امیر گیلانی سے محبت سب سے پہلے مجھے ہوئی تھی، ماورا حسین کا انکشاف
لاہور: (ویب ڈیسک) پاکستانی شوبز انڈسٹری کی معروف اداکارہ ماورا حسین نے اپنی محبت کی کہانی سے متعلق بتایا کہ امیر گیلانی سے محبت سب سے پہلے مجھے ہوئی تھی۔
ماورا حسین اور امیر گیلانی کو شوبز کی خوبصورت اور پسندیدہ جوڑیوں میں شمار کیا جاتا ہے تاہم حال ہی میں رشتۂ ازدواج میں منسلک ہونے والی یہ جوڑی زندگی اور کیریئر کے ہر موڑ پر ایک دوسرے کا بھرپور ساتھ دیتی نظر آتی ہے اور کھل کر اپنے جذبات کا اظہار بھی کرتی ہے۔
حال ہی میں انٹرویو کے دوران ماورا حسین نے بتایا کہ انہوں نے سب سے پہلے امیر گیلانی کی معصومیت اور خوبصورتی کو محسوس کیا، بعد ازاں جب ان کی شخصیت کو قریب سے جانا تو معلوم ہوا کہ وہ نماز کے پابند، نہایت نرم مزاج، مہذب اور ہر معاملے میں ساتھ دینے والے انسان ہیں، یہی خوبیاں ان کے دل میں گھر کر گئیں اور انہوں نے اللہ سے دعا کی کہ امیر ہی ان کے شریکِ حیات ہوں۔
ماورا حسین نے کا کہنا تھا کہ اگرچہ امیر گیلانی بھی انہیں پسند کرتے تھے، دونوں میں سے کسی نے بھی کبھی براہِ راست اپنے جذبات کا اظہار نہیں کیا، اس محبت کی کہانی میں اہم کردار امیر گیلانی کی والدہ نے ادا کیا جنہوں نے دونوں خاندانوں کو قریب لانے میں مدد دی۔
اداکارہ نے انکشاف کیا کہ انہوں نے جو پہلی انگوٹھی پہنی، وہ ان کی ساس نے خود ان کی انگلی میں پہنائی تھی، اگر امیر گیلانی نہ ہوتے تو وہ کسی اور سے شادی کا سوچ بھی نہیں سکتی تھیں تاہم اب وہ اپنی ازدواجی زندگی سے بے حد خوش ہیں اور وہ اور امیر گیلانی ایک دوسرے سے بے پناہ محبت کرتے ہیں۔
