آبنائے ہرمز دوبارہ کھولنے کی شرائط پر خدشات کے باعث تیل کی قیمتوں میں مزید اضافہ
لندن: (ویب ڈیسک) آبنائے ہرمز کو دوبارہ کھولنے سے متعلق خدشات کے باعث تیل کی قیمتوں میں مزید اضافہ ہوا ہے۔
ایران نے عمان کے ساتھ مل کر تجویز دی ہے کہ جن بحری جہازوں کو دشمن قرار دیا جائے، انہیں آبنائے ہرمز سے گزرنے سے روکا جائے، جبکہ مجوزہ قواعد کی خلاف ورزی کرنے والے جہازوں پر ان کے سامان کی مالیت کا 20 فیصد تک جرمانہ عائد کیا جائے۔
برینٹ خام تیل کے فیوچر معاہدوں کی قیمت 85 سینٹ (1.03 فیصد) بڑھ کر 83.34 ڈالر فی بیرل ہو گئی، جبکہ امریکی ویسٹ ٹیکساس انٹرمیڈیٹ خام تیل کے فیوچر 52 سینٹ (0.67 فیصد) اضافے کے ساتھ 77.81 ڈالر فی بیرل تک پہنچ گئے۔
گزشتہ روز تیل کی قیمتیں 3 ڈالر فی بیرل سے زیادہ اضافے کے ساتھ بند ہوئیں، جب ایک ایرانی رکنِ پارلیمان نے کہا کہ پارلیمانی کمیٹی ایک ابتدائی مسودۂ قانون کا جائزہ لے رہی ہے۔
فارس نیوز ایجنسی کے مطابق اس مجوزہ قانون کے تحت امریکہ، اسرائیل اور دیگر ایسے ممالک کے جہازوں پر، جنہیں "دشمن" قرار دیا جائے، آبنائے ہرمز سے گزرنے پر پابندی لگائی جا سکتی ہے، جبکہ خلاف ورزی کرنے والوں پر ان کے سامان کی مالیت کے 20 فیصد تک جرمانہ عائد کیا جا سکتا ہے۔
تجزیہ کاروں کا کہنا ہے کہ اس ہفتے پیش آنے والے واقعات سے ظاہر ہوتا ہے کہ ایران اور امریکہ کے درمیان کشیدگی اور تنازع ابھی مکمل طور پر ختم نہیں ہوا۔
Comments / رائے دیں
Share your thoughts. Comments are reviewed before they appear publicly.
Approved Comments