عمران خان کی آنکھ کے معائنے کی تصدیق، پمز ہسپتال نے تفصیلات بتا دیں
اسلام آباد: (دنیا نیوز) پمز ہسپتال کے ایگزیکٹو ڈائریکٹر نے بانی پی ٹی آئی عمران خان کی دائیں آنکھ کے معائنے کی تصدیق کرتے ہوئے علاج کی تفصیلات بتا دیں۔
جاری بیان میں ایگزیکٹو ڈائریکٹر پمز ہسپتال رانا عمران سکندر نے بتایا کہ بانی پی ٹی آئی کو کچھ روز قبل پمز ہسپتال لایا گیا تھا، عمران خان نے دائیں آنکھ میں بینائی میں کمی کی شکایت کی تھی۔
رانا عمران سکندر کے مطابق سینئر ڈاکٹر نے اڈیالہ جیل میں بانی پی ٹی آئی کی آنکھوں کا مکمل معائنہ کیا،سینئر ڈاکٹر نے بانی پی ٹی آئی کی دائیں آنکھ کے ضروری ٹیسٹ تفصیلی طور پر کیے۔
انہوں نے بتایا کہ بانی پی ٹی آئی کی دائیں آنکھ کا سلٹ لیمپ معائنہ، فنڈو سکوپی کی گئی، آنکھ کے اندرونی دباؤ کی پیمائش، ضروری لیبارٹری ٹیسٹ اور ریٹینا کی او سی ٹی کی گئی، ان کی دائیں آنکھ میں سینٹرل ریٹینل وین اوکلوژن کی تشخیص کی گئی۔
جاری بیان میں کہا گیا کہ بانی پی ٹی آئی کے مزید علاج کیلئے سینئر ڈاکٹر نے ہسپتال بھیجنے کی سفارش کی، ہفتہ اور اتوار کی درمیانی شب بانی کو تجویز کردہ علاج کیلئے پمز لایا گیا جہاں انہیں مرض اور علاج تفصیل سے سمجھایا گیا، علاج سے پہلے بانی پی ٹی آئی سے باقاعدہ تحریری رضامندی بھی حاصل کی گئی۔
یہ بھی پڑھیں: عمران خان بالکل تندرست ہیں، معمول کا طبی معائنہ ہوا: عطاء اللہ تارڑ
انہوں نے مزید بتایا کہ بانی پی ٹی آئی کا علاج آپریشن تھیٹر میں جراثیم سے پاک ماحول اور نگرانی میں کیا گیا، ان کا علاج 20 منٹ میں بخیر و خوبی مکمل ہوا، علاج کے دوران مریض کی وائٹل علامات مستحکم رہیں، بعد میں بانی پی ٹی آئی کو ہدایات، فالو اپ مشورے دستاویز کے ساتھ ڈسچارج کیا گیا۔
