ہفتہ وار بنیادوں پر مہنگائی کی شرح میں 0 اعشاریہ 24 فیصد اضافہ ریکارڈ
اسلام آباد: (دنیا نیوز) ادارہ شماریات نے رپورٹ جاری کی ہے کہ ہفتہ وار بنیادوں پر اس ہفتے مہنگائی کی شرح میں 0 اعشاریہ 24 فیصد اضافہ ریکارڈ ہوا ہے۔
رپورٹ کے مطابق ہفتہ وار مہنگائی کی سالانہ شرح 3 اعشاریہ 75 فیصد کی سطح پر آ گئی، ایک ہفتے کے دوران 17 اشیاء مہنگی، 14 کی قیمتوں میں کمی ریکارڈ ہوئی ہے۔
ادارہ شماریات کے مطابق حالیہ ہفتے کے دوران چکن فی کلو 40 روپے 34 پیسے مہنگا ہوا، انڈے فی درجن 10 روپے 31 پیسے مہنگے ہو گئے، جلانے کی لکڑی فی من 12 روپے 35 پیسے مہنگی ہوئی۔
اعداد و شمار کے مطابق ایک ہفتے میں دال مونگ 1 روپے 17 پیسے مہنگی ہوئی، دہی، تازہ دودھ، مٹن، خشک دودھ بھی مہنگی ہونے والی اشیاء میں شامل ہے۔
بتایا گیا ہے کہ ایک ہفتے میں ٹماٹر فی کلو 9 روپے ایک پیسہ سستے ہو گئے، حالیہ ہفتے کے دوران آلو فی کلو 5 روپے 08 پیسے سستے ہوئے، ایک ہفتے کے دوران چینی کی فی کلو قیمت 7 روپے 09 پیسے کم ہوئی۔
ادارہ شماریات کی رپورٹ کے مطابق ڈیزل، دال مسور، ایل پی جی سلنڈر سستی ہونے والی اشیاء میں شامل ہیں جبکہ بریڈ، گندم کا آٹا، کپڑے سمیت 20 اشیاء کی قیمتیں مستحکم رہیں۔
