پی آئی اے کی نجکاری کیخلاف ملازمین کا اسلام ایئر پورٹ پر دھرنا، فلائٹ آپریشن بند کرنے کا عندیہ
اسلام آباد:(دنیا نیوز) پی آئی اے کی نجکاری کے خلاف ملازمین نے اسلام آباد ایئرپورٹ پر دھرنا دے دیا۔
وفاقی دارالحکومت میں احتجاجی دھرنا پی آئی اے کی پیپلز یونٹی آف پی آئی اے ایمپلائز یونین کے زیر اہتمام کیا گیا جس میں پیپلز یونٹی کے صدر رمضان لغاری ، جنرل سیکرٹری سہیل مختار ،دیگر عہدیداروں نے شرکت کی۔
ملازمین کی نجکاری کیخلاف اسلام آباد ایئرپورٹ پر بھرپور نعرے بازی کی گئی اور مظاہرین نے نجکاری روکنے کیلئے بھرپور جہدوجہد کا اعلان کیا۔
مظاہرین کا کہنا تھا کہ نجکاری کے نام پر لوٹ کھسوٹ کو ہر صورت روکا جائے گا اگر نجکاری ناگزیر ہے تو ملازمین کے روزگار کے تحفظ کی بھی یقین دہانی کروائی جائے۔
جنرل سیکرٹری سہیل مختار نے کہا کہ پی آئی اے کا آپریشن بند کرنا پڑا تو وہ بھی کیا جائے گا پاکستان کے تمام سٹیشنز کراچی لاہور ، کوئٹہ اسلام آباد و دیگر پر بھی احتجاج ہو گا۔
واضح رہے پاکستان کی قومی فضائی کمپنی پی آئی اے کی نیلامی کی تاریخ کا اعلان ہو گیا ہے، یہ نیلامی رواں برس 23 دسمبر کو ہوگی۔ وفاقی حکومت نے اس حوالے سے تیاریاں شروع کر دی ہیں۔
