گوجرانوالہ: انسانی سمگلنگ اور ویزا فراڈ میں ملوث 4 ملزمان گرفتار
گوجرانوالہ: (دنیا نیوز) فیڈرل انویسٹی گیشن ایجنسی (ایف آئی اے) نے مختلف کارروائیاں کرتے ہوئے انسانی سمگلنگ اور ویزا فراڈ میں ملوث 4 ملزمان کو گرفتار کرلیا۔
ترجمان کے مطابق ایف آئی اے گوجرانوالہ نے سمبڑیال اور گوجرانوالہ میں کارروائی کرتے ہوئے انسانی سمگلنگ اور ویزا فراڈ میں ملوث 4 ملزمان کو حراست میں لیا، ملزمان میں سرفراز احمد عرف صفدر، عبد الرحمان، آصف حسین اور محمد افتخار شامل ہیں، ملزمان شہریوں سے ایک کروڑ 40 لاکھ 43 ہزارروپے بٹورنے میں ملوث ہیں۔
ایف آئی اے کا کہنا ہے کہ ملزمان سرفراز اور عبدالرحمان شہریوں کو سمندر کے راستے یورپ بھجوانے میں ملوث ہیں، ملزمان نے شہریوں کو یورپ بھجوانے کا جھانسہ دے کر 90 لاکھ روپے سے زائد وصول کئے۔
حکام نے بتایا کہ ملزمان نے شہریوں کو کشتی کے ذریعے لیبیا کے راستے اٹلی بھجوانے کی کوشش کی، شہریوں نے کشتی کے ذریعے یورپ جانے سے انکار کر دیا اور پاکستان واپس آگئے، گرفتار ملزم محمد افتخار سال 2016 سے اشتہاری ملزم ہے، ملزم نے دبئی، امریکا اور کینیڈا ملازمت کا جھانسہ دے کر 43 لاکھ 69 ہزار روپے سے زائد وصول کئے ہیں۔
اسی طرح ملزم آصف نے شہری کو دبئی ملازمت کی غرض سے بھجوانے کیلئے 7 لاکھ روپے وصول کئے۔
ایف آئی اے حکام کے مطابق ملزمان شہریوں کو بیرون ملک بھجوانے میں ناکام رہے اور روپوش ہوگئے تھے، ملزمان کے دیگر ساتھیوں کی گرفتاری کیلئے چھاپہ مار کارروائیاں جاری ہیں۔
