بھارت میں ورلڈکپ نہ کھیلنے کا معاملہ: بنگلہ دیش بورڈ آئی سی سی کے جواب کا منتظر
ڈھاکہ: (ویب ڈیسک) سکیورٹی وجوہات کے باعث بھارت میں ٹی 20 ورلڈکپ نہ کھلینے کے معاملے پر بنگلہ دیش کرکٹ بورڈ انٹرنیشنل کرکٹ کونسل (آئی سی سی) کو خط لکھنے کے بعد جواب کا منتظر ہے۔
بی سی بی نے 2 روز قبل آئی سی سی کو بھارت میں میچز نہ کھیلنے کی وجوہات کے بارے میں تفصیلی خط لکھا تھا، خط میں تمام شواہد بھی تفصیل کے ساتھ پیش کئے گئے کہ بھارت میں کھیلنا ممکن نہیں۔
بنگلہ دیش کرکٹ بورڈ کے صدر امین الاسلام کا کہنا ہے کہ آئی سی سی کے ساتھ تمام ثبوت اور ضروری دستاویزات شیئر کئے ہیں، تاحال کوئی جواب نہیں آیا، ہم نے اپنے تمام تحفظات کے حوالے سے آئی سی سی کو آگاہ کر دیا ہے، ہمارے مؤقف میں کوئی تبدیلی نہیں ہمیں حکومت کی ہدایت کے مطابق چلنا ہے۔
انہوں نے کہا کہ میں نے اس حوالے سے یہ نہیں سنا کہ ہمارے میچز کیلئے حیدرآباد یا چنئی متبادل وینیوز ہیں، میرے خیال میں ہمیں پیر یا منگل تک آئی سی سی کی طرف سے اس حوالے سے جواب آئے گا۔
امین الاسلام کا کہنا تھا کہ بنگلہ دیش ٹیم ٹی 20 میں اچھا پرفارم کر رہی ہے، ان کنڈیشنز میں ٹیم اچھا کھیلے گی، ٹیم کے تین میچز کولکتہ اور ایک گروپ میچ ممبئی میں شیڈول ہے۔
دوسری جانب بی سی بی ذرائع کا کہنا ہے کہ آئی سی سی کی جانب سے وینیو تبدیل نہیں کیا گیا تو بنگلہ دیش کرکٹ بورڈ فیصلہ تسلیم نہیں کرے گا، بی سی بی کو یقین ہے کہ آئی سی سی بنگلہ دیش ٹیم کا وینیو تبدیل کرے گی۔
یاد رہے کہ بھارتی انتہا پسندوں کے دباؤ میں آ کر بھارتی بورڈ نے فاسٹ باؤلر مستفیض الرحمان کو آئی پی ایل سے ریلیز کر دیا تھا، بنگلہ دیش ٹیم کو ملنے والی دھمکیوں کے بعد بی سی بی نے ٹی 20 ورلڈ کپ کیلئے ٹیم بھارت نہ بھیجنے کا اعلان کیا۔
بی سی بی نے آئی سی سی سے میچز بھارت کے علاوہ کسی دوسرے وینیو پر منتقل کرنے کا مطالبہ کیا ہے جس پر آئی سی سی نے بی سی بی سے سکیورٹی کے حوالے سے تحفظات کی تفصیلات مانگی تھیں۔
