نواز شریف آئی ٹی سٹی منصوبے میں رکاوٹیں ختم کی جائیں: انوشہ رحمان
لاہور:(دنیا نیوز) سینٹر انوشہ رحمان نے نواز شریف آئی ٹی سٹی کے منصوبے میں تیزی لانے کیلئے رکاوٹیں ختم کرنے کی ہدایات کی۔
وزیر اعلیٰ پنجاب کی سینئر ایڈوائزر سینٹر انوشہ رحمان کی زیر صدارت وزیر اعلیٰ آفس میں ایک اہم اجلاس منعقد ہوا، جس میں لاہور میں زیر تعمیر نواز شریف آئی ٹی سٹی منصوبے پر ہونے والی پیش رفت کا تفصیلی جائزہ لیا گیا۔
اجلاس میں نواز شریف آئی ٹی سٹی کے منصوبے کو تیزی سے آگے بڑھانے کے لیے مختلف تجاویز پر غور کیا گیا جبکہ ڈیویلپرز کے لیے لائسنسز کے اجرا سے متعلق امور کا تفصیلی جائزہ بھی لیا گیا، اس موقع پر لائسنسز کے اجرا کے حوالے سے جلد ماڈیلیٹیز طے کرنے کی ضرورت پر زور دیا گیا۔
ر انوشہ رحمان نے کہا کہ وزیر اعلیٰ پنجاب مریم نواز شریف نے انفارمیشن ٹیکنالوجی کے فروغ کو اپنی اولین ترجیح بنایا ہے، پہلا نواز شریف آئی ٹی سٹی لاہور میں قائم کیا جا رہا ہے، جہاں ملکی اور غیر ملکی انفارمیشن ٹیکنالوجی کمپنیاں سرمایہ کاری کریں گی۔
اُن کا کہنا تھا کہ وزیر اعلیٰ پنجاب اس اہم منصوبے کو تیزی سے مکمل کرنے کی خواہاں ہیں اور اس ضمن میں افسر شاہی کی تمام رکاوٹوں کو دور کر کے منصوبے کو برق رفتاری سے آگے بڑھانے کی ہدایات جاری کی گئی ہیں۔
اجلاس میں فیصلہ کیا گیا کہ آئی ٹی سٹی میں سرمایہ کاری کرنے والی کمپنیوں کو ہر ممکن سہولیات اور ریلیف فراہم کیا جائے گا، وزیر اعلیٰ کی ہدایت کے مطابق ان کمپنیوں کو 10 سال تک انکم ٹیکس اور کسٹم ڈیوٹی میں چھوٹ کی سہولت بھی دی جائے گی۔
سینئر ایڈوائزر نے جنوبی، وسطی اور شمالی پنجاب کے دیگر شہروں میں بھی نواز شریف آئی ٹی سٹی کے قیام کے لیے زمین کی نشاندہی کا عمل جلد مکمل کرنے کی ہدایت کرتے ہوئے مزید کہا کہ منصوبے کی تیز رفتار تکمیل سے آئی ٹی سیکٹر کو فروغ ملے گا اور عوام اس سے براہ راست مستفید ہوں گے۔
