×

کھیل

ٹیسٹ سیریز میں انگلینڈ نے پہلی بار ہوم گراؤنڈ پر پاکستان کو وائٹ واش کر دیا

بند کریں

برمنگھم: (دنیا نیوز) انگلش ٹیم نے 3 ٹیسٹ میچز کی سیریز کے آخری میچ میں بھی پاکستان ٹیم کو شکست دے کر وائٹ واش کر دیا۔

برمنگھم میں کھیلے گئے سیریز کے تیسرے اور آخری ٹیسٹ میچ میں انگلینڈ نے پاکستان کی جانب سے دیا گیا 130 رنز کا ہدف 2 وکٹوں کے نقصان پر حاصل کر لیا، انگلینڈ نے میچ کے آخری مرحلے میں پراعتماد بیٹنگ کا مظاہرہ کرتے ہوئے پاکستان کو شکست سے دوچار کیا۔

انگلینڈ کی جانب سے جو روٹ نے شاندار بیٹنگ کرتے ہوئے 62 رنز کی نمایاں اننگز کھیلی، جبکہ جارڈن کاکس 59 رنز بنا کر نمایاں رہے،دونوں بلے بازوں نے ہدف کے تعاقب میں ذمہ دارانہ بیٹنگ کرتے ہوئے اپنی ٹیم کو کامیابی سے ہمکنار کیا۔

تیسرے ٹیسٹ میں فتح کے ساتھ ہی انگلینڈ نے پاکستان کے خلاف تین میچز کی سیریز 3-0 سے جیت کر وائٹ واش مکمل کر لیا، پاکستان پوری سیریز میں انگلینڈ کے خلاف کوئی ٹیسٹ میچ جیتنے میں کامیاب نہ ہو سکا۔

پاکستانی کی دوسری اننگز

اس سے قبل پاکستانی ٹیم دوسری اننگز میں 449 رنز بنا کر آؤٹ ہوگئی اور انگلینڈ کو میچ جیتنے کے لیے 130 رنز کا ہدف دے دیا۔

پاکستان کی جانب سے کپتان شان مسعود 95 رنز بنا کر ٹاپ سکورر رہے، جبکہ بابر اعظم نے 76 اور اذان اویس نے 59 رنز کی اننگز کھیلی، سعود شکیل 29 اور غازی غوری 16 رنز بنا سکے۔

صائم ایوب اور عبداللہ شفیق بغیر کوئی رن بنائے آؤٹ ہوئے، تاہم ٹیل اینڈرز نے انگلش باؤلرز کے خلاف بھرپور مزاحمت کی۔

رضا اللہ نے ٹیسٹ ڈیبیو میں شاندار 81 رنز کی اننگز کھیلی، جس میں 9 چھکے اور 4 چوکے شامل تھے، محمد عباس نے بھی جارحانہ بیٹنگ کرتے ہوئے 40 رنز بنائے۔

ٹیل اینڈرز کی مزاحمت نے پاکستان کو اننگز کی شکست سے بچانے میں اہم کردار ادا کیا، اس سے قبل انگلینڈ نے پہلی اننگز میں 453 رنز بنائے تھے جبکہ پاکستان کی پہلی اننگز 133 رنز پر ختم ہوگئی تھی۔