا تھا جس کی وجہ سے متعدد مقامات پر آگ بھڑک اٹھی۔ نتیجتاً ٹوکیو اور یوکوہاما کے بڑے حصے تباہ ہو گئے۔مجموعی طور پر اس سانحے میں ایک لاکھ سے زیادہ افراد ہلاک ہوئے۔اس تباہی نے جاپان کی شہری منصوبہ بندی، تعمیرات اور قدرتی آفات سے نمٹنے کی پالیسیوں پر گہرا اثر ڈالا۔
لوئی چہاردہم کا انتقال
یکم ستمبر 1715ء کو فرانس کے بادشاہ لوئی چہاردہم کا ورسائی میں انتقال ہوا۔ وہ فرانس کی تاریخ کے سب سے مشہور بادشاہوں میں شمار ہوتا ہے اوراس کا دورِ حکومت تقریباً 72 سال پر محیط تھا۔ اس دور میں فرانس یورپ کی ایک بڑی سیاسی اور فوجی طاقت بن گیا۔ اس نے شاہی اقتدار کو مضبوط کیا اور مرکزی حکومت کے اختیار میں اضافہ کیا۔ اس کے دور میں ورسائی کا محل فرانسیسی شاہی طاقت، درباری ثقافت اور فنون کا ایک عظیم مرکز بن گیا۔ فرانس نے اس دور میں کئی بڑی جنگیں بھی لڑیں۔لوئی چہاردہم کے بعد تخت اس کے پانچ سالہ پڑپوتے لوئی پانزدہم کو ملا۔ چونکہ نیا بادشاہ نابالغ تھا اس لیے فلپ دوم، ڈیوک آف اورلیان نے ریجنٹ کی حیثیت سے حکومت کے معاملات سنبھالے۔
لیبیا میں انقلاب
یکم ستمبر 1969ء کو شمالی افریقی ملک لیبیا میں فوجی انقلاب آیا۔ اس انقلاب کے نتیجے میں ملک کی بادشاہت ختم ہو گئی اور بادشاہ ادریس اول کی حکومت کا خاتمہ ہوا۔ ملک کے سربراہ ادریس اول اس انقلاب کے وقت ملک سے باہر تھے اور نوجوان فوجی افسروں کے ایک گروہ نے اس موقع سے فائدہ اٹھاتے ہوئے اہم فوجی، سرکاری اور مواصلاتی مراکز کا کنٹرول سنبھال لیا۔ معمر قذافی اس گروہ میں سب سے نمایاں تھے۔ نئی حکومت نے لیبیا میں غیر ملکی اثر و رسوخ کو کم کرنے اور ملک کے قدرتی وسائل، خصوصاً تیل، پر قومی اختیار مضبوط کرنے کی کوشش کی۔بعد کے برسوں میں قذافی نے لیبیا کے سیاسی نظام کو اپنی سوچ کے مطابق تبدیل کیا۔
دوسری جنگِ عظیم کا آغاز
یکم ستمبر 1939ء کو نازی جرمنی نے پولینڈ پر حملہ شروع کیا۔ اس حملے کو یورپ میں دوسری جنگِ عظیم کے آغاز کا بنیادی واقعہ سمجھا جاتا ہے۔ 1938ء میں جرمنی نے آسٹریا کو اپنے ساتھ شامل کیا اور بعد میں چیکوسلواکیہ کے علاقوں پر قبضہ کیا۔ 1939ء میں جرمنی کی توجہ پولینڈ کی طرف مرکوز ہو گئی۔یکم ستمبر کی صبح جرمن افواج نے پولینڈ پر مختلف سمتوں سے حملہ شروع کیا۔دوسری جنگِ عظیم تقریباً چھ سال جاری رہی اور اس میں کروڑوں افراد ہلاک ہوئے۔ اس جنگ نے عالمی سیاست، معیشت، بین الاقوامی تعلقات اور دنیا کے طاقت کے توازن کو بنیادی طور پر تبدیل کر دیا۔ اقوام متحدہ کے قیام، نوآبادیاتی نظام کے کمزور ہونے اور امریکہ اور سوویت یونین کے عالمی طاقتوں کے طور پر ابھرنے میں بھی اس جنگ کا اہم کردار تھا۔
کورین ایئر لائنز سانحہ
یکم ستمبر 1983ء کو سرد جنگ کے دوران ایک سنگین بین الاقوامی واقعہ پیش آیا جب کورین ائیر لائنز کے مسافر طیارے کو سوویت جنگی طیارے نے مار گرایا۔ اس میں طیارے میں سوار تمام 269 افراد ہلاک ہوگئے۔یہ طیارہ نیویارک سے سیول جا رہا تھا اور راستے میں الاسکا میں رکا تھا۔ وہاں سے روانگی کے بعد طیارہ اپنے مقررہ فضائی راستے سے ہٹ گیا اور سوویت فضائی حدود میں داخل ہو گیا۔ سوویت فضائی دفاعی حکام نے اس طیارے کو ممکنہ طور پر امریکی جاسوس طیارہ سمجھ لیااور اسے میزائل سے نشانہ بنایا۔ مسافر طیارہ سمندر میں گر گیا اور اس میں موجود تمام افراد ہلاک ہو گئے۔ اس سانحے میں مختلف ممالک کے شہری شامل تھے، جس کی وجہ سے یہ واقعہ فوری طور پر عالمی توجہ کا مرکز بن گیا۔
